ოზურგეთის ალექსანდრე წუწუნავას დრამატულ თეატრში 148-ე საგაზაფხულო სეზონი ცნობილი დრამატურგის ელჩინის "შექსპირით" გაიხსნა. ამ დრამატურგს კარგად იცნობენ არა მხოლოდ აზიაში, არამედ ევროპაშიც. მისი პიესები დადგმულია ბრიტანეთის, რუსეთის, პოლონეთისა და საფრანგეთის თეატრების სცენებზე.
"მინდა გითხრათ პირველ რიგში მადლობა იმისთვის, რომ მობრძანდით და ამ გამყინვარებაში დაინტერესდით ჩვენი პრემიერით. დღეს რეჟისორი ოთარ კუტალაძე ელჩინის “შექსპირს“ წარმოგიდგენთ. ელჩინი მეტად ცნობილი დრამატურგია და ის ასევე გახლავთ აზერბაიჯანის ვიცე-პრემიერი. დარბაზში ასევე იმყოფებიან აზერბაიჯანის ვიცე-კონსული და ტელევიზიების ITV-ს და AZtv-ს ჟურნალისტები." – თქვა სპექტაკლის დაწყებამდე თეატრის სამხატვრო ხელმძღვანელმა ვასილ ჩიგოგიძემ.
ვასილ ჩიგოგიძემ ასევე დარბაზში მსხდომ პირებს თხოვა, რომ წუთიერი დუმილი მიეგოთ პატივი იმ დაღუპულების ხსოვნისთვის, რომელიც სომხეთისა და აზერბაიჯანის კონფლიქტის დროს დაიღუპნენ.
პიესის გმირები ფსიქიატრიული საავადმყოფოს ბინადრები არიან, რომლებიც შექსპირის პიესებს სახელდახელოდ დგამენ და შექსპირის ცნობილ პერსონაჟებს საკუთარ ცხოვრებას უსადაგებენ. სპექტაკლზე, რომლის პრემიერაც ოზურგეთის თეატრის დიდ სცენაზე აპრილშია ჩანიშნული, აგრეთვე მუშაობენ მხატვარი თამაზ დარჩია და ქორეოგრაფი მარიკა ქვეთაია. სპექტაკლის მუსიკალური გადაწყვეტა თავად რეჟისორს ეკუთვნის.
სპექტაკლში შექსპირის პერსონაჟებთან ერთდ პოლიტიკური ფიგურებიც ჩნდებიან. მათ შორის სტალინი, რომლის როლს ალექსანდრე ლომიძე ასრულებს.
სპექტაკლის მთავარი მიზანია მაყურებელს შეახსენოს, რომ ადამიანთა ურთიერთობაში მთავარია სიყვარული და გულწრფელობა, რომელიც დასძლევს ბოროტებას, შურიანობასა და დაამარცხებს გაუტანლობას.
