მოსკოვში ამერიკის შეერთებული შტატების საელჩო Twitter-ის გვერდზე იმ ყალბ წერილს გამოეხმაურა, რომელიც რუსულმა გამოცემა "Известия"-მ 18 ნოემბერს აშშ-ს სახელმწიფო დეპარტამენტის სახელით გამოაქვეყნა და რომელიც თითქოს რუსი LGBT აქტივისტ ნიკოლაი ალექსეევისადმი იყო მიწერილი.
ამის შესახებ ინფორმაციას "ევროკომუნიკატორი" ავრცელებს.
როგორც გავრცელებულ ინფორმაციაშია აღნიშნული, საელჩოს წერილში ყურადღებაა გამახვილებული იმ ფაქტობრივ და გრამატიკულ შეცდომებზე, რომლებიც მის ავთენტურობას ეჭვქვეშ აყენებს. მაგალითად, წერილში LGBT ჯგუფების აღმნიშვნელი აბრივიატურა არასწორად არის მოყვანილი – LGBTI. წერილის მიხედვით, აშშ სახელმწიფო დეპარტამენტი ალექსეევს ურჩევს ფინანსური თუ ორგანიზაციული საკითხებისთვის დაუკავშირდეს მოსკოვში ა.შ.შ. საელჩოს თანამშრომელს და მითითებულია თანამშრომლის ელექტრონული ფოსტის მისამართი, რომელიც რეგისტრირებულია არა state.gov-ის დომეინზე, როგორც ეს აპრობირებული პრაქტიკაა, არამედ @gmail.com-ზე.
"ტვიტერზე აშშ-ს საელჩომ გამოაქვეყნა გაყალბებული წერილის ვერსია, რომელსაც გრამატიკული და ფაქტობრივი შეცდომების ამსახველი შესწორებები ერთვის თან, შემდეგი კომენტარით: "პატივცემულო Известия.рф. შემდეგში, როდესაც გამოიყენებთ გაყალბებულ წერილებს, გამოგვიგზავნეთ ჩვენ – მოხარული ვიქნებით დაგეხმაროთ შეცდომების შესწორებაში. პატივისცემით. სახელმწიფო დეპარტამენტი."
18 ნოემბერს, ყოველდღიურმა გამოცემამ "Известия"-მ გამოაქვეყნა სტატია სათაურით "რუსი ჩინოვნიკების დისკრედიტაციისთვის LGBT აქტივისტებს იყენებენ." "Известия"-ს სტატიის საილუსტრაციოდ სწორედ ზემოთხსნებული გაყალბებული მიმოწერაა მოყვანილი, რომლის გასაჯაროვება თითქოსდა ჰაკერების მიერ გახდა შესაძლებელი. სტატიაში ასევე საუბარია ცალკეული რუსი მაღალჩინოსნების სექსუალურ ორიენტაციაზე", _ აღნიშნულია ევროკომუნიკატორის მიერ გავრცელებულ ინფორმაციაში.
ცნობისთვის, პროექტის – "მედიის პროფესიული დეტექტორი: ფაქტები და მითები ევროკავშირის შესახებ" მიზანია საზოგადოების კვალიფიციური ინფორმირება ევროინტეგრაციის პროცესისა და დასავლური ღირებულებების შესახებ; ასევე მედიის მიერ ან მედიის მეშვეობით ინტეგრაციის პროცესთან დაკავშირებით გავრცელებულ არასწორ ფაქტებზე რეაგირება ალტერნატიული ინფორმაციის საზოგადოებისთვის მიწოდების გზით. პროექტი ფონდ "ღია საზოგადოება – საქართველოს" მხარდაჭერით ხორიციელდება.
