ერთი წლის წინ, ლანჩხუთის მუნიციპალიტეტის სოფელ სუფსაში, ხალვაშების ოჯახმა ხულოს მუნიციპალიტეტის სოფელ ხიხაძირში მცხოვრები, მარტოხელა, 86 წლის ბიცოლა ესმა ხალვაში შეიკედლა, რომელიც სოციალურად დაუცველის სტატუსს ატარებდა. თუმცა, მოხუც ქალბატონს, ლანჩხუთში ჩამოყვანიდან რამდენიმე თვეში სოციალურად დაუცველის სტატუსი შეუჩერდა.
მხოლოდ პენსია კი არ აღმოჩნდა საკმარისი უმწეო ქალბატონისთვის ყოველდღიურად საჭირო ჰიგიენური საშუალებებისა და მედიკამენტების შესაძენად.
"ხულოში მარტო ცხოვრობდა, არც შვილი ჰყავს და არც ვინმე ახლობელი ჩვენ გარდა, რომ მიხედოს. პენსია კი აქვს, მაგრამ ის მარტო პამპერსის საყიდლად ძლივს ყოფნის. არადა, 86 წლის ქალია, სიარული მას არ შეუძლია და არაფერი. ათასნაირი წამალი სჭირდება. სანამ ჩვენთან წამოვიყვანდით, სოციალური დახმარება ჰქონდა დანიშნული, თუმცა, ჩამოყვანიდან ორ-სამ თვეში მოუხსნეს.
ზოგმა მითხრა, ლანჩხუთში სოციალური სააგენტოს წარმომადგენლობას უნდა მიმართოო, ზოგი კი მეუბნება აზრი არ აქვს, რახან შენი ოჯახის წევრი დასაქმებულია, დახმარებას მარტო მოხუცს არავინ მისცემსო. კი, ნამდვილად მუშაობს ჩემი მეუღლე და არც მაქვს რაიმე პრეტენზია, რომ სოციალური დახმარება დაგვინიშნონ ოჯახს. თუმცა, ისიც სათქმელია, რომ დღეს ყველას უჭირს თავის გატანა, დიდად დალხინებულად არც ჩვენ ვცხოვრობთ, მარტო მეუღლის ხელფასი რაში უნდა გვეყოს?!
შეგვეცოდა, მთლად უპატრონოდ ხომ ვერ დავტოვებდით მოხუცს?! ბოლოს ჩვენც ხომ უნდა დავბერდეთ?! ავდექით და ჩვენთან წამოვიყვანეთ მთლად დაუძლურებული. იმედი მქონდა, რახან სოციალური დახმარება ჰქონდა, პენსიასთან ერთად საკმარისი იქნებოდა, რომ მისთვის წამლები და პამპერსი გვეყიდა. ახლა მარტო პენსიის იმედად ვართ, რაც ნამდვილად არაა სამყოფი.
მითხრეს, ხულოში, მის სახლში რომ წახვიდე და იქ მოუარო, 400 ლარს მოგცემენო. ოჯახს ნამდვილად ვერ მივატოვებ, არ მინდა არავის 400 ლარი, თუ შესაძლებელია, რაც ჰქონდა ის მისცენ აქ, რომ პამპერსის და წამლის ყიდვა შევიძლო ნორმალურად, მეტს არაფერს ვითხოვ", _ ამბობს ოჯახის დიასახლისი.
სოციალური სააგენტოს ლანჩხუთის სამსახურის ხელმძღვანელის, მაკა გოგიჩაიშვილის თქმით, ხალვაშების ოჯახმა პირველ რიგში განცხადებით უნდა მიმართოს ლანჩხუთში სოციალურ სააგენტოს.
"თავისთავად, როცა სოციალურად დაუცველი სტატუსის მქონე ადამიანი იცვლის საცხოვრებელ მისამართს, მას დახმარება უჩერდება. ამიტომაც ხალვაშების ოჯახმა განცხადებით უნდა მოგვმართოს ჩვენ, სოცაგენტი გადაამოწმებს. წინასწარ იმის თქმა, რა იქნება, მიიღებს თუ არა სოციალურ დახმარებას ოჯახი, არ შემიძლია. მინიჭებული სარეიტინგო ქულების მიხედვით მოხდება სტატუსის განსაზღვრა", _ განგვიცხადა გოგიჩაიშვილმა.
