საპარლამენტო უმრავლესობის ლიდერის ზვიად კვაჭანტირაძის ბრალდებებს "ენერგო პრო ჯორჯიას" გენერალურმა დირექტორმა მიხეილ ბოცვაძემ "ქრონიკის" ეთერში უპასუხა.
_ ფეისბუქ პოსტი 4 დღის წინ გავრცელდა და ჩვენ ამ დრომდე არ გაგვიცია პასუხი, მაგრამ როცა ეს ცენტრალური ტელევიზიებით შუქდება, ჩვენ ვუპასუხებთ და ვიტყვით, რომ სრული მობილიზაცია იყო და სრული პასუხისმგებლობით მოეკიდა კომპანია მოსალოდნელ სტიქიას.
მობილიზება იყო უპრეცენდენტო, მათ შორის ოზურგეთში. პიკზე იყო გათიშული 4000 აბონენტი და უშუქოდ ახალ წელს შეხვდა 300 აბონენტი დაახლოებით. ამის სანაცვლოდ ყველა სოფელი, ყველა ავარია ფეხით გვაქვს შემოვლილი ყველას.
ვერ მივიღებთ ვერანაირ ბრალდებას. ჩვენი 1200 თანამშრომლის ლანძღვას, რომლებიც ახლაც ბოძებზე არიან ასულნი და სტიქიას ებრძიან უპასუხოდ ვერ დავტოვებთ. შეიქმნას კომისია, შევხდეთ და განვიხილოთ ყველა ჩატარებული ღონისძიება.
ბრალდებები, რომელიც არსებობს ნამდვილად განსახილველია. სტიქიის დროს უნდა დაზიანდეს თუ არა საყრდენი, ხაზები, თუ ეს არის კითხვა, გიპასუხებთ, რომ დიახ, უნდა დაზიანდეს.
როდესაც სახლები ინგრევა, აეროპორტები იკეტება, უნდა დაზიანდეს.
არცერთ ქვეყანაში არ ხდება ისე რომ სტიქის დროს სიცოცხლის რისკის ფასად მომუშავე კოლექტივს თავს ესხმოდნენ. ჯერ ხდება ამ პროცესების დასრულება და მერე განხილვა.
ყველაფერზე მზად ვართ პასუხი გავცეთ. თბილისიდან შესაძლოა ძალიან მარტივად ჩანს, გარწმუნებთ ყველა სოფელში ვიყავით, ადგილზე მყოფმა ადამიანებმა ნახეს ჩვენი მობილიზება, _ განაცხადა მიხეილ ბოცვაძემ.
შეგახსენებთ, რომ ზვიად კვაჭანტირაძემ "ენერგო პრო ჯორჯიას" 2 იანვარს მიმართა. პარლამენტარი ყველას ურჩევს, რომ კომპანიის "გამოქომაგება არ იფიქრონ":
მართალია, ამ გაფუჭებულ საქმეზე მაქსიმალურად მოიკრიბეს ძალები და 70 %-ის აღდგენა მოხერხდა გუშინ 12 საათამდე, მაგრამ ამ წუთისთვის, ანუ , 2 იანვრის 01:05 ისთვის ისევ 3500 აბონენტია გამორთული. ფიზიკური მიზეზი??? _ ნუ იტყვით და თოვლი მოსულა.
ჯერ კიდევ ოქტომბრის პირველ რიცხვებში ერთი ძალიან გამოცდილი კაცი მეძმარიშვილი გვაფრთხილებდა ყველას, მოემზადეთ ზამთრის სეზონისთვისო. ყველას დავუგზავნე მაშინ ეს გაფრთხილება. ეტყობა, ენერგო პრო ჯორჯიაში არც უნახავთ. ან ჩემი გაფრთხილება რათ უნდათ, რა, თავად არ იციან, რომ დამპალი ბოძები და სადენები, რომელთა მოვლა- პატრონობის და ზამთრისთვის მომზადების პირდაპირი ვალდებულება გააჩნიათ პრობლემებს შექმნიან თუ დროზე არ მიხედე?
2 ღამეა ოზურგეთში მთელი ხელმძღვანელობა ფეხზე დგას, საკუთარ ოჯახებშიც არ მისულან, ხან ერთი ხაზის რემონტზე არიან, ხან მეორესი და ასობით საყვედურის მოსმენა უწევთ.
არც კი იფიქროს ვინმემ თქვენი გამოქომაგება "ენერგო პრო ჯორჯია" !!!
P.S. ამ სტატუსის ადრესატი მხოლოდ "ენერგო პრო ჯორჯიაა" და ჟურნალისტები და სააგენტოები კუდებს ნუ გამოაბამთ. ჩვენ, ხელისუფლებაში ყველას ერთნაირი საზრუნავი გვაქვს და ერთმანეთს ყოველთვის გვერდში დავუდგებით პრობლემების მოსაგვარებლად, _ წერს კვაჭანტირაძე სოციალურ ქსელში.
