საგარეო საქმეთა მინისტრის გიორგი კვირიკაშვილის თქმით, "კარგი იქნებოდა, რომ ელჩი გეგეშიძე ყოფილიყო ვაშინგტონში პრეზიდენტის ვიზიტის განმავლობაში". მისივე ინფორმაციით ამაზე გადაწყვეტილება პრემიერმა მიიღო:
"ჩემი მინისტრად დანიშვნიდან რამდენიმე დღეში შეხვედრა მქონდა პრეზიდენტის მრჩეველთან თენგიზ ხმალაძესთან და მე მას შევთავაზე, რომ იქნებ მომხდარიყო ცალკე ვიზიტის დაგეგმვა პრეზიდენტის და ამ ვიზიტში მე მას მხარდაჭერა აღუთქვი. სამწუხაროდ, ეს ასე არ მოხდა და უკვე იმ მოცემულობაში როდესაც ეს ასე არ მოხდა ვთვლი, რომ კარგი იქნებოდა, რომ ელჩი გეგეშიძე ყოფილიყო ვაშინგტონში პრეზიდენტის ვიზიტის განმავლობაში. თუმცა გამომდინარე პრემიერის გრაფიკიდან, მთავრობის მეთაურთან კონსულტაციით მიღებული იქნა გადაწყვეტილება, რომ ელჩი დარჩენილიყო ნიუ-იორკში. ამაში უკანონობის დანახვაზე საუბარი გადამეტებულია. ამაში უკანონობა არაფერი არ ყოფილა", _ განაცხადა კვირიკაშვილმა ჟურნალისტებთან საუბრისას.
შეგხასენებთ, რომ გუშინ, საქართველოს პრეზიდენტმა რუსთავი ორის ეთერში ამ თემაზე ვრცლად ისაუბრა და საგარეო საქმეთა სამინისტროს ურჩია, დიპლომატიური ეტიკეტის დაცვა მოსთხოვოს უცხოეთში აკრედიტებული მისიების იმ წარმომადგენლებს, რომლებიც კანონმდებლობას არღვევენ.
პრეზიდენტის განცხადებაზე კომენტარი აშშ-ში საქართველოს ელჩმა არჩილ გეგეშიძემ "ინტერნპრესნიუსთან" საუბრისას გააკეთა და აღნიშნა, რომ კანონი არ დაურღვევია.
"მოხარული ვარ, რომ საქართველოს პრეზიდენტის ვიზიტმა ვაშინგტონში წარმატებით ჩაიარა. აქვე მინდა აღვნიშნო, რომ ვიზიტის მზადების პროცესში, ისევე როგორც მის განხორციელებაში, საქართველოს საელჩო ჩემი ხელმძღვანელობით აქტიურად იყო ჩართული. აღსანიშნავია, რომ ვიზიტის ბოლოს პრეზიდენტმა კმაყოფილება გამოხატა და მადლობა გადაუხადა საელჩოს თანამშრომლებს გაწეული ძალისხმევისთვის. ამავდროულად, მე გახლდით 25 სექტემბრიდან 2 ოქტომბრამდე ნიუ-იორკში ჩამოსული ოფიციალური დელეგაციის წევრი, რომელსაც საქართველოს პრემიერ-მინისტრი ხელმძღვანელობდა.
ამ ხნის განმავლობაში გაიმართა, როგორც უმაღლესი დონის სამიტები, ისე მრავალი შეხვედრა მაღალი რანგის ოფიციალურ პირებთან. ამ პერიოდში ნიუ იორკი მსოფლიო პოლიტიკის ერთგვარი ეპიცენტრს წარმოადგენს. აქ აშშ-ის აღმასრულებელი ხელისუფლება ლამის მთელი შემადგენლობით არის წარმოდგენილი. ოფიციალური დელეგაციის შემადგენლობაში მე მევალებოდა პრემიერ-მინისტრისა და საგარეო საქმეთა მინისტრის მონაწილეობით ხსენებულ ღონისძიებებში მონაწილეობა. განსაკუთრებით გავამახვილებ ყურადღებას ორმხრივ შეხვედრებზე, რომელიც გაიმართა აშშ-ის მხარესთან, ასევე იმ ქვეყნების საგარეო საქმეთა მინისტრებთან, რომელთა დიპლომატიური გადაფარვა ხდება აშშ-დან. და საერთოდაც, გაეროს გენერალური ასამბლეის პერიოდში აშშ-ში აკრედიტებული დიპკორპუსი, ჩემი კოლეგები, ნიუ იორკში არიან თავიანთი ქვეყნების ოფიციალური დელეგაციების ხელმძღვანელების გვერდით. ასე იყო ყველა ჩემი წინამორბედის შემთხვევაშიც. ეს მიღებული პრაქტიკაა, ვინაიდან ასე ითხოვს საქმე.
სამართლებრივი კუთხით თუ ვისაუბრებთ, მე ვმოქმედებდი საქართველოს კონსტიტუციის მიხედვით, რომელიც აცხადებს, რომ საქართველოს მთავრობა არის აღმასრულებელი ხელისუფლების უმაღლესი ორგანო, რომელიც ახორციელებს ქვეყნის საშინაო და საგარეო პოლიტიკას, ხოლო საქართველოს აღმასრულებელი ხელისუფლების მეთაური არის პრემიერ-მინისტრი, ასევე ვხელმძღვანელობდი საქართველოს კანონით დიპლომატიური სამსახურის შესახებ.
დამატებით აღვნიშნავ, რომ ელჩისა და დიპლომატიური წარმომადგენლობების უფლება-მოვალეობები დაწვრილებით არის განსაზღვრული საქართველოს მთავრობის დადგენილებაში "ოფიციალური შეხვედრების (ვიზიტების) განხორციელებისას გასატარებელი ღონისძიებების შესახებ" ასევე საგარეო საქმეთა მინისტრის ბრძანებაში "საზღვარგარეთ საქართველოს დიპლომატიური წარმომადგენლობების საქმიანობის წესისა და ტიპობრივი დებულების დამტკიცების შესახებ".
ვინაიდან არც კონსტიტუციაში და არც ხსენებულ კანონმდებლობაში არ წერია, როგორი უნდა იყოს ელჩის მოქმედება ისეთ არაორდინარულ ვითარებაში, როდესაც ადგილსამყოფელი ქვეყნის ორ სხვადასხვა ქალაქში ერთდროულად იმყოფება, ერთის მხრივ, ოფიციალური დელეგაცია პრემიერ-მინისტრის ხელმძღვანელობით და, მეორეს მხრივ, პრეზიდენტი სამუშაო ვიზიტით, ჩემი ნიუ-იორკში ყოფნა პრემიერ-მინისტრის დელეგაციის ვიზიტის ფარგლებში საქმიანობის გასაგრძელებლად არ ყოფილა კანონმდებლობით განსაზღვრული დიპლომატიური ეტიკეტის უგულებელყოფა და ვიზიტის საპროტოკოლო ნორმების დარღვევა"_ განაცხადა გეგეშიძემ.
