ოზურგეთის მუნიციპალიტეტის საბავშვო ბაღებში სასწავლო პროცესი 1 ოქტომბერს დაიწყება. ნიკო ნიკოლაძის ქუჩაზე მდებარე # 4 საბავშვო ბაღი, სხვა ბაღებისგან განსხვავებით, ფუნქციონირებას იმავე შენობაში ვერ დაიწყებს, ამის მიზეზად გაურემონტებელი შენობა სახელდება. "გურია ნიუსს" ბაღის აღსაზრდელთა მშობლები დაუკავშირდნენ და ადგილობრივი ხელისუფლების მიმართ პროტესტი გამოთქვეს. მათი განცხადებით, ბაღმა ფუნქციონირება ნაქირავებ ბინაში უნდა განაგრძოს, ამისთვის კი სახელმწიფომ ყოველთვიურად 500 ლარი უნდა გადაიხადოს.
" ამ ეტაპზე ბაღი დახურულია. დაგვპირდნენ, რომ წელს სამზარეულოს მაინც გაარემონტებდნენ. ახლა აღმოჩნდა, რომ ამასაც აღარ აკეთებენ, დიდი თანხებია საჭირო და არ გვაწყობსო. 2016 წლის ბიუჯეტში ჩავსვამთ და მთლიანად გაუკეთდება ბაღს რემონტიო"_ ამბობენ "გურია ნიუსთან" 4 საბავშვო ბაღის აღსაზრდელთა მშობლები:
"ჯერ გვპირდებოდნენ, მაისში დავასრულებთ სასწავლო პროცესს, ამ სამ თვეს გამოვიყენებთ და გავარემონტებთო. მაგრამ არავინ ყურადღება არ მოგვაქცია… ბევრჯერ გამოვხატეთ პროტესტი. დაგვპირდნენ, რომ სამზარეულოს აუცილებლად გაგირემონტებთო, მაგრამ როგორც ხედავთ, ესეც არ გააკეთეს". მშობლების თქმით, ბაღი წინა წელს უნდა გარემონტებულიყო, მაგრამ მისთვის გამოყოფილი თანხებით, სხვა ბაღი გარემონტდა:
"სხვა ბაღი გაარემონტეს ამ ფულით. მთელი ზაფხული ისე გავიდა, რომ ამბავიც არ უკითხავთ, 85 ბავშვი ფეხებზე დაიკიდეს. მასწავლებლებით და ბაღის თანამშრომლებით კმაყოფილები ვართ, ასეთ დანგრეულ შენობაში სისუფთავე და ყურადღება არ გვაკლია. თუ არ გაარემონტეს, ალბათ დაიხურება ბაღი და ეს მასწავლებლებიც დარჩებიან უმუშევრები, ამდენი ბავშვი კი – ბაღის გარეშე. სად წავიყვანოთ ბავშვები? ისედაც გარეუბანია, აქ სხვა ბაღი ახლოს არ არის. პირადი კეთილდღეობისთვის ხომ აქვთ ფული?
პატარებს მეტად არ უნდა მიაქციონ ყურადღება? რამდენ ხანს იქირავებენ სხვა სახლს? ან რატომ უნდა დაიხარჯოს ამდენი ფული ბიუჯეტიდან ქირაში? ეს არაა ორმაგი ხარჯვა? აქვეა რამდენიმე მრავალბინიანი სახლი, ამდენი ქუჩის მაცხოვრებელი, რატომ უნად შეყარო ნაქირავებში, როცა ამხელა ბაღის შენობაა? "_ გამოთქვამენ პროტესტს მშობლები.
# 4 საბავშვო ბაღის მენეჯერი მარიკა ღლონტი "გურია ნიუსთან" ამბობს, რომ მშობლების პროტესტი სამართლია:
"მე ვიცი, რომ 2016 წლის ბიუჯეტშია ჩასმული ბაღის მთლიანი რეაბილიტაცია. იმედია, გაკეთდება. ამ ეტაპზე გვიქირავეს კერძო სახლი და ყოველთვიურად 500 ლარს გადაიხდის სახელმწიფო. სამზარეულო უნდა გაკეთებულიყო, შესაბამისად ხარჯთაღრიცხვაც გაკეთდა, მაგრამ გადაიდო მისი გარემონტება., რადგან ჩათვალეს, რომ ეს დამატებითი ხარჯი იქნებოდა" – ამბობს მენეჯერი. ის მიიჩნევს, რომ ნიკოლაძის ქუჩაზე მდებარე # 4 საბავშვო ბაღის ფუნქციონირება აცილებელია.
"ამაზე საუკეთესო ეზო არასად არის, შენობას აქვს რამოდენიმე შესასველი, საძინებელი, სამზარეულო… ასეთი ტიპიური ბაღის შენობა რამოდენიმე იქნება საქართველოში. ადრე ეს შენობა 280 ბავშვზე იყო გათვლილი, სამი კორპუსისგან შედგება, რაიონში პირველი ბაღი იყო.
მშობლების პროტესტი სამართლიანია, მე მათ ვეთანხმები და იმედი მაქვს, რომ კიდევ არ გაიწელება ამ ბაღის რეაბილიტაცია. ქალაქ ოზურეგთში თითქმის ყველა ბაღია გაკეთებული ამის გარდა"_ გვითხრა ბაღის მენეჯერმა.
ქალაქ ოზურგეთის მუნიციპალიტეტის მერიის სააღმზრდელო -საგანმანათლებლო ცენტრის მენეჯერი ეკა ნინიძე მეოთხე საბავშო ბაღთან დაკავშირებით ამბობს, რომ შენობა აუცილებელ რეაბილიტაციას საჭიროებდა, რის გამოც, არ მოხდა აღნიშნულ ბაღში სააღმზრდელო პროცესის დაწყება:
"ბაღი რომ რეაბილიტაციას საჭიროებს, ერთი შეხედვითაც ჩანს, ამიტომ ჩვენ გადავწყვიტეთ, შენობაში სააღმზრდელო პროცესი არ გაგრძელდეს. აქამდე გვქონდა ბინა ნაპოვნი, თუმცა იმ ბინაზე ვეღარ შევთანხმდით. ვეძებთ კერძო სახლს, რომ ვიქირაოთ და დროებით გადავიყვანოთ ბავშვები."- ამბობს ეკა ნინიძე.
კითხვაზე, რატომ არ დადგა დღის წესრიგში აღნიშნული ბაღის რეაბილიტაციის საკითხი, სააღმზრდელო ცენტრის დირექტორი გვპასუხობს, რომ მომავალი გაზაფხულისთვის, პრობლემა უკვე მოგვარებული უნდა იყოს:
"ბაღის რემონტს სააღმზრდელო ცენტრი ვერ გააკეთებს. ეს არც ჩვენს კომპეტენციაში შედის და არც ამისთვის საჭირო თანხები გვაქვს. სამწუხაროდ, წელს ვერ მოესწრო ბაღის გარემონტება, მაგრამ მომავალი გაზაფხულისთვის იგეგმება და პრობლემაც გადაიჭრება.
გადაწყვეტილი იყო სამზარეულო გაკეთება, მყავდა კიდეც სპეციალისტები მიყვანილი, მაგრამ აღმოჩნდა, რომ შენობა კიდევ უფრო ცუდ მდგოამორებაშია, ვიდრე აქამდე იყო. იმ ავარიულ ოთახებში, მე და ქალაქის მერმა არ ჩავთვალეთ მიზანშეწონილად ბავშვების გაჩერება. ძალიან მძიმე მდგომარეობაა და ამიტომ გადავწყვიტეთ, რომ ისინი ნაქირავებ ბინაში გადაგვეყვანა"_ამბობს ნინიძე.
