დღეს ოზურგეთის დემოკრატიული ჩართულობის ცენტრში გაიმართა საქართველოში მცხოვრებ ყოფილ და პოტენციურ მიგრანტთა საგანმანათლებლო და ბიზნეს საქმიანობების ხელშემწყობი პროექტის პრეზენტაცია.
პროექტის მიზანია საქართველოდან მიგრაციის შემცირების ხელშეწყობა, პოტენციურ და დაბრუნებულ მიგრანტთათვის საარსებო წყაროს შექმნის ეფექტური სტრატეგიების შემუშავება. პროექტის სამიზნე არეალია გურიის რეგიონის სამივე მუნიციპალიტეტი და აჭარის რეგიონის ქობულეთის მუნიციპალიტეტი.
პროექტი ორი მიმართულებით იმუშავებს- პოტენციურ და დაბრუნებულ მიგრანტთა გაძლიერება გურიისა და აჭარის რეგიონებში მათთვის ეფექტური საგანმანათლებლო, პროფესიული და ბიზნეს შესაძლებლობების უზრუნველყოფით. სექტორთაშორის თანამშრომლობის გაძლიერება მიგრაციის მართვის სისტემის შექმნისა და ამუშავების მიზნით.
შეხვედრას ადგილობრივი ხელისუფლების წარმომადგენლები, მედიის და არასამთავრობო ორგანიზაციის წევრები ესწრებოდნენ.
გურიის გუბერნატორის მოადგილე სოსო ერქომაიშვილი ხალხის დასაქმებას სოფლის მეურნეობის აღორძინებაში ხედავს. ის გამოვიდა ინიციატივით, რომ 11-12 კლასელებისთვის შეიქმნას სპეციალური პროგრამა, რომელიც სოფლის მეურნეობის პოპულარიზაციას შეუწყობს ხელს.
" სოფლის მეურნეობის დარგის განვითარება- პოპულარიზაციას საფუძველი უნდა ჩაეყაროს სკოლიდან. თუ არასამთავრობო ორგანიზაციები ამის პოპულარიზაციაში დაეხმარება სახელმწიფოს, ძალიან კარგია იქნება. 11-12 კლასელებმა უნდა გაიგონ, რომ არის სოფლის მეურნეობის დარგი. ნებისმიერი ევროპული ქვეყანა დაფუძნებული და აშენებული არის სოფლის მეურნეობაზე. "_თქვა სოსო ერქომაიშვილმა.
ოზურგეთის მუნიციპალიტეტის საკრებულოს თავმჯდომარის მოადგილე დიმიტრი კვერღელიძე შემდეგი ინიციატივით გამოვიდა:
"ხელისუფლების მთავარი პოლიტიკა არის ის, რომ პირველ რიგში ბიზნესი გავათავისფულოთ ყველა ჩარევისა და წნეხისგან. ეს უკვე გააკეთა "ქართულმა ოცნებამ" და ახლა უნდა გადავიდეთ მეორე ეტაპზე, რასაც ქვია ბიზნესის ხელშეწყობა. მე ვთვლი, რომ ყველაზე კარგი იქნება და ჩვენ ამაზე ვმუშაობთ, დავიწყოთ მიკრო-სესხების გაცემა მუნიციპალიტეტის სახსრებიდან, რა თქმა უნდა, ბანკთან თანამშრომლობით. ამით წავახალისებთ ყველა ადამიანს, ვისაც ექნება იდეა და ამით ექნებათ ადამიანებს შანსი, დაბრუნდნენ თავიანთ რეგიონებში"._ ამბობს კვერღელიძე.
მანვე გაიხსნება "ნაცმოძრაობის" ხელისუფლების დრო, როდესაც დასაქმების სამინისტრო შეიქმნა.
"ნაცმოძრაობის" მმართველობის დროს შეიქმნა დასაქმების სამინისტრო და ეს იყო მხოლოდ პიარისთვის. ყველას კარგად მოგეხსენებათ, როგორ დაასაქმა ხალხი დასაქმების სამინისტრომ. დასაქმების სამინისტრო ვერ ქმნის სამუშაოს, სამუშაო ადგილებს ქმნის ბიზნესი. აქედან გამომდინარე, სახელმწიფომ ხელი უნდა შეუწყოს ბიზნესს. ბიზნესის კერა სადაც გაჩნდება იქ უნდა იყოს გაზი, წყალი, გზა და ეს არის სახელმწიფოს მთავარი ფუნქცია"_ თქვა შეხვედრაზე დიმიტრი კვერღელიძემ.
პროექტს ახორციელებს გურიის ახალგაზრდული რესურსცენტრი ევროკავშირის ფინანსური მხარდაჭერით, სახალხო უნივერსიტეტთა გერმანული ასოციაციის (DVV International) საქართველოს ოფისთან და ოზურგეთის ახალგაზრდა მეცნიერთა კლუბთან პარტნიორობით.
