FactCheck.ge პოლიტიკოსების და საჯარო პერსონების განცხადებებში ფაქტობრივი სიზუსტის დადგენის ყოველკვირეულ მიმოხილვას აქვეყნებს, რომელსაც უცვლელად გთავაზობთ.
ორგანიზაციის ინფორმაციით, ერთ-ერთი ყველაზე პოპულარული სტატია პრემიერ-მინისტრის, ირაკლი ღარიბაშვილის განცხადებას ეხებოდა. ღარიბაშვილის თქმით, საქართველო იქნება პირველი ქვეყანა რეგიონში და ევროპაში, რომელსაც ჩინეთთან თავისუფალი ვაჭრობა ექნება.
მსოფლიო მასშტაბით, ჩინეთს თავისუფალი ვაჭრობა 21 ქვეყანასთან აქვს, ხოლო 10 ქვეყანასთან მოლაპარაკებების ეტაპზეა. ამ ქვეყნებიდან არცერთი არ არის საქართველოს რეგიონში შემავალი ქვეყანა. ჩინეთს თავისუფალი ვაჭრობა არ აქვს არც ევროკავშირის წევრ ქვეყნებთან, თუმცა აქვს შვეიცარიასთან და ისლანდიასთან, ხოლო ნორვეგიასთან მოლაპარაკებების ეტაპზეა.
საქართველოს და ჩინეთს შორის ვაჭრობას სწრაფად მზარდი ტენდენცია აქვს, რის შედეგადაც, ჩინეთი ვაჭრობის სიდიდით საქართველოს რიგით მესამე პარტნიორია. თავისუფალი ვაჭრობის რეჟიმის ამოქმედება საქართველოს ექსპორტის მოცულობის ზრდაში დაეხმარება, იმპორტზე კი ნაკლებ გავლენას იქონიებს, რადგან ჩინური საქონელი სატარიფო ბარიერების პირობებშიც მაღალ კონკურენტუნარიანია და ამასთან, საქართველოს ზოგადად ლიბერალური სავაჭრო რეჟიმი აქვს, საბაჟო ტარიფი 0%-დან 12%-მდეა.
შესაბამისად, ფაქტ-მეტრის დასკვნით, პრემიერის განცხადება მეტწილად სიმართლეა.
ირაკლი ღარიბაშვილის კიდევ ერთი განცხადება ნატო-საქართველოს ურთიერთობებს ეხებოდა. ღარიბაშვილის თქმით, ერთი წელიც არ არის გასული მას შემდეგ, რაც 2014 წელს, უელსის სამიტზე საქართველოსთან არსებით ღონისძიებათა პაკეტის შემუშავების შესახებ გადაწყვეტილება იქნა მიღებული და ხელისუფლებამ პაკეტით გათვალისწინებული პროექტების იმპლემენტაციის დაწყება ერთ წელზე ნაკლებ დროში მოახერხა.
უელსის სამიტზე მიღებული "არსებითი პაკეტის" იმპლემენტაციის პროცესი საქართველოსა და დასავლელ პარტნიორებს შორის ამ დრომდე გრძელდება. აღსანიშნავია, რომ პაკეტის განხორციელების პროცესში სხვადასხვა უწყებები არიან ჩართულნი – როგორც სახელმწიფო სტრუქტურები, ისე საერთაშორისო მოკავშირეები. განსაკუთრებით მნიშვნელოვანია, რომ წვრთნისა და შეფასების ცენტრის გახნსის პროცესი აქტიურად მიმდინარეობდა და უელსის სამიტიდან 1 წლის შემდეგ გაიხსნა კიდეც. ამავე კონტექსტში, ასევე აღსანიშნავია 2015 წლის მაისში ჩატარებული სამხედრო წვრთნა საქართველოსა და ამერიკის შეერთებული შტატების სამხედროების მონაწილეობით.
შესაბამისად, ირაკლი ღარიბაშვილის განცხადება სიმართლეა.
გასულ კვირას ფაქტ-მეტრმა "ნაციონალური მოძრაობის" წევრის, მიხეილ მაჭავარიანის განცხადებაც გადაამოწმა. მაჭავარიანის განცხადებით, პრივატიზაციიდან მთავრობას 350 მლნ უნდა მიეღო, ამით უნდა გაემყარებინა ლარი, თუმცა სულ 48 მილიონი მიიღეს… ესეც ჩაუვარდათ.
22 თებერვალს, ეკონომიკის და მდგრადი განვითარების იმჟამინდელმა მინისტრმა გიორგი კვირიკაშვილმა განაცხადა, რომ კონკრეტული გეგმის თანახმად, პრივატიზაციის გააქტიურებით, უახლოეს მომავალში 250-300 მლნ აშშ დოლარს მოიზიდავდა.
ამ განცხადებიდან 7 თვის შემდეგ პრივატიზაციიდან 48 მლნ დოლარია მოზიდული. მიუხედავად იმისა, რომ გასულ წელთან და მიმდინარე წლის დასაწყისთან შედარებით პრივატიზაციის პროცესი მართლაც გააქტიურდა, ის 7 თვის წინ დაპირებულ ტემპს, რასაც ლარის კურსზე მნიშვნელოვანი დადებითი გავლენა უნდა მოეხდინა, არ შეესაბამება.
შესაბამისად, მიხეილ მაჭავარიანის განცხადება მეტწილად სიმართლედ შეფასდა.
ფაქტ-მეტრის მიერ გადამოწმებული კიდევ ერთი ფაქტი კომუნიკაციების ეროვნული კომისიის თავმჯდომარის, ვახტანგ აბაშიძის განცხადებას ეხებოდა. აბაშიძის თქმით, ტელეკომპანია "იმედს" აქვს ვალდებულება, რომ საზოგადოებრივ-პოლიტიკური გადაცემები გონივრულ ვადაში აღადგინოს.
2015 წლის 29 აგვისტოს "იმედმა" საგანგებო განცხადება გაავრცელა, სადაც აღნიშნულია, რომ ტელეკომპანიამ საზოგადოებრივ-პოლიტიკური თოქ-შოუების გაშვება დროებით შეაჩერა. მიღებულ გადაწყვეტილებას, შედეგად ორი თოქ-შოუს ("რეაქცია", "იმედის კვირა") დახურვა მოჰყვა. აღნიშნულის მიზეზად განცხადებაში მოყვანილია ტელეკომპანიის სურვილი – "თვისობრივად ახალი სატელევიზიო პროდუქტის" შექმნის შესახებ.
"რეაქციისა" და "იმედის კვირის" პროდიუსერებისა და ჟურნალისტების ერთობლივი განცხადებით, 29 აგვისტომდე გადაწყვეტილების შესახებ შემოქმედებით ჯგუფს არცერთი შეტყობინება არ მიუღია, რაც მათი აზრით, საფუძვლიან ეჭვს აჩენს, რომ პოლიტიკური გადაწყვეტილება იქნა მიღებული.
საერთო მაუწყებლობა კანონმდებლობით განიმარტება როგორც არანაკლებ ორი თემატიკის, მათ შორის ახალი ამბებისა და საზოგადოებრივ-პოლიტიკური თემატიკის პროგრამებით მაუწყებლობა. "იმედი" საერთო მაუწყებელია, რაც მას ავალდებულებს, რომ საუკეთესო დროს განათავსოს საზოგადოებრივ-პოლიტიკური პროგრამები. ამ ვალდებულების დარღვევის შემთხვევაში, კომისია ტელეკომპანიას წერილობით გაფრთხილებას უგზავნის და გონივრულ ვადაში კანონმდებლობით განსაზღვრული ვალდებულებების შესრულების უზრუნველყოფას თხოვს. მოცემულ შემთხვევაში კომისიას ტელეკომპანიისთვის გაფრთხილება არ გაუგზავნია. ტელეკომპანიამ საკუთარ წერილზე კომისიის წერილობითი განმარტება მიიღო.
ფაქტ-მეტრი ტელეკომპანია "იმედზე" საზოგადოებრივ-პოლიტიკური გადაცემების აღდგენის საკითხს მომავალშიც მიუბრუნდება. ამ ეტაპზე კი ასკვნის, რომ ვახტანგ აბაშიძის განცხადება სიმართლეა.
გასულ კვირას ფაქტ-მეტრმა ნოდარ ხადურის განცხადებაც გადაამოწმა. ხადურის თქმით, ერთ მილიარდ ლარზე მეტი საგადასახადო ვალდებულება იქნა ჩამოწერილი.
2014 წლის 12 დეკემბერს ფინანსთა მინისტრის მიერ დადგენილი წესით, საგადასახადო კოდექსის 309-ე მუხლის 37-ე ნაწილის "ა" და "ბ" ქვეპუნქტები ამოქმედდა. აღნიშნული კანონის მეშვეობით საქართველოს ფინანსთა სამინისტრომ იმ პირებს, რომელთა დავალიანებებსაც ხანდაზმულობის ვადა გასული ჰქონდათ, სახელმწიფოს მიმართ არსებული საგადასახადო დავალიანებები ჩამოაწერა.
აღნიშნული საკანონმდებლო რეგულაციით, ორივე ქვეპუნქტის მეშვეობით, 10 000-ზე მეტ პირს საერთო ჯამში 1 მილიარდ ლარზე მეტი საგადასახადო ვალდებულება ჩამოეწერა.
ფაქტ-მეტრის დასკვნით, ნოდარ ხადურის განცხადება სიმართლეა.
FactCheck.ge მიზნად ისახავს საზოგადოებისათვის საინტერესო საკითხებზე პოლიტიკოსთა მიერ გაკეთებულ განცხადებებში ფაქტობრივი სიზუსტის, თუ უზუსტობების დადგენას. ფაქტ-მეტრის მიერ ფაქტის სიზუსტის შეფასების გრადაციებია: სიმართლე, მეტწილად სიმართლე, ნახევრად სიმართლე, მეტწილად მცდარი, მცდარი, ტყუილი.
