სსიპ საქართველოს შინაგან საქმეთა სამინისტროს აკადემიასა და საქართველოს მედიამონიტორიგის ცენტრს შორის ურთიერთშეთანხმების მემორანდუმი გაფორმდა.
დოკუმენტს შსს-ს აკადემიაში ხელი ნუკრი გელაშვილმა და მედიამონიტორიგის ცენტრის ხელმძღვანელმა, ია მამალაძემ მოაწერეს.
ცნობისთვის, ურთიერთშეთანხმების მემორანდუმი ითვალისწინებს მხარეებს შორის პერმანენტულ თანამშრომლობას, რაც გულისხმობს ერთობლივი საზოგადოებრივი, საგანმანათლებლო, სამეცნიერო-პროპაგანდისტული და სხვა სახის მედიაპროექტების გახორციელების ხელშეწყობას; აკადემიის საქმიანობის, განსაკუთრებით, შსს არქივის დაქვემდებარებაში არსებული მასალების მიხედვით მომზადებული სამეცნიერო კვლევების, სტატიების, პუბლიკაციების, ინტეგრირებული კვლევების, მხატვრულ–დოკუმენტური ფილმების, საიმიჯო ვიდეო-რგოლებისა და სხვა სახის ინტელექტუალურ-შემოქმედებითი პროდუქციის პოპულარიზაციას.
თანამშრომლობის მიზანია, ხელი შეუწყოს ქვეყნის უახლესი წარსულის შესახებ საზოგადოების ინფორმირებულობის გაზრდას, არქივში დაცული მასალების კვლევას და ანალიზს, მომავალი თაობების მიერ საბჭოთა მმართველობის გააზრებას, რაც უმნიშვნელოვანესია ქვეყნის დემოკრატიული განვითარების თვალსაზრისით.
როგორც შეხვედრისას მედიამონიტორინგის ცენტრის ხელმძღვანელმა ია მამალაძემ აღნიშნა, მიუხედავად იმისა, რომ ეს არ არის იურიდიული ძალის მქონე დოკუმენტი, მედიამონიტორინგის ცენტრი და აკადემია მჭიდრო თანამშრომლობას აპირებენ.
"ეს არის ორი ინსტიტუციის კეთილი ნება, რომ შემდგომში ითანამშრომლონ და ყველა იმ სიახლეს მიაქციონ ყურადღება, რომელიც საქართველოსთვის მნიშვნელოვანია. რას ვგულისხმობთ ამაში – პირველ რიგში იმას, რომ წარსულის კვლევა, არქივებით უფრო მეტად დაინტერესება მედიისთვის არის ძალიან მნიშვნელოვანი, რადგან სახელმწიფოს გაუჩნდეს პოლიტიკური მეხსიერება, რომელიც მომავალი დემოკრატიული განვითარებისთვის აუცილებელია. რაც შეეხება აკადემიასთან თანამშრომლობას, ვფიქრობ, ის სიახლე, რომ აკადემია უკვე უმაღლესი სასწავლებელია, სამომავლოდ ჩვენს ქვეყანაში ღირსეული კადრების ჩამოყალიბების და მედიის დაინტერესების საგნად უნდა იქცეს", _ აღნიშნა ია მამალაძემ.
თავის მხრივ, რეგიონულ მედიასთან ღიაობის სრული მზადყოფნა გამოთქვა აკადემიის რექტორმა ნუკრი გელაშვილმაც, რომელმაც მემორანდუმის ხელმოწერის შემდეგ განაცხადა, რომ შეთანხმება შსს-ს აკადემიის ინტელექტუალურ-შემოქმედებითი საქმიანობის პოპულარიზაციის მიზნით გაფორმდა, რაც მედიასთან თანამშრომლობის გარეშე წარმოუდგენელია.
"დღეს, მედიამონიტორინგის ცენტრთან შევთანხმდით იმ თემებზე და ფორმატზე, როგორ ვითანამშრომლებთ. მოგეხსენებათ, აკადემიაში მიმდინარეობს კვლევითი საქმიანობა, გვაქვს პუბლიკაციები, საინტერესო საარქივო მასალები და მხატვრულ-დოკუმენტური ფილმები. სწორედ ამ საქმიანობის, ანუ აკადემიის ინტელექტუალურ-შემოქმედებითი საქმიანობის პოპულარიზაციის მიზნით გაფორმდა აღნიშნული შეთანხმება. გვაქვს მედიამონიტორინგის ცენტრის იმედი, რომ სწორედ ამ პოპულარიზაციაში ისინი ძალიან დიდ ძალისხმევას ჩადებენ", _ აღნიშნა გელაშვილმა.
