გაყიდული მიწის გამო დავამ, შესაძლოა, სასამართლო დარბაზში გადაინაცვლოს

აღნიშნული ჩიხის მცხოვრებლებმა გუბერნატორის მოადგილესთან შეხვედრაზე  იმასაც გაუსვეს ხაზი, რომ გამგეობასა და საკრებულოში შესულია მათი ერთობლივი წერილი, სანიაღვრე არხების გაკეთების მოთხოვნით. გაირკვა, აქაური მოსახლეობის ეს მოთხოვნა გათვალისწინებულია და მომავალი წლიდან იგეგმება სანიაღვრე არხის მოწყობა.

სანიაღვრე არხის გაკეთების იდეამ კიდევ უფრო დაამძიმე არსებული ვითარება:  "არხები რომ გავა გზის ორივე მხარეს, გამოდის, რომ ჩიხში შესასვლელი კიდევ უფრო დავიწროვდება", _ დამატებითი არგუმენტი მოიშველა მოსახლეობამ.

მოსმენილი არგუმენტებისა და ადგილის დათვალიერების შემდეგ, გია ებრალიძემ შეკრებილებს პირობა მისცა, რომ არსებული რეალობიდან გამომდინარე, მუშა ჯგუფი ყოველგვარი მიკერძოების გარეშე წარმოადგენს საბოლოო დასკვნას, თუმცა, იქვე ისიც განმარტა, რომ არანაირი კანონიერი ძალა მას არ ექნება და ის ძირეულ გავლენას ვერ იქონიებს საქმეზე: "ჩვენ საკითხს შევისწავლით, დასკვნასაც დავდებთ, თუმცა, სამართლებრივად ვერაფერს გადავწყვეტთ, სამართლებრივად უკვე არსებობს მესაკუთრე. შეგვიძლია, მხოლოდ ამკრძალავი ფორმები მივიღოთ, რომ არ მოხდეს ცაცხვის ხის მოჭრა. აქედანვე გარანტიას ვიძლევი, რომ ამ ხეს ვერავინ შეეხება.

პირდაპირ გირჩევთ, რომ თუკი თქვენსა და მესაკუთრეს შორის არსებობს დავის საგანი, მიმართოთ სასამართლოს. ამასთან, რახან მესაკუთრემ მიწის ფართი ეკონომიკის სამინისტროდან შეიძინა, ეს, თავისთავად, არ ნიშნავს იმას, რომ მან ყველა დანარჩენი უფლება მოიპოვა. რის გაკეთებას აპირებს აქ, აქვს თუ არა უფლება ადგილი შეუცვალოს კანალიზაციის, წყლისა და კავშირგაბმულობის გაყვანილობებს, ამის ნებართვები მან ცალკე უნდა მოიპოვოს და მოთხოვნის შემთხვევაში უნდა წარმოგიდგინოთ.

თქვენ შეგიძლიათ, აიყვანოთ კვალიფიციური ადვოკატი და სასამართლოში სარჩელის წარდგენისას დააყენოთ მოთხოვნა, რომ, სანამ სასამართლო გადაწყვეტილება არ იარსებებს, მანამ არ დაიწყოს ადგილზე მშენებლობა", _ ურჩია  გია ებრალიძემ ადგილობრივებს.

მოსახლეობის გარდა, მოგვიანებით ადგილზე მოვიდა  სადაო მიწის მესაკუთრის ვაჟი გიორგი იმნაძე, რომელიც, კონკრეტულ შემთხვევაში,  მესაკუთრის  პოზიციას წარმოადგენდა. იგი საკმაოდ მოკლე და ლაკონური პასუხით შემოიფარგლა და განგვიმარტა, რომ  წყალგაყვანილობის მილებს ადგილი მხოლოდ სათანადო ნებართვის მოპოვების შემდეგ შეუცვალეს. საერთოდაც, მისი თქმით, საქმიანობას კანონის სრული დაცვით აწარმოებენ  და ყველა საჭირო დოკუმენტაცია სრულ წესრიგში  აქვთ.

რაც შეეხება ეკონომიკის სამინისტროს, როგორც მათი კომენტარიდან ირკვევა, აღნიშნული ქონების პრივატიზების მიზნით, გახორციელებული ადმინისტრაციული წარმოების ფარგლებში, ქონების ეროვნულ სააგენტოში წარდგენილია გუბერნატორის ადმინისტრაციის დადებითი დასკვნა ნახსენები მიწის ფართის პრივატიზებასთან დაკავშირებით, თანაც "საჯარო რეესტრის ეროვნულ სააგენტოში რეგისტრირებული მონაცემის თანახმად, პრივატიზებული მიწის ნაკვეთის ფართობი შეადგენს 24 კვ.მეტრს და მდებარეობს შიდა საუბნო გზის (ჩიხის) მიმდებარედ და საერთოდ არ მოიცავს ამ უკანასკნელს (ჩიხს) ან/და მის ნაწილს".

მოსახლეობა ხაზგასმით აღნიშნავს, რომ ეკონომიკის სამინისტრო შეცდომაშია შეყვანილი, ამიტომაც მოხდა იმ მიწის ფართის პრივატიზება, რომელიც მათთვის სასიცოცხლოდ მნიშვნელოვანია და სადაო არაფერი აქვთ სამინისტროსთან: "ჩვენი ინფორმაციით, სამინისტროში  აღნიშნული ქონების პრივატიზების მიზნით, დადებითი დასკვნა გუბერნიამ წარადგინა, ამიტომაც ჩვენ დახმარებისთვის, სწორედ, გუბერნიას მივმართეთ. ყველა ღონეს ვიხმართ, რომ მიზანს მივაღწიოთ, საქმის კურსში ჩავაყენებთ, როგორც ეკონომიკის მინისტრს, ასევე, პრემიერ ღარიბაშვილსაც. რა თქმა უნდა, თუ საჭირო გახდა სასამართლოსაც მივმართავთ. მანამდე კი, სანამ კონკრეტულ გადაწყვეტილება არ მიიღება, ვითხოვთ არ დაიწყოს ადგილზე არანაირი მშენებლობა", _ ამბობს ადგილობრივი მოსახლეობა.