საქართველოს პრეზიდენტის მრჩევლის, კახა კოჟორიძის საკუთრებაში ბინა, საცხოვრებელი სახლი და მსუბუქი ავტომანქანაა.
ამის შესახებ კოჟორიძის ქონებრივ დეკლარაციაშია აღნიშნული, რომელიც მან 2016 წლის 23 მარტს შეავსო.
დეკლარაციის მიხედვით, კახა კოჟორიძე თბილისში, ქობულეთის ქუჩაზე მდებარე 54.00 კვ.მ-ის ფართობის საცხოვრებელი სახლის და თბილისში, დიდ დიღომში, ვეფხისტყაოსნის ქუჩაზე მდებარე 114.00 კვ.-ის ფართობის ბინის 100%-იანი მფლობელია.
გარდა ამისა, კოჟორიძის საკუთრებაშია მსუბუქი ავტომანქანა „მიცუბიშ აირტრეკი“.
რაც შეეხება მისი ოჯახის ფინანსურ მდგომარეობას, 2015 წელს საერთო 74 823 ლარის შემოსავალი ჰქონდათ; დეკლარაციის შევსებისას კი, საბანკო ანგარიშებზე 4 902 ლარი, 10 250 დოლარი და 1345 ევრო იყო.
კერძოდ, კახა კოჟორიძეს, 2015 წელს, საქართველოს ახალგაზრდა იურისტთა ასოციაციის თავმჯდომარის თანამდებობიდან 1369.00 ლარის შემოსავალი ჰქონდა მიღებული; საქართველოს პრეზიდენტის მრჩევლის თანამდებობიდან კი, 57554.00 ლარი; რაც შეეხება მისი მეუღლის, თინათინ ჩანადირის შემოსავალს დეკლარაციაში აღნიშნულია, რომ მან სსიპ "ლევან სამხარაულის სახელობის ექსპერტიზის ეროვნული ბიუროს" დაგეგმვის და შესყიდვების სამმართველოს მთავარი სპეციალისტის პოსტიდან 15900.00 ლარის შემოსავალი აქვს მიღებული.
დეკლარაციაში ასევე აღნიშნულია, რომ კახა კოჟორიძის სახელზე 22 000-დოლარიანი იპოთეკური სესხია, რომლის დაფარვის ვადა 2016 წელს იწურება. სესხის პროცენტის დასაფარად კი, კოჟორიძემ წინა წელს, საქართველოს ბანკს 5286.00 დოლარი გადაუხადა.
ამავე ბანკიდან აქვს აღებული 7 100-ლარიანი სეხსხიც, რომლის დაფარვის თარიღიც ასევე 2016 წელია, პროცენტისთვის კი, 2015 წელს 3920 ლარი აქვს გადახდილი.
დეკლარაციაში ასევე აღნიშნულია, რომ 2016 წლის 20 იანვარს 35 000 დოლარად ბინა გაყიდა, 2016 წლის 11 მარტს კი, 60 570-დოლარიანი ბინა შეიძინა. ბინის საფასურის ნაწილი, 30 000 დოლარი, კოჟორიძემ საქართველოს ბანკიდან სესხის სახით გამოიტანა.
დეკლარაციის მიხედვით, პრეზიდენტის მრჩევლის ოჯახი არ ფლობს ფასიან ქაღალდებსა და ძვირადღირებულ ნივთებს.
