ქუთაისის სააპელაციო სასამართლოს სისხლის სამართლის საქმეთა კოლეგია ხვალ, 11:00 საათზე, პოლიციელების ცემაში მსჯავრდებული პირების განაჩენს გამოაცხადებს.
სააპელაციო სასამართლოში საქმის განხილვა დღეს დასრულდა, მოსამართლეთა გადაწყვეტილებით კი, განაჩენი ხვალ გამოცხადდება, რასაც ადვოკატები საეჭვო გარემოებად მიიჩნევენ. მათი განცხადებით, განაჩენი ისე დადგება, რომ მოსამართლეები საქმის მტკიცებულებების გაცნობას ვერც მოასწრებენ.
შეგახსენებთ, რომ საქმე ეხება 2014 წლის 16 ოქტომბერს, მარტვილის რაიონის სოფელ ბანძაში მომხდარ შემთხვევას, რა დროსაც, პოლიციის შენობიდან ხელბორკილებდადებული ბრალდებული თემურ გაბუნია გაიქცა. გამოძიების მტკიცებით, დაკავებულმა გაქცევა ნათესავების დახმარებით მოახერხა, რომლებიც განყოფილებაში მივიდნენ, პოლიციის თანამშრომლებს თავს დაესხნენ და მათ როგორც სიტყვიერი, ასევე ფიზიკური შეურაცხყოფა მიაყენეს. თუმცა, განსხვავებულ ვერსიაზე საუბრობენ თავად მსჯავრდებული პირები. მათი თქმით, პოლიციელები ალკოჰოლური ზემოქმედების ქვეშ იმყოფებოდნენ და შეურაცხყოფა იქეთ მიაყენეს.
საქმეზე ბრალი 7 პირის წაუყენეს, აქედან ორი ქალია. პირველი ინსტაციის სასამართლომ, ზუგდიდში, 5 პირს (ბოჩია ასაბაშვილს, ვაგნერ წულაიას, შალვა პატარაიას, გოგიტა კეკელიას და ცოტნე გაბუნიას) პატიმრობა, ბრალდებულ ქალბატონებს – მაია და ინეზა კეკელიებს კი, 3-3 ათას ლარიანი გირაო შეუფარდა.
თუმცა, მსჯავრდებულმა პირებმა და მათმა ადვოკატებმა ზუგდიდის რაიონული სასამართლოს მოსამართლის, ნატრული აკობიას მიერ, 2015 წლის 9 ივნისს გამოტანილი განაჩენი ქუთაისის სააპელაციო სასამართლოში გაასაჩივრეს. საქმის განხილვა დღეს დასრულდა.
ადვოკატი ტარიელ კაკაბაძე, რომელიც საქმეში ახლახანს ჩაერთო აღნიშნავს, რომ თუ სასამართლო ობიექტურად და კრიტიკულად განიხილავს ბრალდებისა და დაცვის მხარის მტკიცებულებებს, გამამართლებელი განაჩენი უნდა დადგეს.
„სააპელაციო სასამართლოში დაცვის მხარემ მაქსიმალურად დავასაბუთეთ აღნიშნული განაჩენის უკანონობა ევროპული სასამართლოს პრეცედენტებით. აღნიშნული მოწმეები, რომლებიც ბრალდების მხარემ წარმოადგინა პირველი ინსტანციის სასამართლოში, არიან ცრუ მოწმეები, რის გამოც, დაცვის მხარის ჩვენებებს უპირატესობა უნდა მიეცეთ. განსაკუთრებით კი იმიტომ, რომ ჩვენი მოწმეები არიან არაპოლიციელი მოწმეები, ობიექტური თვითმხილველები და უფრო კომპეტეტურები, რომ დაეხმარონ მართლმსაჯულებას სიმართლის დადგენაში. პირველი ინსტანციის სასამართლოს განაჩენიდანაც ჩანს, რადგან პოლიციელ მოწმეთა ჩვენებები cope-paste-ით არის გადმოტანილი, რომელიც ერთმა გამომძიებელმა შეადგინა კანონდარღვევით. ყველა ცრუ მოწმე პოლიციელია. დაცვის მხარეს არ მიეცა პირველი ინსტანციის სასამართლოში ჩაეტარებინა კრიტიკული დაკითხვა. მოსამართლემ თანაბარ პირობებში არ ჩააყენა მხარეები და საბოლოოდ უკანონო გადაწყვეტილება გამოიტანა“, _ აღნიშნავს კაკაბაძე „გურია ნიუსთან“ საუბრისას.
მისივე თქმით, „მხოლოდ იმ შემთხვევაშია სააპელაციო სასამართლოს მიერ განაჩენის შეცვლა ან შემსუბუქება მოსალოდნელი, თუ სასამართლო ობიექტურად განიხილავს აღნიშნულ სისხლის სამართლის საქმეს, კრიტიკულად, ჩაძიებით, მაქსიმალურად ობიექტური ანალიზით განიხილავს ბრალდების და დაცვის მხარის მტკიცებულებებს“.
როგორც ადვოკატი აღნიშნავს, დღეს დასრულებული საქმის განხილვის შემდეგ განაჩენის გამოცხადება მეორე დღესვე, მიანიშნებს იმაზე, რომ სავარაუდოდ, სასამართლო არ აპირებს მაინცდამაინც ჩაძიებას, ფიქრს და მსჯელობას.
„დღევანდელი პროცესიდან დადგინდა, რომ მოსამართლეებს მოსმენილიც კი არ ჰქონდათ სხდომის ოქმები. ამას ვამბობთ იქედან გამომდინარე, რომ როდესაც მსჯავრდებული მაია კეკელია საუბრობდა სხდომის ოქმებთან დაკავშირებით, მოსამართლე ეკითხებოდა, რომელ სხდომის ოქმებს გულისხმობდა ის. არა მგონია, სახლში რომ მივლენ ეს მოსამართლეები სხდომის ოქმების მოსმენა დაიწყონ, რომელიც რამდენიმე თვის განმავლობაში იწერებოდა. ნაკლებად სავარაუდოა ისიც, რომ მოსამართლეებმა საქმე ერთ ღამეში შეისწავლონ. თუ მონასმენი არა აქვთ სხდომის ოქმები და დილით განაჩენის გამოცხადებას აპირებენ, ეს იმას ნიშნავს, რომ საქმის შესწავლის გარეშე აპირებენ მიიღონ საბოლოო გადაწყვეტილება, რაც რეალურად დაუშვებელია.
არ მინდა, წინასწარ გავაკეთო ცუდი პროგნოზი, მაგრამ ეს იმას ნიშნავს, რომ სასამართლომ ხვალ cope-paste-ით, ანუ პირველი ინსტანციის უკანონო განაჩენს ძალაში დატოვებს. თუ ეს ასე მოხდება, ჩვენ უზენაეს სასამართლოში გავასაჩივრებთ ამ გადაწყვეტილებას და აუცილებლად მივაღწევთ სიმართლეს“, _ აღნიშნა „გურია ნიუსთან“ საუბრისას კაკაბაძემ.
ამავე თემაზე:
როგორ გაიქცა დაკავებული – ნასვამი პოლიციელების წინდაუხედაობით თუ ნათესავების "ამბოხით"
პატრულის ცემისთვის ქალბატონებს მოსამართლემ განაჩენი გამოუტანა (ვიდეო)
"ადამიანის უფლებათა ცენტრი" სამართალდამცველთა მიერ ჩადენილი დანაშაულების დროულგამოძიებას ითხოვს
პოლიციელების ცემაში ბრალდებული ქალის ღია წერილი
"შვიდ ადამიანს შვიდი წლით თავისუფლების აღკვეთისთვის გვწირავენ"
