ბორჯღალოსნებმა 2015 წლის მსოფლიო თასის დასკვნით მატჩში ნამიბია უმძიმეს ბრძოლაში დაამარცხეს და ტურნირამდე დასახული ამოცანაც წარმატებით შეასრულეს – ორი თამაში მოიგეს და 2019 წლის მსოფლიო თასისკენ დიდი ნაბიჯი გადადგეს.
დიდი ალბათობით, ბორჯღალოსნები მესამე ადგილს აღარ დაკარგავენ და იაპონიის საგზურს 4 წლით ადრე მიიღებენ, მაგრამ ოფიციალურად, ეს 9 ოქტომბერს უნდა გაფორმდეს, როდესაც ახალი ზელანდია ტონგას ეთამაშება და ამ მატჩში ტონგელებმა ‘ოლ ბლექსთან’ 2 ქულის აღება ვერ უნდა მოახერხონ.
მატჩის მიმოხილვა
ორმა ჩაუთვლელმა ლელომ მატჩის პირველ ნახევარში ცოტა დაგვაბნია და ბევრი შეცდომა დავუშვით – ტექნიკური წუნი, რომლის გამოც ბურთი რამდენჯერმე დაიკარგა, მატჩის დებიუტში ლელოზე თამაში, გასატანი ჯარიმების უგულვებელყოფა და მეტოქისთვის სასარგებლოდ არეულ თამაშში აყოლა ჯარიმებზე აისახა. მიუხედავად იმისა, რომ თამაში საკმაოდ დაძაბული გამოდგა, ტაბლოზე საბოლოო ანგარიში მაინც ჩვენს სასარგებლოდ აისახა. ნამიბიამ კი, ბოლომდე იბრძოლა, მსოფლიო თასზე მონაწილეობის ისტორიაში პირველი მოგების გასაფორმებლად მაქსიმუმი გაიღო, მაგრამ ობიექტურად ძლიერ მეტოქესთან ღირსეულ ბრძოლაში დამარცხდა.
მოკლედ, ქართველებმა ერთი შეხედვით იოლად მოსაგებ მეტოქესთან, მაგრად ინერვიულეს. სანამ გუნდები მოედანზე გავიდოდნენ, იქ საქართველოს ნაკრების ბურჯი დავით ზირაქაშვილი გამოცხადდა და ეროვნულ გუნდს ოფიციალურად დაემშვიდობა – მან ბორჯღალოსნების კვართი 53 შეხვედრაში მოირგო, გულშემატკივარს უამრავი ლამაზი მომენტი და ლელო აჩუქა და თავიც ძლიერ შეაყვარა.
გვიან დასრულებული პირველი ტაიმი
თამაშში ბურთი ნამიბიამ შეიყვანა და არაფრისგან 3-ქულიანი ფორა მიიღო – კოტე მიქაუტაძემ მისი შემაგრება ვერ მოახერხა, ის წინ მდგომ გიორგი თხილაიშვილს შეეხო და თიენის კოცემ იოლი 3 ქულა აიღო. ქართველებს დაძაბულობა ეტყობოდათ და მცირედი შეცდომების ხარჯზე ნამიბია ქართველთა ნახევარზე დარჩა, მაგრამ არეკნი მიზანს მაგრად ასცდა. ამასობაში ქართველები აბურთავდნენ, უკანა ხაზი აამოქმედეს და აფრიკელთა კაპიტანმა, წამყვანმა მორაგბე ჟაკ ბერგერმა მერაბ შარიქაძე კი შებოჭა, მაგრამ დაშავდა და შესაცვლელი გახდა.
ქართველები მეტოქეს ჯამში ჯობდნენ, მოლს კარგად უჩერებდნენ, შერკინებაში მძლავრობდნენ, ბურთის გატანა რომ გაუჭირდათ ლაშა მალაღურაძემ ტინუს დიუ პლესს ბურთი ხელიდან ამოუგდო, იერიში გიორგი ნემსაძემ და მამუკა გორგოძემ გააგრძელეს და ლელოში სანდრო თოდუა შეიჭრა, მაგრამ ტელე-რეფერიმ მალაღურაძეს ბურთი წინ გადაუვარდაო და მონაგარი არ ჩათვალა. ქართველთა სათამაშო უპირატესობის ფონზე, მე-17 წუთზე ნამიბიამ კიდევ ერთი ჯარიმა გაიტანა და 6:0.
ამას კვლავ ბორჯღალოსანთა იერიშები მოყვა. 24-ე წუთზე თაზო მჭედლიძის დაწყებული იერიში კარგად გაიშალა და დავით კაჭარავას ლელომდე სულ ცოტა დააკლდა. ნამიბიელები ფეხით ქართველებზე უკეთ თამაშობდნენ და ჩახურვაზეც კარგად ადიოდნენ, რის გამოც ქართველებს საკუთარ ნახევარზე დაბრუნება აიძულეს და მერე რეფერიმ ჯაბა ბრეგვაძის გასინბინება მოითხოვა – ბურთის წამოღებისას მეტოქეს იდაყვი სახეში უთავაზა. მიუხედავად ამისა, 14-მა ქართველმა იქით შეუტია მეტოქეს, ჯარიმა კარში არ დაარტყა და მოლით ლელოში შევიდა , თუმცა ქულა ისევ არ ჩაგვითვალეს და მხოლოდ 5-მეტრა შერკინებას დავჯერდით.
მეტოქე რომ დაჯარიმდა დავით ზირაქაშვილმა ბურთი გაათამაშა და რამდენიმე დარტყმის შემდეგ ლელოს გაიტანდა, მაგრამ ის ერთბაშად ორმა მეტოქემ ყელში შებოჭა, რისთვისაც ბურჯი რაულ ლარსონი სინბინით დაისაჯა. ნამიბია შერკინებაში ქართველებს ვერ უძლებდა, ზედიზედ სამი ჯარიმის შემდეგ, წესით საჯარიმო ლელო ინიშნება, მაგრამ ამის ნაცვლად სათადარიგო ბურჯი იოჰანეს კუცია გაასინბინა. შედეგად, შერკინებაში მიწოლა აიკრძალა, ბორჯღალოსნებმა ეს უპირატესობა დაკარგეს და გორგოძემ ვიტო კოლელიშვილს ლელო კი გაატანინა, მაგრამ წინპასი გათამაშდა და ტაიმი მე-10 დამატებულ წუთზე დასრულდა.
მატჩის მეორე ნახევარი
ბორჯღალოსნების ლელო 50-ე წუთზე მაინც გავიდა. დერეფნიდან წითელ ზოლში რამდენიმე დარტყმის შემდეგ, გორგოძე ვეღარავინ შეაჩერა და მერაბ კვირიკაშვილმა გარდასახვით საქართველო პირველად დააწინაურა. მეორე ლელოც გავიდა. კარში დასარტყმელი ჯარიმა ისევ აუტში გაიგზავნა, დერეფნის მოგების შემდეგ თხილაიშვილმა კარგად შეუტია და მალაღურაძეს ბურთი ამოუგდო, მანაც ხაზი მარტივად გაჭრა და კვირიკაშვილმა გარდასახა. გარისკვად აღარ ღირდა და 65-ე წუთზე მეკომ ჯარიმა უკვე კარში დაარტყა- 6:17.
დასკვნითი წუთები ნამიბიის იყო, რომელმაც ჯერ ჯარიმით შეამცირა ჩამორჩენა, მერე ქართველები არეულ თამაშში აიყოლია და ფეხით გადაკიდებების შედეგად კოცე ლელოს მიწვდა და რთული პოზიციიდან გარდასახვაც შეასრულა. 17:16 და სათამაშო კიდევ 5 წუთი რჩებოდა, მაგრამ ბორჯღალოსნებმა უჯარიმოდ გაძლეს, მერე მეტოქის ნახევარზე გადავიდნენ, მოლით სამაგალითოდ ამ მატჩში მეორედ 30 მეტრი იარეს და რადგან ჯარიმის უპირატესობა ჰქონდათ, მალაღურაძემ არეკნი სცადა. მან ვერ გაიტანა, რეფერის უპირატესობა დაავიწყდა და კიდევ კარგი, რომ ნამიბიელებმა შეტევის წამოწყება ვეღარ შეძლეს. მატჩი დათქმულ დროს დასრულდა და ასეთ მძიმე ბრძოლაში ქართველებმა იმარჯვეს – 17:16.
მატჩის შემდგომი პრეს-კონფერენცია
მილტონ ჰეიგი: “ჩვენ დღეს ქართული რაგბის ისტორიის შექმნა მოვახერხეთ. ამ შემთხვევაში მნიშვნელობა არ აქვს 1ქულით დაამარცხებ ოპონენტს თუ 20ით. ამჟამად ჯგუფში იმ ადგილზე ვართ, რასაც ველოდით და თუპოზიცია ხვალ საღამომდე შევინარჩუნეთ ავტომატურ კვალიფიკაციასაც მოვიპოვებთ, რაც თავის მხრივ უამრავ მორიგ შესაძლებლობას გვპირდება. “რაც შეეხება დღევანდელ მატჩს ერთ-ერთი ყველაზე ცუდი და ბინძური თამაში იყო, თუმცა მოგებამოვახერხეთ და ამით ვამაყობ.”
შალვა მამუკაშვილი: „საქართველო მსოფლიოში შერკინებითაა ცნობილი, ნამიბიის წინააღმდეგაც სწორედ ამ იარაღსვიყენებდით, თუმცა ჯარიმები ავიღეთ. ასეთი მატჩები მხოლოდ შედეგზეა ორიენტირებული და არაკარგი რაგბის თამაშზე.”
დავით კაჭარავა: “ჩვენს ისტორიაში ეს პირველი შემთხვევაა, როცა მორიგი მსოფლიო თასისთვის უკვე გავლილი გვაქვსსაკვალიფიკაციო ეტაპი. ახლა უკვე 2019 წლის მსოფლიოსთვის მომზადებაზე უნდა გადავეწყოთ.”
მიხეილ ნარიაშვილი: “ეს მატჩი ჩვენი საუკეთესო წარმოდგენა ნამდვილად არ ყოფილა, მაგრამ ვფიქრობ აღნიშვნის ღირსიმაინც არის და დღეს ექსეტერში აუცილებლად ვიზეიმებთ მიზნის მიღწევას. წინ ბევრი სამუშაო დაახალი მიზნებია.”
მერაბ შარიქაძე: “მართალია უკეთესადაც შეგვეძლო თამაში მაგრამ მოგება მოგებაა და დღეს ყველანი ბედნიერები ვართ.ყველაფერი კარგია, რაც კარგად სრულდება და გუშინდელი მატჩი ჩვენთვის სასიკეთოდ დასრულდა. “
ლევან დათუნაშვილი: “ჩვენთვის ეს მატჩი სხვა მხრივაც ემოციური იყო, რადგანაც დავით ზირაქაშვილი გუშინ მისუკანასკნელ მატჩზე გამოდიოდა. ჩვენ 16 წელია ერთ გუნდში ვთამაშობთ და ემოციების შეკავებაძალიან რთული იყო.
რაც შეეხება მატჩს, ეს თამაში ბევრად დიდი სხვაობით დასრულდებოდა რომ არა ჩვენი დიდიშეცდომები და ბევრი ჯარიმა. არც დერეფნებში ვბრწყინავდით, მაგრამ შერკინება და მოლი მართლაცსაუკეთესო იყო.
მიუხედავად იმისა, რომ აქამდე რამდენჯერმე განვაცხადე, რომ ეს ჩემი ბოლო სანაკრებო მატჩი იყო,შესაძლოა გადაწყვეტილება შევიცვალო, რადგანაც დღეს სამწვრთნელო შტაბმა გუნდში დარჩენა კიდევცოტა ხნით მთხოვა. ალბათ ტესტ მატჩებზე შევუერთდები საქართველოს ნაკრებს, თუმცა მსოფლიოთასი ნამდვილად ბოლოა. “
დავით ზირაქაშვილი: “ქართულ რაგბს ნამდვილად ყავს ჩემს პოზიციაზე მოთამაშე ბევრი კარგი კანდიდატი, რომლებიც ჩემსადგილს დაიკავებენ. რა თქმა უნდა, ეს ფაქტი ჩემთვის სევდისმომგვრელია, მაგრამ ადრე თუ გვიანყველაფერი მთავრდება. ამ გადაწყვეტილებაზე დიდხანს ვფიქრობდი, და გადაწყვეტა იოლი არ იყო,მაგრამ რაგბის გარდა არსებობს სხვა ცხოვრებაც, სადაც მყავს ოჯახი, რომელსაც ვჭირდები.”
