საქართველოს პარლამენტის წევრი გოგლა ჟვანია ჩოხატაურის მუნიციპალიტეტის საკრებულოს თავმჯდომარის ოჯახის დაყაჩაღებასთან დაკავშირებით ინფორმაციას არ ფლობს. თუმცა, ჟვანია დარწმუნებულია, რომ სამართალდამცავები შესაბამის რეაგირებას მოახდენენ.
" სიმართლე გითხრათ, ამ ფაქტთან დაკავშირებით ინფორმაციას არ ვფლობ. აუცილებლად დავინტერესდები და მოვიკითხავ თუ რა ხდება. შესაბამისად კომენტარს ვერ გავაკეთებ. დარწმუნებული ვარ სამართალდამცავები შესაბამის რეაგირებას მოახდენენ. სამწუხაროდ საქართველოში საკმაოდ ბევრი კრიმინალი ხდება და არახალი ამბავია საქართველოში ყაჩაღობა."
შეგახსენებთ, რომ ჩოხატაურის მუნიციპალიტეტის საკრებულოს თავმჯდომარე ზაალ მამალაძე 28 ნოემბერს, დაახლოებით 21 საათსა და 30 წუთზე დააყაჩაღეს.
თავდამსხმელებს სახეზე სამედიცინო ნიღბები ეკეთათ. ზაალ მამალაძის მეუღლე სტომატოლოგია და როგორც გვითხრა, იმ დროს პაციენტს ელოდებოდა:
_ პაციენტებს ველოდებიდი. დაახლოებით ათის ნახევარი იქნებოდა, როცა კარზე დააკაკუნეს და ზაალი იკითხეს. კარი გავაღე თუ არა შემოიჭრნენ იარაღებით, _ იხსნებეს ნინო მამალაძე.
ყაჩაღები ოქროს და ფულს ითხოვდნენ და სისასტიკით გამოირჩეოდნენ. ზაალ მამალაძეს წინააღმდეგობის გაწევის შემდეგ ფიზიკური შეურაცხყოფა მიაყენეს. ფიზიკური ძალა გამოიყენეს ნინო მამალაძის მიმართაც.
თავდამსხმელებმა ფიზიკური შეურაცხყოფის შემდეგ ოჯახის წევრები დააბეს და მიმდებარე ტერიტორია ზაალ მამალაძის კუთვნილი ავტომობილით დატოვეს.
აღსანიშნავია, რომ ეს ყველაფერი იმ დროს მოხდა, როცა პოლიცია რეიდებს ატარებდა და ავტომანქანებს, მგზავრებსა და ფეხით მოსიარულეებსაც, საფუძვლიანად ამოწმებდა. უნდა ითქვას ისიც, რომ ზაალ მამალაძის სახლი ჩოხატაურის პოლიციის შენობიდან ორასიოდე მეტრში მდებარეობს.
