ჩოხატაურის მუნიციპალიტეტის დელეგაცია ვიზიტით ლიტვის ქალაქ პასვალისში იმყოფებოდა, სადაც ყოველწლიური ფესტივალი _ "შემოდგომის პასვალისი" გაიმართა. დელეგაციის შემადგენლობაში შედიოდნენ მუნიციპალიტეტის საკრებულოს თავმჯდომარე ზაალ მამალაძე, საკრებულოს სამანდატო, საპროცედურო საკითხთა და ეთიკის კომისიის თავმჯდომარე მარინე ბერაძე, მუნიციპალიტეტის გამგეობის ადმინისტრაციული სამსახურის უფროსი თეა უჯმაჯურიძე, საკრებულოს აპარატის სპეციალისტი ნაზი ბერძენიშვილი და ფოლკლორული ანსამბლი "ამაღლება".
საზეიმო ღონისძიებებში ჩოხატაურის მუნიციპალიტეტის დელეგაციასთან ერთად მონაწილეობდნენ გერმანიის, ნორვეგიის, ლატვიის პასვალისთან დამეგობრებული ქალაქების ოფიციალური დელეგაციები. ჩოხატაურის მუნიციპალიტეტის დელეგაციას შეხვედრები ჰქონდა, როგორც მასპინძელი ქალაქის ოფიციალურ პირებთან _ ქალაქის მერთან, განათლების სფეროს ხელმძღვანელთან, ასევე, სტუმარი ქალაქების დელეგაციების ხელმძღვანელებთან. განიხილეს სხვადასხვა მიმართულებით ურთიერთთანამშრომლობის პერსპექტივები და სამომავლო გეგმები. ნორვეგიის დელეგაციამ ჩოხატაურთან დამეგობრების სურვილი გამოთქვა. ისინი ელოდებიან მოწვევას, რათა ჩამოვიდნენ და ადგილზე გაეცნონ ჩვენს მუნიციპალიტეტს, განახორციელონ სხვადასხვა პროექტი ჯანდაცვის, ინფრასტრუქტურისა და განათლების ხაზით.
ფოლკლორული ანსამბლი "ამაღლება", რომელიც უკვე მეორე წელია წარმატებით მონაწილეობს ამ ფესტივალში, კვლავ ფავორიტი იყო. გარდა ფესტივლით გათვალისწინებული პროგრამისა, "ამაღლებამ" ათამდე კონცერტი გამართა სხვადასხვა დაწესებულებებში: სკოლებში, ბაღებში, დღის ცენტრში, ხანდაზმულთა სახლში და ა. შ. რითაც ხელი შეეწყო ქართული კულტურის პოპულარიზაციას და ლიტვაში ჩოხატაურის მუნიციპალიტეტის ცნობადობის ამაღლებას.
