დღეს ოზურგეთში, დემოკრატიული ჩართულობის ცენტრში ორგანიზაცია"რადარამმა" გამართა ტომ ვანდერბილთის წიგნის "საგზაო მოძრაობა: რატომ ვატარებთ მანქანას ისე, როგორც ვატარებთ (და რას ამბობს ეს ჩვენ შესახებ)"თარგმანის პრეზენტაცია.
"მნიშვნელოვანი შეკითხვა რომელსაც ავტორი სვამს, არის ის, თუ რატომ არ ვართ ჩვენ ისეთი კარგი მძღოლები, როგორიც გვგონია რომ ვართ?! მანქანის მართვა საკმაოდ რთულია და როგორც წიგნიდან შევიტყვე, მართვის მომენტი ერთდროულად 1500-მდე უნარს მოიცავს, ვახდენთ საფრთხეების გაანალიზებას, ვიღებთ გადაწვეტილებებს, ვახდენთ სიჩქარის და რისკების შეფასებას, ვწინასწარმეტყველებთ რა შეიძლება მოიმოქმედონ სხვებმა და როგორი რეაქცია უნდა გვქონდეს ჩვენ ამაზე. ამასთან ერთად შეიძლება ვსვამდეთ ყავას, ვფიქრობდეთ სხვადასხვა თემებზე, ვესაუბრებით მგზავრს. წიგნის ამ მონაკვეთის გაცნობის შემდეგ მიხვდებით, თუ რა ტიტანურ შრომასთან არის დაკავშირებული ავტომობილის მართვა და რამხელა უნარებია საჭირო ამისთვის. ასე რომ, ვისაც მართვის მოწმობა გვაქვს და ავტომანქანებს ვმართავთ, უნდა ვიამაყოთ ჩვენი შესაძლებლობებით, ხოლო ვინც ამისკენ მიისწრაფის, უნდა იცოდეს, რომ მათი უნარების დემონსტრირების საუკეთესო საშუალება ეძლევათ. გარდა ამისა, მანქანის მართვა ერთგვარი დიეტაცაა, მუდმივი დაძაბულობა ხელს უწყობს კალორიების წვას." – თქვა ერთ-ერთმა მომხსენებელმა, ოზურგეთელმა ვახო გველებიანმა, რომელმაც ვრცლად ისაუბრა წიგნის შესახებ და დეტალურად მიაწოდა ინფორმაცია, თუ რატომ უნდა წაიკითხოს მძღოლებმა და არა მარტო მძღოლებმა ეს წიგნი.
"როგორც მწერალი აღნიშნავს, კვლევების მიხედვით, ქალები უფრო მეტ ხერგილს წარმოქმნიან გზებზე, ვიდრე კაცები, თუმცა აქვე აღნიშნავს რომ ეს სადაო საკითხია და ამის მაგალითად მეორე კვლევა მოყავს, რომლის მიხედვითაც, ქალები საჭესთან კაცებზე უარესად არ იქცევიან. კვლევების მიხედვით, ქალების მანქანით გადაადგილების თითქმის ნახევარზე მეტი იმაზე მოდის, რომ მათ მგზავრს სურდა სადღაც წასულიყო და არა მათ. ქალებს უწევთ ბავშვების მომსახურება, იქნება ეს ბაღი, სკოლა, სხვადასხვა წრეები თუ რეპეტიტორები…ვანდერბილთის აზრით, არასწორია ქალი დაადანაშაულო საცობის შექმნაში, რადგან ოჯახები იძულებული არიან სწორედ ასე იცხოვრონ, ავტომობილი არის ბალანსის დამყარების საშუალება ოჯახის ორ მომუშავე წევრს შორის." – გვითხრა ვახო გველებიანმა.
წიგნში მოყვანილია კვლევები, რომელთა მიხედვითაც, მძღოლების უმრავლესობა რომელსაც სთხოვეს, თავი შეედარებინათ "საშუალო მძღოლისთვის" აღნიშნავს, რომ ისინი უკეთესები არიან. რაც არ უნდა იყოს მიზეზი, საკმაოდ სერიოზული საფუძველი არსებობს იმისა, რომ ჩავთვალოთ ჩვენი ცხოვრების ყველა სფეროში, ზედმეტად მაღალ შეფასებას ვაძლევთ საკუთარ თავს, რაც დამაფიქრებელი და ავტორის აზრით ბევრი პრობლემის განმაპირობებელია.
ეს წიგნი 2008 წელს გამოიცა და უკვე ოცზე მეტ ენაზე ითარგმნა, ის დღემდე "New York Times"-ის, "Washington Post"-ისა და "Amazon"-ის ყველაზე მოთხოვნადი წიგნების სიაშია.
"რადარამის" წარმომადგენელი მარიამ ადუაშვილი ამბობს, რომ ტომ ვანდერბილთის წიგნით უამრავ რამეს გაიგებთ საკუთარ თავზე და მათზე, ვინც საცობებში ყოფნისას თავისი უწესო ქცევით გაღიზიანებთ.
მისივე თქმით, კარგი იქნება თუ ამ საკითხზე კიდევ ერთი დისკუსია გაიმართება.
"როდესაც წიგნს წაიკითხავთ, კარგი იქნება თუ კიდევ ერთი შეხვედრა შედგება და მოხდება განხილვა. ასევე კარგი იქნება თუ საპატრულო პოლიციის წარმომადგენლებიც დაესწრებიან", – თქვა მარიამ ადუაშვილმა.
წიგნის პრეზენტაციაზე მყოფმა, ერთ-ერთმა მამაკაცმა თქვა, რომ ქალაქ ოზურგეთში პირველ რიგში შუქნიშანი არის გასაკეთებელი.
"არც კი მახსოვს რამდენი ხანია არსებობს ეს პრობლემა და კარგი იქნება, თუ საგზაო ნიშნები მოწესრიგდება ქალაქში. განსაკუთრებით კი ვითხოვთ შუქნიშანის გაკეთებას" – ითქვა შეხვედრაზე.
.jpg_16942.jpg)
