“წარმატების შემთხვევაში კიდევ დიდხანს მოუწევთ ჩვენი ატანა” – დასრულდა თუ არა განხეთქილება კოალიციაში

დაპირისპირებას, რომელიც  კოალიცია "ქართულ ოცნებაში" თითქმის ერთი თვის წინ დაიწყო,  გუშინ პრემიერ-მინისტრმა ბოლო მოუღო.

ურთიერთბრალდებები და კომპრომატული განცხადებები, რომელსაც ორივე დაპირისპირებული მხარე მიმართავდა, მედიიაში განხილვის  მთავარ თემებად იქცა.

შევეცადეთ ამ მოვლენების ქრონოლოგია კიდევ ერთხელ შეგვეთავაზებინა მკითხველისთვის.

დაპირისპირება საპარლამენტო უმრავლესობის წევრის, ფრაქცია  "მრეწველების" თავმჯდომარის  გოგი თოფაძის მიერ  თავდაცვის მინისტრის თინა ხიდაშელის მისამართით გაკეთებულმა  განცხადებებმა გამოიწვია. თოფაძემ  ხიდაშელი საგარეჯოს არჩევნების ჩარევასა და გაყალბებაში  დაადანაშაულა.  მრეწველების ლიდერის  განცხადებით,   "მისი მხრიდან არჩევნებში ჩარევა  იყო ქვეყნისთვის იმიჯის დაგდება,  თავხედური ნაბიჯი გადადგა თავდაცვის მინისტრმა. ხალხმა დაიჯერა, რომ საქართველოში არჩევნები ობიექტურად ტარდება. ამ დროს კი, თავდაცვის მინისტრის თინათინ ხიდაშელის საგარეჯოში, რიგგარეშე არჩევნებში ჩარევა, უმრავლესობას ძალიან ბევრჯერ დახვდება წინ."-   განაცხადა თოფაძემ ტელეკომპანია  "ობიექტივის" ეთერში.

თოფაძის ამ განცხადებას პარლამენტში "რესპუბლიკელმა" დეპუტატმა დავით ბერძენიშვილმა უპასუხა და  თოფაძის მცდელობა შეაფასა როგორც ანტიკოალიციური, ანტისახელისუფლებო, ანტიქართული კამპანია.

დაპირისპირება  და ურთიერთბრალდებები მომდევნო დღეებში კიდევ უფრო გამწვავდა, რის  გამოც "რესპუბლიკელებმა"  ამ თემაზე საჯარო დებატების შეწყვეტის შესახებ განაცხადეს.

"თოფაძის განცხადებაზე პასუხისგან  პირველ ეტაპზე თავი შევიკავეთ, რადგან ის საუბრობდა მედიის მიერ თითქოსდა აზრის დამახინჯებაზე და ველოდებოდით შემდგომ განმარტებებს. მიუხედავად ამისა, რამდენიმე დღეში ცილისწამება განმეორდა კიდევ უფრო მძიმე ფორმებში – საგარეჯოში სამართლიანად ჩატარებული შუალედური არჩევნების საბაბად გამოყენებით, ამჯერად უკვე პირდაპირი ანტიდასავლური თავდასხმებით როგორც თავდაცვის მინისტრზე, ასევე პარლამენტის ევროინტეგრაციის კომიტეტის თავმჯდომარეზე, რესპუბლიკური პარტიის ერთ-ერთ დამფუძნებელზე, ამ ყველაფერს სრულიად ცალსახად მიეცა დაგეგმილი შეტევის ხასიათი. ასეთ ვითარებაში ჩვენ ვალდებული ვართ, დავიცვათ ქვეყნის, კოალიციის, პარტიის და ჩვენი კოლეგების პრესტიჟი. "რესპუბლიკელები" ამ ეტაპზე ვწყვეტთ საჯარო დებატებს აღნიშნულ თემაზე, რადგან ველით კოალიციის შიდა ფორმატში, როგორც კოალიციური, ისე სახელმწიფოებრივი ინტერესების საფუძველზე შექმნილი ვითარების მიზეზებსა და მიზნებზე მსჯელობას."  – განაცხადა რესპუბლიკური პარტიის თავმჯდომარემ, ხათუნა სამნიძემ.

 პოლიტოლოგ გია ხუხაშვილის შეფასებთ, მსოფლმხედველობითი  დაპირისპირება კოალიცია "ქართულ ოცნებაში" შექმნისთანავე   არსებობდა.  "პრობლემა არის სისტემური და სათავეს ჯერ კიდევ კოალიციის დაარსებიდან იღებს. კოალიცია "ქართული ოცნება" თავიდანვე ეკლექტური იყო, არ იყო მსოფლმხედველობრივი ერთიანობა და ეს არ შემოიფარგლება გოგი თოფაძით და "რესპუბლიკელბით". პრობლემა უფრო ღრმაა და ბევრად უფრო მეტი ადამიანია დაპირისპირებაში ჩართული.

 კოალიციაში  "რესპუბლიკური პარტია" საკმაოდ სერიოზული უმრავლესობისთვის არის "უცხო სხეული" და მათი გონორი, აქედან გამომდინარე,  გაუგებარია. ისიც გაუგებარია, ეს პარტია ქვეყნის გეოპოლიტიკურ არჩევანს საკუთარ ბედთან რატომ აკავშირებს. ამით იყო თავის დროზე დაკავებული მიხეილ სააკაშვილი, რომელიც ამბობდა, რომ ქვეყნის საგარეო კურსის ერთადერთი გარანტი 'ნაციონალური მოძრაობაა' და ვინც მას ეწინააღმდგება, ყველა რუსეთის აგენტიაო. მერე ეს ესტაფეტა შედარებით მცირე მასშტაბით გადაიბარეს "თავისუფალმა დემოკრატებმა", რომლებმაც ასევე განაცხადეს, რომ ქვეყნის კურსს ექმნებოდა საფრთხე, თუ ისინი მინისტრები არ იქნებოდნენ და იგივე რიტორიკას ახლა "რესპუბლიკური პარტია" ეწევა."

პარლამენტის თავმჯდომარე  დავით უსუფაშვილი  შეეცადა დაპირიპირება კოალიციის შიგნით მოეგვარებინა და მხარეებს ურთიერთმოლაპარაკებისკენ მოუწოდა:  "მე დარწმუნებული ვარ, რომ კოალიციურ რეჟიმში ყველაფერი მოგვარდება და გადაწყდება ისე, როგორც დღემდე არაერთხელ მომხდარა ქვეყნის სასარგებლოდ და არა რომელიმე პარტიის და პირის სასარგებლოდ."

გოგი თოფაძის გაღიზიანების და თავდაცვის მინისტრის წინააღმდეგ საჯაროდ გამოთქმული ბრალდებების ერთ-ერთ მიზეზად ტელეკომპნია რუსთავი2-ის გადაცემა "არჩევანში" თოფაძის კომპანიის მიერ  თავდაცვის სამინისტროს მიერ გამოცხადებულ ტენდერში დამარცხება დასახელდა.

"ორი წლის განმავლობაში ქართულ ჯარს არაალკოჰოლური სასმელით გოგი თოფაძის კომპანია ამარაგებდა. როგორც სახელმწიფო შესყიდვების სააგენტოს ოფიციალური დოკუმენტშია აღნიშნული, გოგი თოფაძის კომპანიამ 2014 წელს ტენდერიდან თითქმის 880 ათასი ლარი მიიღო. 2015 წელს კი თითქმის 420 ათასი ლარი.

 2016 წელს კომპანია ყაზბეგმა საქართველოს თავდაცვის სამინისტროს მიერ გამოცხადებული ტენდერში წააგო და არაალკოჰოლური სასმელით ქართულ ჯარს მიმდინარე წელს უკვე სხვა კომპანია ამარაგებს."-განაცხადა  გადაცემის წამყვანმა  გიორგი გაბუნიამ.  თინა ხიდაშელმა გადაცემაში საუბრისას აღნიშნა, რომ ამ ტენდერის შესახებ არაფერი იცის. "მე ამის შესახებ საერთოდ არ ვიცოდი. ტენდერებზე ინფორმაცია მაინცდამაინც არ მაქვს. ეს ჩემთვის სიახლეა,"-თქვა ხიდაშელმა.

 პრემიერ-მინისტრის ოფიციალურ გვერდზე გუშინ  გამოქვეყნებული   განცხადების მიხედვით , "პოლიტიკურმა დაპირისპირებამ კოალიციაში სრულიად მიუღებელი ფორმა მიიღო. არანაირი მნიშვნელობა აღარ აქვს, ვინ და რის გამო დაიწყო დაპირისპირება. ეს არ უნდა ვაკადროთ, პირველ რიგში, იმ ხალხს, ვინც 2012 წელს მხარი დაგვიჭირა, ქვეყნის მართვა გვანდო და რომლებიც საქართველოს უმრავლესობას შეადგენენ. ჩვენი საზოგადოება ნამდვილად იმსახურებს, რომ პოლიტიკოსები მეტი პასუხისმგებლობით მიუდგნენ საკუთარ ქმედებებსა და განცხადებებს, იფიქრონ და დასახონ ხალხის პრობლემების მოგვარების გზები.

რამდენიმე დღის წინ გავაკეთე პოლიტიკური განცხადება იმის შესახებ, რომ კოალიციის წევრების მხრიდან თავდაცვის მინისტრის მისამართით ამ ტიპის საჯარო ბრალდებები მიუღებელია და დღესაც ამ აზრზე ვრჩები. თუმცა, ამავე დროს, მინდა განვაცხადო, რომ თავდაცვის მინისტრი პირველ რიგში მთავრობის წევრია და მხოლოდ ამის შემდეგ არის საკუთარი პარტიის ერთ-ერთი ლიდერი. სწორედ მისი სტატუსიდან გამომდინარე, ვფიქრობ, მიუღებელია მისი მხრიდან მსგავს დაპირისპირებაში ჩართვა. განსაკუთრებით მნიშვნელოვანია, ყველაფერი გავაკეთოთ, იმისათვის, რომ უზრუნველყოფილი იქნას ჩვენი ჯარის პოლიტიკური პროცესებისგან მაქსიმალური დისტანცირება. დაუშვებელია, რომ ჩვენთვის საამაყო ჯარისკაცები და ოფიცრები პოლიტიკაში აღმოჩნდნენ ჩართული.

"ქართული ოცნება" მზად არის, ითანამშრომლოს ყველა პოლიტიკურ ძალასთან, ვინც ამ პროცესს ფეხს აუწყობს, ვისთვისაც ამგვარი პოლიტიკური ხედვა სისხლხორცეული გახდება, ვინც შეძლებს, დაძლიოს ვიწროპარტიული და ჯგუფური ინტერესები და გაერთიანდეს მთავარი მიზნის – ჩვენი ქვეყნის უკეთესი მომავლის გარშემო."

პრემიერი გუშინ რესპუბლიკური პარტიის წევრებს შეხვდა.  ბევრის მოლოდინი, რომ ხიდაშელი დატოვებდა თავდაცვის მინისტრის პოსტს, ხოლო რესპუბლიკელები კოალიციას, არ გამართლდა.

"ჩვენ ვრჩებით კოალიციაში და წარმატების შემთხვევაში, ბევრს კიდევ დიდხანს მოუწევს ჩვენი ატანა"-განაცხადა დღეს პარტიის ერთ-ერთმა ლიდერმა ლევან ბერძენიშვილმა.