ჟურნალისტური ეთიკის ქარტიის საბჭო ჟურნალისტურ საქმიანობაში ხელის შეშლის ფაქტს ეხმაურება და მოითხოვს შესაბამისი ორგანოებიდან, საქმეზე დაიწყოს მოკვლევა. ორგანიზაცია განცხადებას ავრცელებს, რომელსაც უცვლელად გთავაზობთ:
"2015 წლის 7 დეკემბერს, მთავრობის ადმინისტრაციასთან გამართულ აქციაზე "არა ეკლესიის დისკრედიტაციას" ონლაინ გამოცემა "ფოსტალიონის" ჟურნალისტს, ვახო კვარაცხელიას აქციაში მონაწილე გიორგი გაბედავამ პროფესიული საქმიანობის განხორციელებაში ხელი შეუშალა. ჟურნალისტის თქმით, მას ინტერვიუს ჩაწერა სურდა, გიორგი გაბედავას ჰკითხა პროტესტის მიზეზი, რის შემდეგაც გაბედავამ სიტყვიერი შეურაცხყოფა მიაყენა და ტერიტორიის დატოვება მოსთხოვა.
მოგვიანებით სოციალურ ქსელში გავრცელდა შემთხვევის ამსახველი ვიდეოც (იხ. ბმული https://www.youtube.com/watch?v=Wu-uYTkPlGs )
ჟურნალისტური ეთიკის ქარტიის საბჭო გმობს ნებისმიერი ფორმით ჟურნალისტური საქმიანობის ხელშეშლას კერძო თუ საჯარო პირებისგან. საზოგადოებას შეახსენებს, რომ "სისხლის სამართლის კოდექსის" 154-ე მუხლი კრძალავს ჟურნალისტისათვის პროფესიულ საქმიანობაში უკანონოდ ხელის შეშლას.
ქარტიის საბჭო მიმართავს შესაბამის უწყებებს დაინტერესდნენ მომხდარი შემთხვევით და დაიწყონ მოკვლევა. ჟურნალისტის პროფესიული საქმიანობის ხელის შეშლის გამო დამნაშავე პირებისთვის პასუხისმგებლობის არ დაკისრების ყოველი შემთხვევა შესაძლებელია წამახალისებელი აღმოჩნდეს სხვა მოქალაქეებისთვის. ამიტომ აუცილებლია, მომხდარ ფაქტს მიეცეს შესაბამისი კვალიფიკაცია და საზოგადოებისთვის ცნობილი გახდეს საქმის შესწავლის შედეგები."– აღნიშნულია ქარტიის საბჭოს მიერ გავრცელებულ განცხადებაში.
