ტიტას ხისა და ჭაობის კვიპაროსის სკანდალის შემდეგ, რომლითაც საქართველოს მოსახლეობის ცოდნა ბოტანიკაში გამდიდრდა და ამ ორი სახეობის არსებობა ბევრმა გაიგო, ახალი სკანდალი მომწიფდა.
საქმე ეხება მიწის ნაკვეთს სოფელ ციხისძირში, რომელიც ადრე ცარიზმის მოხელეთა აგარაკი იყო, საბჭოთა დროს კი სუბტროპიკული სამოთხე, ზღვით, ულამაზესი გამწვანებით, ხედებით და ბორცვებით.
როგორც აღმოჩნდა, სააკაშვილის დროს ეს ამქვეყნიური სამოთხე ხელისუფლებამ, არც მეტი, არც ნაკლები _ ლარად გაასხვისა და თანაც ისე, რომ მყიდველს არანაირი საინვესტიციო ვალდებულება არ აუღია და არც სახელმწიფოს მოუთხოვია მისთვის.
მხოლოდ მიამიტი დაიჯერებს, რომ რამდენიმე მილიონად შეფასებულ მიწის ნაკვეთს საქართველოში ვინმე და თუნდაც სახელმწიფო ერთ ლარად ვინმეს აჩუქებს. თუმცა, აქ ისიც კი გასაიდუმლოებულია, თუ ვინ არის ის "ბედნიერი", ვისაც ერთ ლარად ნაჩუქარი ცხრამილიონიანი მიწის ნაკვეთი ეკუთვნის. ქართული მედია უკვე მერამდენე დღეა, ამის გარკვევას ცდილობს, მაგრამ კითხვები უფრო მეტი ჩნდება, ვიდრე პასუხები არსებობს.
ჯერჯერობით, მხოლოდ ისაა ცნობილი, რომ 2011 წლის 3 აგვისტოს პანამაში, ოფშორულ ზონაში რეგისტრირებულ კომპანია redman federation inc -ს სოფელი ციხისძირში, ზღვისპირას არსებული თითქმის ცხრა ჰექტარი მიწის ნაკვეთი ერთ ლარად გადაეცა. ეს კომპანია მანამდე, ორი თვით ადრე, 2011 წლის 3 ივნისსაა რეგისტრირებული და მისი დამფუძნებლები ანუ ამ მიწის ნაკვეთის მფლობელი ამ დრომდე უცნობია.
პანამის საჯარო რეესტრის ჩანაწერების მიხედვით, კომპანია redman federation inc-ი (რეგისტრაციის ნომერი 737631) ანონიმური ტიპისაა და მისი რეგისტრაცია აგენტის მეშვეობით მოხდა. რეესტრის ჩანაწერის მიხედვით, ამ შემთხვევაში აგენტად კომპანია INTERNATIONAL OVERSEAS SERVICES (PANAMA) არის დასახელებული.
რას წარმოადგენს ეს კომპანია?
გუგლის საძიებო სისტემაში ამ კომპანიის შესახებ ინფორმაციის ძებნისას პირველივე მონაცემი ამ კომპანიის ვებგვერდია. გვერდი რუსულენოვანია და ალბათ, ეს იმას მიანიშნებს, რომ პოსტსაბჭოთა სივრცის ბაზარზეა ორიენტირებული.
მთავარ გვერდზე მითითებულია, რომ კომპანია ბაზარზე 20 წელია მოღვაწეობს და პროფესიონალური მოთამაშეა. იგი არარეზიდენტ კომპანიებს გადასახადებისაგან თავისუფალ ზონებში და სხვადასხვა ქვეყნებში რეგისტრაციაში ეხმარება და სურვილის შემთხვევაში შემდგომში მომსახურებასაც უწევს. აქვე აღნიშნულია, რომ კომპანია განსაკუთრებულ ყურადღებას უთმობს კლიენტებს აღმოსავლეთ ევროპისა და დსთ-ს ქვეყნებიდან. კომპანია INTERNATIONAL OVERSEAS SERVICES (PANAMA)-ს თავისი წარმომადგენლობები გააჩნია მოსკოვში, სანკტ პეტერბურგში, კიევში, ალმათში, რიგასა და ტალინში. მთავარ გვერდზე მითითებულია ამ კომპანიის ტელეფონის ნომრებიც.
დავუბრუნდეთ კვლავ პანამის საჯარო რეესტრის ჩანაწერს, სადაც კომპანია redman federation inc-ს სარეგისტრაციო ჩანაწერში ჩამოთვლილია რამდენიმე დირექტორი, რომელთაგან ზოგიერთი იურიდიულ პირს წარმოადგენს, ზოგი კი _ ფიზიკურს.
ჩამონათვალში პირველი იურიდიული პირი _ კომპანია CASCADO AG-ია. თავისთავად ეს სახელი არაფერს გვეუბნება, მაგრამ თუკი პოსტსაბჭოთა მედიაგამოცემების რამდენიმე წლის წინანდელ სტატიებს გავიხსენებთ, არც თუ დადებითი შთაბეჭდილება შეგვექმნება _ უამრავ საინტერესო სტატიებს შორის, რომელშიც ეს კომპანია არის ნახსენები, ყურადსაღებია უკრაინული ონლაინგამოცემა www.censor.net.ua-ს მასალა სათაურით _ "კურჩენკო შესყიდვებს აგრძელებს _ ოლიგარქმა ინვესტბანკი ხელში ჩაიგდო".
სტატიაში აღნიშნულია, რომ "ინვესტბანკი" უკრაინელმა ოლიგარქმა კურჩენკომ და იანუკოვიჩთან დაახლოებულმა პირებმა ჩაიგდეს ხელში. უკრაინული ბანკის 11 პროცენტი ამ სტატიის თანხმად, იყიდა სააქციო საზოგადოება "Консалтинг Системз"-მა, რომელიც უკრაინაში მოქმედი სხვა უამრავი ფირმის დამფუძნებელი და მფლობელია. თუმცა, "Консалтинг Системз"-ის ერთერთი მფლობელი პანამური კომპანია Adform Experts-ია, რომელიც მსოფლიოში უამრავი ბიზნესის მფლობელის ინტერესებს წარმოადგენს.
Консалтинг Системз-ის დირექტორებს შორის (Systemo AG) ფიგურირებს ციხისძირში მიწის ნაკვეთის 1 ლარად მფლობელი კომპანიის დირექტორი ფირმებიც _ Systemo AG , Cascado AG და Integri S.A.
სამივე ეს ფირმა რამდენიმე კორუფციული სკანდალით არის ცნობილი _ ფირმები Cascado AG და Systemo AG 2008 წელს სომალელი მეკობრეების მიერ სავაჭრო გემ "ფაინას" გატაცების საერთაშორისო სკანდალში აღმოჩნდნენ გახვეულები, რადგანაც გემზე Т-72 ტიპის 32 ტანკი აღმოჩნდა და ისინი გასაყიდად სუდანში გადაჰქონდათ. "ფაინა" პანამურ კომპანია Waterlux AG-ს ეკუთვნოდა, რომელსაც Cascado AG და Systemo AG მართავდა. ორივე ამ ფირმას კი ლატვიის მოქალაქეები _ ერიკ ვანაგელსი და ერიკ გორინი ხელმძღვანელობდნენ. მათი სახელით უკარაინულმა НАК Нафтогаз-მა ორი ცალი საბურღი პლატფორმა შეიძინა. სწორედ მაშინ გამოაშკარავდა, რომ კომპანიის ოფიციალურ მფლობელებად დასახელებული ლატვიელები რეალურად ღარიბი, წვრილი მეწარმეები იყვნენ და მედიამ დაცინვით მათ "იანუკოვიჩის ბომჟები" შეარქვა. ეს ამბავი თავის დროზე ძალიან გახმაურდა, რადგანაც ჟურნალისტ გრეჰემ სტეკის Business New Europe-ში გამოქვეყნებული გამოძიების საგანი გახდა. ამ ჟურნალისტური გამოძიებით ცხადი გახდა, რომ უკრაინელი ჩინოვნიკები უზარმაზარ თანხებს ითვისებდნენ ბიუჯეტიდან და ამისათვის ოფშორულ კომპანიებს და რთულ მაქინაციურ სქემებს იყენებდნენ.
ციხისძირის მიწის ნაკვეთის მფლობელი redman federation inc-ის დირექტორების სია ზემოთ ნახსენები ფირმებით არ სრულდება ამ ფირმების ჩამონათვალს მოსდევს ორი ფიზიკური პირი. პირველი _ 1973 წლის 14 მაისს დაბადებული ვინმე ფერნანდო ენრიკე მონტერო დე გრაცია (FERNANDO ENRIQUE MONTERO DE GRACIA). ვნახოთ, ვინ არის ის?
თუკი გუგლს დავუჯერებთ, თუმცა, არანაირი საფუძველი არ გვაქვს, არ დავუჯეროთ, მონტერო დე გრაცია არც თუ ისე სუფთა პიროვნება უნდა იყოს. 2012 წელს, ვებგვერდზე www.nakedcapitalism.com, გამოქვეყნდა ჟურნალისტ რიჩარდ სმითის საინტერესო სტატია სათაურით _ "ახალი ზელანდიის სერვისებით მოსარგებლე მექსიკელი ნარკობარონები რუსულ მაფიას ეხმარებიან".
სტატიაში საუბარია იმაზე, რომ ახალ ზელანდიაში მოქმედი ლიბერალური საგადასახადო რეჟიმით, რომლითაც მექსიკელი ნარკობარონები ფულს ათეთრებდნენ, რუსული მაფიაც დაინტერესდა და ეს ქვეყანა უკრაინულმა სახელმწიფო კომპანიებმა 150 მილიონი დოლარის ეგრეთწოდებული "ატკატების" მისაღებად გამოიყენეს, ერთ-ერთ კომპანიას კი ახალი ზელანდიის მთავრობამ, ლიტვის მთვარობის მოთხოვნით, რეგისტრაცია გაუუქმა, რადგანაც იგი უკრაინელმა და ლიტველმა ჩინოვნიკებმა ფულადი მაქინაციებისათვის გამოიყენეს.
როგორც ლატვიის მთავრობის მიერ მოკვლეულ მასალებზე დაყრდნობით ჟურნალისტი წერს, აღნიშნული კომპანია რეგისტრირებული იყო მისამართზე, სადაც 765 იურიდიული პირია რეგისტრირებული და მათგან მრავალი საეჭვო რეპუტაციის მქონე, ამ კომპანიების დირექტორები კი ხშირად ლატვიის მოქალაქეები იყვნენ.
ერთერთი კომპანია, რომელიც ამ პროცესში აქტიურად იყო ჩართული, Genhold Limited-ია, რომლის დირექტორი კვლავ ფერნარდო ენრიკე მონტერო დე გრაცია გახლდათ. ეს კომპანია კი შედის MaxHold Limited ჯგუფში და რეგისტრირებულია კვიპროსში, სადაც საკმაოდ ლიბერალური საგადასახადო სისტემაა. როგორც გამოცემა ექსპერტებზე დაყრდნობით აღნიშნავს, მას რუსული მაფია აკონტროლებს.
ანალიტიკოსები ირწმუნებიან, რომ რუსული მაფია კვიპროსს ფულის გასათეთრებლად აქტიურად იყენებს და ეს აქტიურობა თანდათან უფრო მატულობს.
ყოველივე ამის შემდეგ გასაგები ხდება რომ ფერნარდო მონტერო არც თუ მთლად უმწიკვლო რეპუტაციის მქონე ფირმების ხელმძღვანელი უნდა იყოს.
ზღვისპირა საქართველოში მიწის ნაკვეთის მფლობელი ოფშორული კომპანიის ერთერთი დირექტორი, ფიზიკური პირი ქალბატონია – ტატიანა იცელ სალდანია ესკობარი (Tatiana Itzel Saldaña Escobar). ეს ქალი ასეულობით თუ ათეულობით ოფშორულ კომპანიაში ფიგურირებს. აღსანიშნავია, რომ ეს კომპანიები ხშირად ოლიგარქებსა და საეჭვო სახელის მქონე მეწარმეებს უკავშირდება. მართალია საქართველოში არა, მაგრამ ამ ქალის სახელი იციან უკრაინაში ოლიგარქ რინატ ახმატოვის მოღვაწეობასთან დაკავშირებით.
2012 წელს ახმატოვის კომპანიამ _ Горные машины, ტენდერი მოიგო, რომლის თანახმადაც, დონბასის შახტებისთვის სპეციალური აღჭურვილობა უნდა შეეძინა. მართალია, ამ სახელმწიფო შეკვეთის შესრულებას სხვა კომპანიები უფრო იაფად აპირებდნენ, მაგრამ ყველას გასაოცრად, ტენდერი ახმატოვმა მოიგო, საბოლოოდ სახელწიფომ ორჯერ მეტი თანხა გამოუყო, ვიდრე ხარჯთაღრიცხვით იყო გათვალისწინებული. Горные машины -ს დირექტორიც პანამის მოქალაქე ტატიანა იცელ სალდანია ესკობარი გახლდათ.
პანამის საჯარო რეესტრის თანახმად, 2010 წელს ტატიანა იცელ სალდანია ესკობარი იყო კომპანია SYSTEMO AG-ის დირექტორი. მასთან ერთად, ამ კომპანიის დირექტორებად დასახელებულნი არიან ზემოთ ნახსენები ლატვიის მოქალაქეები ერიკ ვანაგელსი და ერიკ გორინია, რომლებიც უკრაინის სახელმწიფო ნავთობკომპანიის 150-მილიონიან აფიორაში ფიგურირებენ და რის გამოც ლიტვის მთავრობის მოთხოვნით ახალმა ზელანდიამ ერთერთ კომპანიას რეგისტრაცია გაუუქმა.
ოფიციალურად ახმატოვი აცხადებს, რომ ამ კომპანიასთან კავშირი არ აქვს. თუმცა, კომპანიამ უკრაინაში რამდენიმე ტენდერში მიიღო მონაწილეობა, რითაც მილიარდობით გრივნა მოიპოვა.
ყოველივე აქედან რა დასკვნის გამოტანა შეიძლება? მართალია, ძნელია დაადგინო (შეუძლებელი კი არა) ვისი ფირმა ვის კომპანიაშია და კომპანია ვის სააქციო საზოგადოებაში, მაგრამ ერთი რამ ცხადი ხდება, რომ redman federation inc -ი, რომელსაც მიხეილ სააკაშვილმა ციხისძირში, ზღვისპირას თითქმის 9 ჰექტარი მიწა ერთ ლარად გადასცა, საეჭვო კომპანიების რიცხვს განეკუთვნება და მჭიდროდ არის დაკავშირებული პოსტსაბჭოთა ქვეყნებში ფულის გათეთრებასთან, საერთაშორისო დანაშაულებებრივ ქსელთან და კორუფციულ გარიგებებთან. ისიც ნათელია, რომ ერთი ლარის უკან რეალურად დიდი ფული დგას, პრეზიდენტები კი უცნობი ადამიანების მიერ დაფუძნებულ კომპანიებს ლარად არ ჩუქნიან მილიონიან მიწის ნაკვეთებს.
