1892 წლის 25 ივნისს უინძორში გურული მოჯირითეები ივანე მახარაძის თავკაცობით მისი აღმატებულების, ინგლისის დედოფლის წინაშე წარსდგნენ და დედოფლის, მისი შვილებისა და წარჩინებულ პირთა წინაშე იჯირითეს. წარმოდგენის დროს პრინცი ჰენრი დედას, დედოფალ ვიქტორიას, გერმანულად შეეკითხა: "დედა, თქვენ ფიქრობთ რომ ისინი ნამდვილი კაზაკები არიან?“
იქვე მდგომმა ველური დასავლეთის შოუს მენეჯერმა სოლსბერიმ პრინცს უპასუხა: ,,მომიტევეთ, სერ, მაგრამ რასაც და ვისაც აქ ხედავთ, ყველაფერი ნაღდია".
რა იცოდა მისმა აღმატებულებამ, რომ რუსი კაზაკების მაგივრად მის წინაშე უბრალო ბახველი და ლანჩხუთელი გლეხები ჯირითობდნენ.
სხვათაშორის, ეს დედოფლისა და გურულების პირველი შეხვედრა არ ყოფილა. ცნობილია, რომ მე-19 საუკუნის 60-იანი წწ დასაწყისში ლონდონში იმყოფებოდა თავადი დიმიტრი ქაიხოსროს ძე გურიელი, რომელიც დედოფალმა ვიქტორიამ მიიწვია სადილზე, სადაც ეროვნულ ტანსაცმელში გამოწყობილ გურიელს საზოგადოების ყურადღება მიუქცევია.
ნაწყვეტი ირაკლი მახარაძის წიგნიდან
,,ველური დასავლეთის მხედრები: გურული მოჯირითეები ამერიკასა და ევროპაში".
ფოტოზე თანამედროვეს ნახატი – გურულები უინძორში.
