საფეხბურთო კლუბ ლანჩხუთის "გურიას" დაფინანსების თემა მომავალი წლის საბიუჯეტო პარამეტრებზე მსჯელობისას, ყველაზე აქტუალური თემა გახლდათ ლანჩხუთის საკრებულოში. დეპუტატთა გარკვეულ ნაწილს მიზანშეუწონლად მიაჩნდათ კლუბის დაფინანსებისთვის წარმოდგენილ ბიუჯეტის პროექტში მილიომ სამასი ათასი ლარის ოდენობით დაფინანსება. თუმცა საკრებულოს უმრავლესობამ მოახერხა საკითხზე კონსენსუსის მიღწევა და "გურიას" 2016 წლისთვის მილიონ 250 ათასი ლარი მაინც გამოეყო.
მიუხედავად ამისა, დიდი შანსია ეს თანხა კლუბისთვის საკმარისი არ აღმოჩნდეს. როგორც "გურიას" ფინანსურმა მენეჯერმა, თენგიზ კიკვაძემ გაგვიცხადა, არსებობს მიმდინარე დავალიანება, რომელზეც აღნიშნული თანხის ნაწილი მომავალი წლის დასაწყისიდან უნდა მიემართოს.
"კლუბს ამ ეტაპისთვის გააჩნია დავალიანება, დაახლოებით 750 ათასი ლარის ოდენობით, რომელიც სეზონის განახლებამდე უნდა დაიფაროს" – გაგვიცხადა კიკვაძემ.
ამას ემატება ასევე ბანკის კრედიტის დასაფარი თანხები და გამოდის, რომ კლუბს ამ სეზონის ჩასამთავრებლად შეიძლება ეს დარჩენილი თანხა არც ეყოს და საუბარი არაა, ახალ სეზონზე, რომელიც აგვისტოდან დაიწყება. შეგახსენებთ, რომ "გურიამ" ამ დავალიანების გარდა, 2015 წელს მილონნახევარ ლარზე მეტი თანხა უკვე დახარჯა.
