ივანე ჯავახიშვილის სახელობის თბილისის სახელმწიფო უნივერისტეტის აკადემიური საჭოს წევრები განცხადებას ავრცელებენ, სადაც აღნიშნულია, რომ შექმნილ ვითარებაში ერთადერთი გამოსავალი კონსტრუქციული დიალოგის გაგრძელებაა. წინააღმდეგ შემთხვევაში, მათი თქმით, "სავალალო შედეგებამდე მივალთ."
"ივანე ჯავახიშვილის სახელობის თბილისის სახელმწიფო უნივერისტეტის აკადემიური საბჭო აცნობიერებს თავის პასუხისმებლობას განვითარებული მოვლენების გამო და მოუწოდებს ყველა სტუდენტს, პროფესორს, თანამშრომლებს ერთიანობისკენ, რათა მაქსიმალური ძალისხმევა მიმართონ არსებული კრიზისიდან გამოსასვლელად. შექმნილ ვითარებაში ერთადერთი გამოსავალი კონსტრუქციული დიალოგია, წინააღმდეგ შემთხვევაში მივალთ სავალალო შედეგებამდე.
სამწუხაროდ, ბოლო დღეებში გავრცელდა არამარტო დაუზუსტებელი, არამედ მიზანმიმართულად შეურაცხმყოფელი განცხადებები. მძიმე ბრალდებები წაუყენეს როგორც რექტორს, ასევე ორივე სტუდენტური აქციის მონაწილეებს და კანცლერობის კანდიდატს. გამოითქვა სერიოზული და უაპელაციო ურთიერთსაწინააღმდეგო ბრალდებები, რაც დაუშვებელია. სამწუხაროდ უდანაშაულობის პრეზუმცია დაირღვა. დაუშვებელია ისეთი მეთოდების გამოყენება, რომლებიც იწვევს უნივერსიტეტის და მისი მმართველი ორგანოების პარალიზებას. მიუღებელია, როგორც ფიზიკური ძალადობა, ისე მორალური ზეწოლა. მოვუწოდებთ ყველას, განსაკუთრებით პროფესურას, თავი შეიკავონ მკვეთრი განცხადებებისგან. ორივე სტუდენტური აქციის მონაწილეები ჩვენი სტუდენტები არიან, ვალდებული ვართ მოვუსმინოთ ყველას და გავითვალისწინოთ მათი კონსტრუქციული მოსაზრებები."– აღნიშნულია საბჭოს განცხადებაში, რომელსაც საბჭოს 14 წევრიდან ხელს ამ დროისთვის 11 აწერს.
