ლანჩხუთის მუნიციპალიტეტის გამგეობის შიდა აუდიტის სამსახურის 2015 წლის ანგარიშმა, გამგეობის საფინანსო–საბიუჯეტო, მუნიციპალური შესყიდვების, ინფრასტრუქტურისა და არქიტექტურის სამსახურების მიერ 2013-2014 წლებში გახორციელებული ინფრასტრუქტურული პროექტები, სოფლის განვითარების პროგრამისა და სტიქიის სალიკვიდაციო ღონისძიებების ფარგლებში შესრულებული სამუშაოებიც მოიცვა.
აუდიტის მოცემულ ანგარიშში ნათქვამია, რომ შემსრულებლებს, რომლებიც 2013 წელს "სოფლის მხარდამჭერი" პროგრამით ახორციელებდნენ სამუშაოებს, წარმოდგენილ დოკუმენტაციაში ნაჩვენები ჰქონდათ, რომ სამუშაოების გასახორციელებლად საჭირო სხვადასხვა მანქანა-დანადგარი მათ საკუთრებას წარმოადგენდა; თუმცა, გარდა ერთისა, ყველა დანარჩენ შემთხვევაში, საქმის მწარმოებლები დაქირავებული ტექნიკით მუშაობდნენ. ასევე, მათი მხრიდან გაუთვალისწინებელი ხარჯის მოთხოვნებსაც ჰქონდა ადგილი. იგივე დასკვნის მიხედვით, ყველა ზემონახსენები ხარვეზი მომდევნო 2014 წელს მთლიანად გამოსწორდა.
რეალური სურათის მისაღებად აუდიტის სამსახურის თანამშრომლებმა, 2013-2014 წლებში, სოფლის მხარდამჭერი პროგრამით, ინფრასტრუქტურული და სტიქიის სალიკვიდაციო გახორციელებული 578 პროექტიდან 119 ობიექტი შეამოწმეს და დასკვნაში აღნიშნეს, რომ შესრულებული სამუშაოების ხარისხი დამაკმაყოფილებელია. აუდიტის სამსახურის მიერ მომზადებული ანგარიშის მიხედვით, ძირითადი ხარვეზები ყორე-ქვის გაბიონების მოწყობაში გამოვლინდა. სულ მუნიციპალიტეტში 16 ასეთ ობიექტზე შეიქმნა პრობლემა და რის შემდეგაც, ხელშეკრულების შესაბამისად, სამუშაოების შემსრულებლებს საკუთარი ხარჯებით მოუხდათ გამოვლენილი ხარვეზის აღმოფხვრა. თუმცა, მოხდა ისეც, რომ შპს-ები _ "გალაქტიკა" და "ვორქმშენი" სამუშაოების დამკვეთებმა ვეღარ მოიძიეს ხელშეკრულებაში ნაჩვენებ მისამართზე.
გარდა ამისა, ირკვევა, რომ სოფელ ჯურუყვეთში, შპს "გურიას" მიერ ერთ-ერთი მცხოვრების ეზოსთან გაკეთებული ყორე-ქვის გაბიონი, მცოცავი მიწის გამო, ნაწილობრივ მიწაშია ჩაფლული. ამის გათვალისწინებით, აუდიტის წარმომადგენლები მიიჩნევენ, რომ ამ შემთხვევაში გეოლოგთა დასკვნაა აუცილებელი.
შიდა აუდიტის სამსახურის ანგარიშის მიხედვით, გაბიონების მოწყობის მხრივ გაცილებით უკეთესი მდგომარეობა ფიქსირდება 2014 წელს _ სამუშაოები შედარებით ხარისხიანია და დაზიანებულიც თითქმის არ არის. არაკეთილსინდისიერად გაწეული სამსახურისთვის კი, რიგ შემთხვევებში, სამუშაოების მწარმოებლებს ჯარიმის გადახდა დაეკისრათ.
"ლანჩხუთში თამარ მეფის, ჩხაიძის, ბარათაშვილის, ნინოშვილის, კვირკველიას ქუჩებისა და სუფსის ცენტრის რეაბილიტაციის მიზნით, 2013 წლის სამ ოქტომბერს გაფორმდა ხელშეკრულება შპს "TEREX XXI"-სთან. სამუშაოები შესრულებული იქნა არაკეთილსინდისიერად, რის გამოც, 2013 წლის ოთხ დეკემბერს შეწყდა ხელშეკრულება. შემსრულებლის მიერ ჯარიმის სახით გადახდილი იქნა ხელშეკრულების გარანტია 5 000 ლარის ოდენობით. იგი, აგრეთვე, დაჯარიმდა 11 413 ლარით".
ზემოთ ნახსენები ფირმა სახელმწიფო შესყიდვების სააგენტომ ე. წ. "შავ სიაში" შეიყვანა, ხოლო დაწყებული სამუშაოები უკვე მომავალ წელს შპს "გზა XXI"-მა დაამთავრა.
ნაკისრი ვალდებულებების არაჯეროვნად შესრულების გამო, მუნიციპალიტეტის გამგეობამ კიდევ ერთ ფირმასთან _ "ჯი–აი–დის"-სთან შეწყვიტა ხელშეკრულება: "საქართველოს მთავრობის 2014 წლის 13 იანვრის #34 განკარგულების განკარგულების შესაბამისად ინფრასტრუქტურული პროგრამით თანხა გამოიყო, თბილისის ქუჩაზე რკინა–ბეტონის სანიაღვრე არხის მოწყობის, კოსტავასა და ცინცაძის ქუჩებზე გზის მოასფალტების, კუპრეიშვილის ქუჩაზე სანიაღვრე არხის მოწყობის, გურამიშვილის ქუჩაზე გზის მოასფალტების და რკინა–ბეტონის სანიაღვრე არხის მოწყობის სამუშაოების შესასრულებლად. სამუშაოების შესყიდვის მიზნით, ელექტრონული ტენდერის შედეგად, 2014 წლის 10 ივნისს ხელშეკრულება გაფორმდა შპს "ჯი–აი–დი"-სთან. ნაკისრი ვალდებულებების არაჯეროვნად შესრულების გამო გამგეობის მიერ იმავე წლის სამ ოქტომბერს შეწყვეტილი იქნა ხელშეკრულება. ხელშეკრულების შეუსრულებლობის გამო გადახდილი იქნა შემსრულებლის მიერ საბანკო გარანტიის სახით 50 400 ლარი", _ ნათქვამია აუდიტის დასკვნაში.
ამავე დასკვნის მიხედვით, ეს ფირმაც სახელმწიფო შესყიდვების სააგენტომ "შავ სიაში" შეიტანა, ხოლო გამგეობამ დაწყებული სამუშაოების საბოლოოდ გასახორციელებლად ხელშეკრულება შპს "სამკუთხედთან" გააფორმა, რომელმაც დაასრულა კიდეც აღნიშნული სამუშაოები.
