მოქალაქეებისათვის ქონების იძულებით ჩამორთმევისა და კერძო საკუთრების ხელყოფის ფაქტზე მთავარმა პროკურატურამ კიდევ ერთი საქმე გახსნა, რის საფუძველზეც ყოფილი მაღალჩინოსნები, საქართველოს ყოფილი გენერალური პროკურორი ზურაბ ადეიშვილი და სახელმწიფო უშიშროების ყოფილი მინისტრი ვანო მერაბიშვილი პასუხისგებაში მიეცნენ. თუმცა, "ადეიშვილ-მერაბიშვილის დანაშაულებრივი სქემის" მიხედვით მოქმედი პროკურორებისთვის ბრალი ჯერჯერობით არ წაუყენებიათ, რასაც არასამთავრობო ორგანიზაციების წარმომადგენელთა ნაწილისთვის კითხვის ნიშნებს აჩენს.
ყოფილი მაღალჩინოსნების ახალი ბრალი
საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტის მიერ, ზურაბ ადეიშვილი და ივანე მერაბიშვილი სისხლის სამართლის პასუხისგებაში გუშინ მიეცნენ.
გამოძიების მასალების მიხედვით, "2004 წელს სისტემური დანაშაული მოხდა, რომელშიც ერთობლივად და წინასწარ შეთანხმებული სქემით, მონაწილეობდა საქართველოს გენერალური პროკურატურა, სახელმწიფო უშიშროების სამინისტრო, ფინანსური პოლიცია, აჭარის ა/რ უშიშროების სამსახური და ეროვნული ბანკი.
მოქალაქეთათვის ქონების იძულებით ჩამორთმევის კარგად ორგანიზებულ დანაშაულებრივ პროცესს კი ხელმძღვანელობდნენ საქართველოს გენერალური პროკურორი ზურაბ ადეიშვილი და სახელმწიფო უშიშროების მინისტრი ივანე მერაბიშვილი".
"_2004 წლის ივლისში, საქართველოს გენერალური პროკურორის ზურაბ ადეიშვილის და საქართველოს სახელმწიფო უშიშროების მინისტრის ივანე მერაბიშვილის ხელმძღვანელობით, ბათუმში, იმდროინდელი აჭარის ა.რ. უშიშროების სამინისტროს ადმინისტრაციულ შენობაში შედგა თათბირი, რომელსაც ესწრებოდნენ სამართალდამცავი სტრუქტურის ხელმძღვანელი თანამდებობის პირები, მათ შორის აჭარის ა.რ უშიშროების მინისტრი აკაკი ცინცაძე და აჭარის ა.რ. პროკურორი გივი პაპუაშვილი. თათბირზე ასევე მოწვეულნი იყვნენ საქართველოს ეროვნული ბანკის და აჭარის ცენტრალური ბანკის თანაშრომლები", _ აცხადებენ პროკურატურაში.
უწყების ცნობითვე, ხსენებული დანაშაულებრივი გეგმის თანახმად, 2004 წლის ზაფხულში, აჭარის ა/რ პროკურორს გივი პაპუაშვილს უშიშროების სამსახურიდან და ეროვნული ბანკიდან მიაწოდეს ცნობები და სია დასაბარებელი კრედიტორების და ჩამოსართმევი ქონების თაობაზე, რომელთა შორის შედიოდა თელავში მდებარე აკურას ღვინის ქარხანაც.
"აქედან გამომდინარე, გივი პაპუაშვილმა, აჭარის ა.რ. პროკურატურაში დაიბარა აკურას ღვინის ქარხნის მეპატრონეები, შპს "რთველი XXI"-ს დამფუძვნებლები თეიმურაზ მეგრელიშვილი, ნოდარ მოდებაძე და დირექტორი ვახტანგ ჩახვაძე, რომელთაც სს "საქართველოს საზღვაო ბანკი"-დან აღებული ჰქონდათ 2 600 000 ლარამდე ოდენობის სესხი, რითაც შეიძინეს ხსენებული ღვინის ქარხნის აქციების 89.060 %, განახორციელეს ღვინის ქარხანაში ინსვესტიცია, გააშენეს ვაზი და ახდენდნენ ყურძნის წარმოებას, გადამუშავებას, ღვინის დამზადებასა და რეალიზაციას.
აჭარის ა.რ. პროკურორმა გივი პაპუაშვილმა მათ გადასცა ივანე მერაბიშვილის და ზურაბ ადეიშვილის კატეგორიული მოთხოვნა, რომ 2 თვეში დაეფარათ სს "საქართველოს საზღვაო ბანკი"-დან აღებული კრედიტი, ხოლო თუ ამას ვერ შეძლებდნენ, მაშინ უსასყიდლოდ დაეთმოთ აკურას ღვინის ქარხანა, წინააღმდეგ შემთვევაში მათ შეექმნებოდათ პრობლემები. ანალოგიური ხასიათის მუქარა მათ შეუთვალეს ფინანსური პოლიციიდანაც, რამაც სისტემატიური ხასიათი მიიღო", _ აღნიშნულია პროკურატურის მიერ გამოქვეყნებულ ინფორმაციაში.
დაზარალებული ბიზნესმენები დეტალებზე არ საუბრობენ, თუმცა ამბობენ, რომ მათზე ზეწოლა განხორციელდა.
"პირდაპირ მითხრეს ვალი უნდა დააბრუნოო. მერაბიშვილთან და ადეიშვილთან არ მისაუბრია. მათი სახელები ახსენეს მხოლოდ, რომ დავალება მათი მხრიდან მოდიოდა", _ აცხადებს ნოდარ მოდებაძე.
მერაბიშვილისა და ადეიშვილის ადვოკატები ახალი ბრალის წარდგენას "პოლიტიკურ შოუდ" აფასებენ და ამბობენ, რომ "ეს ჩვეულებრივი პოლიტიკური დევნაა".
"ეს არის ასლან აბაშიძის გაცოცხლების მცდელობა", _ განაცხადა ჟურნალისტებთან ვანო მერაბიშვილის ადვოკატმა გიორგი ჩივიაშვილმა.
"რა კონკრეტულ მუქარაზე იყო საუბარი, რა ტიპის ზეწოლა განხორციელდა ამას თუ არ გააკეთებდნენ, ამას რა მოყვებოდა, დადგენილებაშიც კი არ წერია. ჩვენ ხომ არ მივმართავთ ფანტაზიას და ხომ არ ვივარაუდებთ რითი მოხდა კონკრეტულად მუქარა. ამიტომ დადგენილება თავიდან ბოლომდე აბდურდულია", _ ამბობს ზურაბ ადეიშვილის ადვოკატი ოთარ კახიძე.
ცნობისთვის, ქონების უკანონოდ ჩამორთმევის შესახებ მოკვლევა პროკურატურამ ბიზნესმენების მიმართვის შემდეგ დაიწყო.
რაც შეეხება ზემოთ აღნიშნულ საკითხში ხსენებულ აჭარის ა/რ-ის ყოფილ პროკურორს, გიორგი (გივი) პაპუაშვილს, ახლა მოწმის სტატუსი აქვს, თუმცა პროკურატურაში არ გამორიცხავენ, რომ გამოძიების პროცესში მისი პასუხისმგებლობის საკითხიც დადგეს.
თავად გიორგი პაპუაშვილი "გურია ნიუსთან" საუბისას აღნიშნავს, რომ პროკურატურამ აკურის ღვინის ქარხნის საქმეზე მოწმის სტატუსით დაკითხა, თუმცა ის დაკითხვის სავარუდო თარიღს ვერ იხსენებს.
"დამკითხა პროკურატურამ, ჩვენებაც მაქვს მიცემული უკვე კარგა ხანია, მაგრამ არ მახსოვს როდის მოხდა დაკითხვა, წელი და დრო არ მახსოვს. თუმცა, ეს ახალი ხელისუფლების მოსვლის შემდეგ მოხდა, როცა საქმის გამოძიება დაიწყეს. მოწმის სტატუსით დამკითხეს. ვერც იმას ვიხსენებ, მეორედ ვარ თუ არა დაკითხული. რომ მახსოვდეს, ნამდვილად გეტყოდით როდის მოხდა ჩემი დაკითხვა, აქ დასამალი არაფერი არ არის", _ აღნიშნა პაპუაშვილმა"გურია ნიუსთან" საუბრისას.
პაპუაშვილი ადასტურებს პროკურატურის მიერ გამოქვეყნებული ინფორმაციის ნამდვილობას და ამბობს, რომ 2004 წელს შეხვედრა ადეიშვილ-მერაბიშვილსა და აჭარის ა/რ-ის პროკურორებს შორის ნამდვილად შედგა.
"ეს მარტო მე კი არ ვიცი, ამ შეხვედრაში მონაწილეობდა აჭარის ყველა სტრუქტურა", _ აღნიშნავს პაპუაშვილი.
რაც შეეხება პროკურატურის მიერ გავრცელებულ ინფორმაციას, რომლის მიხედვითაც, ადეიშვილ-მერაბიშვილის სქემის მიხედვით, 2004 წლის ზაფხულში, აჭარის ა/რ პროკურორს გივი პაპუაშვილს უშიშროების სამსახურიდან და ეროვნული ბანკიდან მიაწოდეს ცნობები და სია დასაბარებელი კრედიტორების და ჩამოსართმევი ქონების თაობაზე, რომელთა შორის შედიოდა თელავში მდებარე აკურას ღვინის ქარხანაც, პაპუაშვილი ამბობს, რომ მას ბიზნესმენებთან არა ქონების ჩამორთმევის ბრძანება, არამედ, კრედიტების დაბრუნების მოთხოვნა ჰქონდა.
"აქ საუბარი იყო კრედიტების დაბრუნებაზე. მერე ამ პირებმა დათმეს ეს ქონება. ეს მომენტი როგორც არის დაფიქსირებული პროკურატურის პრესრელიზში, ზუსტად ისე განხორციელდა",_ ამბობს პაპუაშვილი.
ამ ეტაპზე შსს-ს ყოფილი მინისტრი ვანო მერაბიშვილი ექვს, ხოლო იუსტიციის ყოფილი მინისტრი ზურაბ ადეიშვილი ოთხ სისხლის სამართლის საქმეშია ბრალდებული. ამ საქმეში ბრალის დამტკიცების შემთხვევაში, მათ 3-დან 5 წლამდე პატიმრობა ემუქრებათ.
გახმაურებული საქმეები პროკურორ პაპუაშვილის მონაწილეობით
"გურია ნიუსის" ინფორმაციით, პროკურორ გიორგი პაპუაშვილის გვარი სხვა გახმაურებულ საქმეებშიც ფიგურირებს, მათ შორის, 2012 წლის 28 დეკემბერს სამცხე-ჯავახეთის საოლქო პროკურატურის საგამოძიებო ნაწილში დაწყებულ სისხლის სამართლის საქმეშიც.
გარდა ამისა, პაპუაშვილი, აჭარის ა/რ-ის პროკურორობის პერიოდში, მოქალაქე როლანდ ბლადაძისთვის ქონების ჩამორთმევის საქმეშიც არის.
"ახლგაზრდა ადვოკატების" ხელმძღვანელი არჩილ კაიკაციშვილი "გურია ნიუსთან’ საუბრისას ამბობს, რომ პროკურორი გიორგი (გივი) პაპუაშვილის შუამდგომლობის საფუძველზე ჩამოართვეს ქონება მისი დაცვის ქვეშ მყოფ, როლანდ ბლადაძეს.
"ჩვენ გამოვაქვეყნეთ კვლევა როლანდ ბლადაძის საქმეზე, რომლისთვის ჩამორთმეული ქონებაც საკონსტიტუციო სასამართლოს ახლანდელ თავმჯომარეს გადაეცა სიმბოლურ ფასად. 2004 წელს, ბლადაძისთვის ქონების ჩამორთმევის საქმეში ფიგურირებდა გიორგი (გივი) პაპუაშვილი, რომელიც 2004-2005 წლებში აჭარის მთავარი პროკურორი იყო. რომლის მხრებზეც გადაიარა აჭარის რეგიონში მაღალჩინოსნების თვის ჩამორთმეულმა ქონებებმა. ის იყო ფაქტობრივად ნოტარიუსიც და აღმასრულებელიც.
როლანდ ბლადაძეს ქონება გიორგი პაპუაშვილის შუამდგომლობის საფუძველზე ჩამოერთვა. გიორგი პაპუაშვილი იყო ის პროკურორი, რომელმაც მიმართა მაშინ აჭარის სასამართლოს და მოითხოვა როლანდ ბლადაძის ქონების განკულაკება. სასამართლომ დააკმაყოფილ პაპუაშვილის მოთხოვნა. ჩვენ გვაქვს ოფიციალური დოკუმენტები, რომელსაც ხელს გიორგი პაპუაშვილი აწერს.
ამის შემდეგ, 2007 წელს, მიხეილ სააკაშვილმა ეს ჩამორთმეული ქონება 1000 ლარად გადასცა საკონსტიტუციო სასამართლოს მოქმედ თავმდჯომარეს გიორგი პაპუაშვილს. თუმცა, ჩვენი ინფორმაციით, სასამართლოს თავმჯდომარე პაპუაშვილსა და პროკურორ პაპუაშვილს შორის რაიმე ნათესაური კავშირი არ არის", _ აცხადებს კაიკაციშვილი.
მისივე თქმით, პაპუაშვილი ძალოვან უწყებებში ახალი ხელისუფლების პირობებშიც მაღალ თანამდებობებს იკავებდა.
"როდესაც ბლადაძის საქმეზე კვლევას ვაწარმოებდით, დავინტერესდით, ამ ქონების ჩამომრთმევი პირები 2014 წლის მდგომარეობით სად საქმიანობდნენ ახალი ხელისუფლების პირობებში. გამოვითხოვეთ პროკურატურიდან ინფორმაცია, საიდანაც გაირკვა, რომ 2014 წლის ივნისის მდგომარეობით, პროკურორი გიორგი პაპუაშვილი შიდა ქართლის პროკურორად მუშაობდა. თუმცა, ვიდრე 2014 წლის ოქტომბერში კვლევა გამოქვეყნდებოდა, ერთი თვით ადრე თანამდებობიდან მოხსნეს. კვლევის გამოქვეყნების შემდეგ, გავიგეთ, რომ გიორგი პაპუაშვილი აჭარის რეგიონის სუს-ის უფროსად დანიშნეს", _ ამბობს კაიკაციშვილი და დასძენს, რომ მისთვის გაუგბარია, რატომ არ დგება პაპუაშვილის პასუხისმგებლობის საკითხი.
"თუ ვანო მერაბიშვილსა და ზურაბ ადეიშვილს ბრალი წაუყენეს, მათი უკანონო გადაწყვეტილებების თანამონაწილე პაპუაშვილს რატომ არ აქვს ბრალი წაყენებული? ისიც ხომ დანაშაულის თანამონაწილე გამოდის, მან პასუხი არ უნდა აგოს? ვიცით, რომ გიორგი პაპუაშვილი ადამიანებს ქონებებს ართმევდა, რაც ოფიციალური რეკეტი იყო, ამის დამადასტურებელი დოკუმენტაციაც გვაქვს", _ აღნიშნავს კაიკაციშვილი.
თავად პაპუაშვილი აღნიშნულ საქმესთან დაკავშირებით "გურია ნიუსთან" საუბრისას ამბობს, რომ ბლადაძის საქმე "ცოტა გაზვიადებულია".
"ამ საქმესთან დაკავშირებით არსებობს სასამართლოს გადაწყვეტილება, აქ ჩემი გვარი არაფერ შუაშია. ქონება სასამართლოს მიერ არის ჩამორთმეული. თავის დროზე სასამართლოს სამივე ინსტანცია გაიარა და ჩემი აზრით, კანონიერი გადაწყვეტილებაც აქვს მირებული სასამართლოს. ვადასტურებ, რომ ჩემი შუამდგომლობის საფუძველზე იყო საქმე სასამართლოში წარდგენილი, მაგრამ სასამართლომ მიიღო ის გადაწყვეტილება, რაც მიიღო", _ ამბობს პაპუაშვილი.
გარდა ამისა, პაპუაშვილი, "გურია ნიუსთან" საუბრისას რაბათის ციხესთან დაკავშირებით აღძრულ სისხლის სამართლის საქმეზეც საუბრობს და აღნიშნავს, რომ საქმის გამოძიება მისი პროკურორობის პირობებში დაიწყო და დღემდე გრძელდება.
"აღნიშნული საქმის გამოძიება ჩემი პროკურორობის პერიოდში დაიწყო, თუმცა, არა მაქვს ინფორმაცია, ახლა რა ეტაპზეა, ან როგორ გაგრძელდა. შემიძლია გავიხსენო, რომ მაგ საქმეში ღირებულების არმქონე შენობების ყიდვას აიძულებდნენ ბიზნესმენებს. მე წამოვედი სამცხე-ჯავახეთიდან და არ ვიცი, ახლა რა მდგომარეობაა", _ აღნიშნავს პაპუაშვილი.
რაც შეეხება აჭარის სუს-ის უფროსის თანამდებობას, რომელსაც პაპუაშვილი ბოლო პერიოდში იკავებდა, როგორც ის ჩვენთან საუბრისას განმარტავს, თანამდებობა პირადი გადაწყვეტილებით დატოვა.
"დაახლოებით 4 თვის წინ წამოვედი ამ თანამდებობიდან. აჭარის სუს-ის ხელმძღვანელი ვიყავი. თუმცა, სხვა სამსახურში გადავედი, რის გამოც ეს პოზიცია დავტოვე. მხოლოდ ის შემიძლია გითხრათ, რომ ძალოვან უწყებაში აღარ ვარ", _ აცხადებს პაპუაშვილი.
"გურია ნიუსი" ორი დღის განმავლობაში ცდილობდა აჭარის ა/რ უშიშროების ყოფილ მინისტრ აკაკი ცინცაძეს დაკავშირებოდა, თუმცა, მან ჩვენს სატელეფონო ზარებს არ უპასუხა.
