ლანჩხუთის საკრებულომ 2016 წლის ბიუჯეტის პროექტი ფრაქციებსა და კომისიებში მისი განხილვის პროცესში შემოსული სათანადო შენიშვნებით, წინადადებებითა და რეკომენდაციებით აღმასრულებელ ხელისუფლებას რამდენიმე დღის წინ უკან დაუბრუნა. ამის მიზეზად კი ის დასახელდა, რომ გამგეობის მიერ წარმოდგენილი პროექტი საჭიროებს შემდგომ დახვეწას, დამუშავებას და გამოთქმული შენიშვნების, წინადადებების მაქსიმალურად გათვალისწინებას.
მიუხედავად ამისა, დღევანდელ საკრებულოს სხდომაზე მომავალი წლის მთავარ საფინანსო დოკუმენტთან დაკავშირებით მსჯელობა მაინც შედგა. ვინაიდან გამგეობის მიერ ბიუჯეტის წარმოდგენილ პროექტთან დაკავშირებით, ყველაზე მეტად პრეტენზიები ა(ა) იპ-ების ხელმძღვანელებს ქონდათ, საუბარიც სწორედ ამ სამსახურების დაფინანსების საკითხს ეხებოდა.
საფინანსო-საბიუჯეტო და მუნიციპალური შესყიდვების სამსახურის უფროსის, როლანდ ლაშხიას განცხადებით, ა(ა)იპ-ების ხელმძღვანელების პრეტენზიების სრულად გათვალისწინება შეუძლებელია, რადგან ასეთ შემთხვევაში 5 მილიონ 500 ათას ლარიანი ბიუჯეტი უნდა იყოს, ლანჩხუთის სინამდვილეში კი ადგილობრივი შემოსავლის ნაწილში ,იგი ორ მილიონზე მეტი არ არისო.
ლაშხიას ამ განცხადებას საკრებულოს წევრის დარეჯან ბურჭულაძის გაკვირვება მოჰყვა – თუ ადგილობრივი შემოსავალი ორ მილიონზე ლარზე მეტი არაა, მაშინ რის საფუძველზეა ბიუჯეტი გაზრდილი მილიონ 261 ათასი ლარითო.
ლაშხიამ კი ბურჭულაძის ნათქვამში შესწორება შეიტანა, წლევანდელ წელთან შედარებით 2016 წლის ბიუჯეტი მხოლოდ 700 ათასი ლარითაა გაზრდილიო.
მაჟორიტარი დეპუტატის ჯუმბერ ბლაგიძის მოსაზრებით, როცა გამგეობა ა(ა)იპ-ების ხელმძღვანელობასთან ერთად განიხილავს და კორექტირებას შეიტანს ბიუჯეტში, მუშა პროცესში აუცილებლად უნდა იყვნენ ჩართული დეპუტატებიც.
ეს თემა კი უფრო განავრცო ოპოზიციონერმა დეპუტატმა გია გოგუაძემ.
"ა(ა)იპ-ის ხელმძღვანელები ჩვენსკენ წამოვიდნენ ჩხუბითა და ხელების შლით, რატომ არ გვაძლევთ თანხასო. ჩვენს კითხვაზე – გაქვთ თუ არა კომუნიკაცია გამგებელთანო, ზოგიერთი მათგანისგან უარყოფითი პასუხი მივიღეთ. ძალიან გთხოვთ, შეჯერდით სამსახურების ხელმძღვანელებთან და თქვენ თავად დაარეგულირეთ სიტუაცია, რომ მერე ჩვენსკენ არ იშვერონ ხელი და არ გვეჩხუბონ", – დასძინა გოგუაძემ, რომელმაც მაგალითად "ლანჩხუთი ტექ-სერვისის" ერთ-ერთი ხელმძღვანელის, ნუგზარ ცინცაძის განცხადება მოიყვანა საფინანსო კომისიის სხდომიდან. აღნიშნული ფაქტი სხვა დეპუტატებმაც დაადასტურეს.
გოგუაძის ნათქვამმა გამგებლის, ზაზა ურუშაძის წყრომა გამოიწვია – "რომელ სამსახურის უფროსთან არ მაქვს კომუნიკაცია, ვინ თქვა, რომ ცინცაძეა იქ სამსახურის უფროსი?! ჩხაიძეა იქ ხელმძღვანელი პირი და კეთილი ინებეთ ის მოიწვიეთ აწი სხდომებზე" – განაცხადა გაბრაზებულმა ურუშაძემ.
საკრებულოს წევრთა თქმით, საზოგადოებრივი ჯანდაცვის ცენტრისთვის მეტი დაფინანსებაა საჭირო.
"როგორ შეიძლება მუნიციპალიტეტის მთავარ ეპიდემიოლოგს ხელფასი 350 ლარი ქონდეს და იგივე ხელფასი ქონდეს რომელიმე სხვა ა(ა)იპ-ის თანამშრომელს. ამ სამსახურის ხელშია ჩვენი და ჩვენი შვილების ჯანმრთელობა. ჯანდაცვასთან ერთად გადასახედია საბავშვო ბაღების პედაგოგთა ანაზღაურებაც. არ შეიძლება ასე"– აცხადებდნენ საკრებულოს წევრები.
საკრებულოს კომისიებსა და ფრაქციებს მომავალი წლის ბიუჯეტის საბოლოო ფორმირებისთვის, წინ კიდევ რამდენად შრომატევადი სამუშაო ექნებათ, ეს აღმასრულებელი რგოლის მიერ ხელმეორედ შემოტანილ ვარიანტზეა დამოკიდებული, ანუ რამდენად ეფექტურად მოხდება იმ შენიშვნების გათვალისწინება, რაც დეპუტატებს ამ ეტაპისთვის დაუგროვდათ.
