საქართველოში ონლაინ კრედიტების გამცემი ორგანიზაციების რაოდენობამ ბოლო პერიოდში საგრძნობლად იმატა.
როგორც ცნობილია, სესხის აღების მსურველი 21 წლის უნდა იყოს და სესხის განაცხადის დასამტკიცებლად კონკრეტულ საბანკო ანგარიშზე მხოლოდ ერთი თეთრი უნდა გადარიცხოს.
რაც შეეხება პირველ სესხს, ის უპროცენტოა, გადახდის შემთხვევაში საკრედიტო ლიმიტი იზრდება და მომდევნო ჯერზე უფრო მეტი თანხის სესხებაა შესაძლებელი, ხოლო გადაუხდელობის შემთხვევაში, გარდა იმისა, რომ ყოველდღე ნასესხები თანხის 1 პროცენტი პირგასამტეხლოს სახით დაირიცხება, შესაძლებელია, ქონებაც დააყადაღონ, მიუხედავად იმისა, რომ სესხი ქონებრივ უზრუნველყოფას არ ითვალისწინებს.
რამდენიმე დღის წინ, აღსრულების ეროვნულმა ბიურომ 2015 წლის მეორე ნახევარში განხორციელებული სამუშაოს ანგარიში გამოაქვეყნა, რომლის მიხედვითაც, ივლისიდან დეკემბრის ჩათვლით 135 გამოსახლება და დემონტაჟი განახორციელა.
გავრცელებული ინფორმაციით, საქართველოში ონლაინ კრედიტების გაუქმების მოთხოვნით ხელმოწერების შეგროვებაც მიმდინარეობს.
"გურია ნიუსი" დაინტერესდა რას ფიქრობს მოსახლეობა ონლაინ კრედიტების შესახებ, რის გასარკვევადაც თბილისის ქუჩებში მოსახლეობას კითხვით მიმართა – უნდა აიკრძალოს თუ არა ონლაინ სესხები?
გივი ლობჟანიძეს თქმით, ონლაინ კრედიტების გამცემი ორგანიზაციები არ უნდა აიკრძალოს.
"არ უნდა აიკრძლოს. პირადად მე მაქვს აღებული. გადახდა მიჭირს, მაგრამ სესხი ადამიანს მაშინ ეხმარება, როცა ფული არ აქვს და სასწრაფოდ სჭირდება,"_ თქვა ლობჟანიძემ.
განსხვავებული მოსაზრება აქვს პენსიონერ ლენა თავადიშვილს, რომელიც ამბობს, რომ სესხის გაცემა ყველა ბანკში უნდა აკრძალონ.
"საერთოდ სესხის გაცემა უნდა გაუქმდეს, რადგან ხალხი ზარალდება. პენსიონერი ვარ და იმასაც კი არ ვეთანხმები ბანკი პენსიებს წინასწარ რომ გასცემს, რადგან მომავალ თვეში პენსიონერმა რა უნდა ქნას არ იცის, არადა გაჭირვებისგან ფული გამოაქვს, ამ დღეში არიან ისინიც, ვინც სესხს იღებს, შემდეგ კი ვერ იხდიან და ნერვიულობენ,"_ამბობს თავადიშვილი.
ნატო გოგიშვილის თქმით, სესხის გაცემის დროს სარგებელს მარტო ბანკი ნახულობს, ამიტომ ონლაინკრედიტების გაცემა უნდა აიკრძალოს.
"უნდა აიკრძალოს. სესხის გაცემით სარგებელს მარტო ბანკი ნახულობს, ხოლო ხალხისთვის მაღალი პროცენტების გადახდა დამაზარალებელია,"_ აღნიშნა გოგიშვილმა.
ზურა ვეფხვაძეს თქმით, ონლაინ სესხის აღება მარტივია, რის გამოც ახალგაზრდებს თანხა გამოაქვთ და უაზროდ ხარჯავენ.
"რა თქმა უნდა, უნდა აიკრძალოს, რადგან ონლაინ სესხის აღება მარტივია, ბევრ ახალგაზრდას გამოაქვს უმიზნოდ, შემდეგ კი ვეღარ იხდის, რაც მის საკრედიტო ისტორიაზე უარყოფითად აისახება. გარდა ამისა, თუ სახლში არ იციან დიდი უსიამოვნებები მოყვება,"_თქვა ზურა ვეფხვაძემ.
როგორც "გურია ნიუსთან" საუბარში ნიკა ბედოშვილმა აღნიშნა, სესხის აღების მსურველებმა იმ რაოდენობის თანხა უნდა ისესხონ, რის დაბრუნებასაც 1 თვეში შეძლებენ.
"არ უნდა აიკრძალოს. ონლაინ სესხის აღება ყველაზე მარტივია სხვა სესხებთან შედარებით, ამიტომ მოსახლეობის უმეტესობა სარგებლობს. პირადად მეც მაქვს კრედიტი აღებული და ხელფასიდან ვიხდი. უბრალოდ სესხის აღების მსურველებმა უნდა გაითვალისწინონ, რომ ისესხონ იმდენი, რის გადახდასაც ერთ თვეში შეძლებენ, თორემ გადავადებებით სესხი, შესაძლოა, უფრო ძვირი დაუჯდეთ,"_თქვა ნიკა ბედოშვილმა.
"გურია ნიუსმა" აღნიშნულ საკითხზე რამდენიმე სტატია მოამზადა. აქვე გთავაზობთ ექსპერტების მოსაზრებებს და დაზარალებული მოსახლეობის ისტორიებს.
ონლაინ კრედიტების მსხვერპლი მოსახლეობა: რა გამოსავალს ხედავენ სფეროს სპეციალისტები
135 გამოსახლება და დემონტაჟი – როგორია აღსრულების ბიუროს ანგარიში
