სამშაბათს ლანჩხუთის მუნიციპალიტეტის საკრებულოს ბიუროს მორიგი სხდომა გაიმართა, რომელიც რვა ძირითადი და ერთი დამატებითი საკითხით განისაზღვრა. თავდაპირველად საკრებულოს თავმჯდომარემ დაანონსა, რომ საკრებულოს მორიგი სხდომა 27 ნოემბერს, 11 საათზე გაიმართება და სწორედ ბიუროს სხდომაზე მოხდა იქ განსახილველი საკითხების ვიზირება.
ბიუროზე განიხილეს მუნიციპალიტეტის როგორც გამგეობის, ასევე საკრებულოს აპარატის თანამდებობის პირთა და სხვა მოსამსახურეთა საშტატო ნუსხისა და თანამდებობრივი სარგოს ოდენობის დამტკიცების შესახებ დადგენილებებში ცვლილებების საკითხი. კერძოდ,
გამგეობაში სამი საშტატო ერთეულის დამატება იგეგმება – ორი მძღოლისა და გამგებლის პირადი მძღოლის, ხოლო საკრებულოში ორი პირადი მდივნის, ერთი მძღოლისა და დამლაგებლების. საქმე ისაა, რომ გარკვეული ხნის წინ ეს ადამიანები ამოიღეს საშტატო ნუსხიდან და სხვადასხვა ა(ა) იპ-ებში გადაანაწილეს. ახლა კი ისევ უკან დააბრუნეს.
ბიურომ განიხილა მუნიციპალიტეტის ადმინისტრაციული ერთეულების შექმნისა და მათი საზღვრების დადგენის შესახებ 2014 წელს მიღებულ დადგენილებაში და მუნიციპალიტეტის 2015 წლის ბიუჯეტში ცვლილებების საკითხები.
ასევე ორ საკითხზე – მუნიციპალიტეტის ტერიტორიაზე ქუჩების, მოედნების, პარკების, სხვა გეოგრაფიული ობიექტების სახელდებისა და ქუჩების, მოედნების, შესახვევების, ჩიხების, მრავალბინიანი სახლების სადარბაზოების და კერძო მფლობელობაში არსებული მიწის ნაკვეთების ნუმერაციის წესის დამტკიცებისა და მუნიციპალიტეტის ბიუჯეტის დაფინანსებით მოქმედი კერძო სამართლის იურიდიული პირების საქმიანობასთან დაკავშირებული ინფორმაციის გამოქვეყნების წესის დამტკიცების შესახებ საკითხებზე, დაიწყო ადმინისტრაციული წარმოება და ზემოთ მოყვანილ საკითხებთან ერთად ეს საკითხები მოხვდება საკრებულოს სხდომის დღის წესრიგში.
ამავდროულად ბიუროს წევრებმა მოისმინეს და ცნობად მიიღეს თითოეული საკრებულოს წევრის მიერ ამომრჩევლებისათვის გაწეული მუშაობის ანგარიშები და მიმდინარე წლის ბიუჯეტის შესრულების შესახებ გაჟღერებული ინფორმაცია.
რაც შეეხება საკმაოდ მტკივნეულ მიმდინარე წლის ბიუჯეტის პარამეტრებს, გამგეობის საფინანსო და მუნიციპალური შესყიდვების სამსახურის უფროსის, როლანდ ლაშხიას ინფორმაციით, ამ ეტაპზე ბიუჯეტის მთლიანი შემოსულობების გეგმა 86,6% – ს შეადგენს, ხოლო ადგილობრივი შემოსულობები 70% – ია მათ შორის.
"ფაქტობრივად ყველა დიდმა გადამხდელმა, მათ შორის "საქართველოს რკინიგზამ" და "საქართველოს გაზისა და ნავთობის კორპორაციამ" , ლანჩხუთის ბიუჯეტში შემოსატანი ვალდებულებები დაფარეს. ამ და სხვა თანხების ერთობლიობამ ნოემბერში 400 ათასი ლარი შეადგინა. ველოდებით არასასოფლო დანიშნულების მიწის ნაკვეთების პრივატიზებიდან გარკვეულ თანხებს. რაც შეეხება მიზნობრივ ტრანსფერს, დეკემბერში მთავრობა ნარჩენ თანხას, 250 ათას ლარს ჩამოგვირიცხავს. ამას დაემატება ნოემბერ – დეკემბრის თვის ჯარიმები და სხვა შემოსულობები. დაახლოებით 150 ათას ლარამდე შიდა მონაცვლეობით მიღებულ ეკონომიასაც თუ გავითვალისწინებთ, არსებულ ვალდებულებებს წელს გავასწორებთ" -ლაშხიამ ოპტიმისტური პროგნოზი გააკეთა.
თუმცა, თუ გავითვალისწინებთ,რომ მიზეზთა გამო მთლიანად ჩავარდა ბუნებრივი რესურსების სარგებლობის მუხლიდან მისაღები შემოსავლები( 289 ათასი ლარი) და ვერც დაანონსებული ყოფილი "სოფტექნიკის" მიწის პრივატიზება მოხერხდა, ბიუჯეტის შესრულება და თანამშრომელთა ხელფასების დაკმაყოფილება, მართლაც საშური საქმე იქნება მუნიციპალიტეტისათვის.
