თბილისის სახელმწიფო უნივერსიტეტის რექტორის მოვალეობის შემსრულებლის მსურველი ერთ-ერთი კანდიდატის ცირა ბარამიძის განცხადებით, ისტორიის მანძილზე, უნივერსიტეტის პირველად ეძლევა შანსი, რომ რექტორის მოვალეობის შემსრულებელი ფართო ლეგიტიმაციით აირჩიოს. თუმცა, ბარამიძე აღნიშნავს, რომ პროფესორ-მასწავლებლების ნაწილს არჩევნებში მონაწილეობის უფლებას კანონი არ აძლევს, რასაც ის კანონის ხარვეზად მიიჩნევს.
"ეს კანონი პარადოქსია, რის მიხედვითაც მოვალეობის შემსრულებელს ვირჩევთ. პროფესურის, მეცნიერების, მათ შორის შემოერთებული უნივერსიტეტების მეცნიერ-თანამშრომლების მონაწილეობა მინდა იყოს აქტიური და გახსნილი.
ასეთი ფაქტი დაფიქსირდა, რომ მოვიდნენ გუშინ მხცოვანი მეცნიერები და განაცხადეს, რომ არა აქვთ ხმის უფლება არჩევნებში მონაწილეობა მიიღონ, მიუხედავად იმისა, რომ მათ მეცნიერებათა დოქტორის, ანუ ნამდვილი დოქტორის ხარისხი აქვთ რამდენიმე ინსტიტუტში. ასეთი სულ 4 ინსტიტუტია. აქედან ორი უშუალოდ თსუ-ს ფრთის ქვეშაა, ვეკუას სახელობის გამოყენებითი მათემატიკისა და მაღალი ენერგიების ფიზიკის ინსტიტუტი. ესენი ჩვენთან იყვნენ და იმის გამო, რომ ჩვენთან იყვნენ, უფრო დაისაჯნენ, ვიდრე ის ინსტიტუტები, რომლებიც ბოლო პერიოდში შემოუერთდნენ თბილისის სახელმწიფო უნივერსიტეტს.
თითქოს ამით კანონი არ დარღვეულა, მაგრამ ეს კანონია აბსურდულად შედგენილი. ვინ მონაწილეობს რექტორის მოვალეობის შემსრულებლის არჩევაში, სამეცნიერო ხარისხის მქონე ან მასთან გათანაბრებული ხარისხის მქონე თანამშრომლები, არ არის ამ კანონში ჩანაწერი, რაც გაუგებრობას იწვევს", _ აღნიშნა ბარამიძემ.
მან პროფესორებს, რომლებსაც აქვთ არჩევანის გაკეთების საშუალება, მოუწოდა, "განახორციელონ სწორი არჩევანი, უთხრან არა ძველებურ მართვას, პოსტსაბჭოურ გადმონაშთებს და ვერტიკალურ მართვას".
"ჩემი მთავარი მოტივაციაა შევქმნათ ჭეშმარიტი უნივერსიტეტი, თავისი სამოქალაქო ინსტიტუციით, როგორიც უნდა იყოს საერთოდ უნივერსიტეტი, როგორიც ის ჯავახიშვილმა შექმნა.
უნივერსიტეტი თავისი არსით სამოქალაქო ინსტიტუციაა და ეს რეალურად უნდა განხორციელდეს. პროფესურამ თვითონ უნდა მართოს უნივერსიტეტი და მიიღოს მონაწილეობა საკანონმდებლო შემოქმედებაში. კანონები არ უნდა იწერებოდეს ზემოდან ბენეფიციარებთან შეთანხმების გარეშე. ეს არის ჩემი მთავარი მესიჯი.
თუ ჩვენ ვაშენებთ თავისუფალ, დემოკრატიულ სახელმწიფოს, მაშინ უნივერსიტეტს სრული ავტონომია უნდა მიეცეს. ეს კი გულისხმობს საკანონმდებლო ცვლილებებისთვის ბრძოლას", _ აღნიშნა ბარამიძემ და დასძინა, რომ საკანონმდებლო ცვლილებებზე მუშაობა უკვე დაწყებული აქვს.
"გახლავართ პროფესორების საინიციატივო ჯგუფის წევრი. გავწერეთ, მოკლევადიანი და გრძელვადიანი საკანონმდებლო ცვლილებები გეგმა. თუ ეს საკანონმდებლო ცვლილებები არ განხორციელდა, მაშინ უნივერსიტეტში არაფერი შეიცვლება და შესაძლოა, 3-4 წლის შემდეგ იგივე პრობლემების წინაშე დავდგეთ. იქნება პოლარიზებული სტუდენტობა, პოლარიზებული პროფესურა და ისეთი კანონმდებლობა, რომლითაც ძალაუფლების მქონე ხელისუფლებას მანიპულაციების შესაძლებლობა ექნება", _ აღნიშნა ჟურნალისტებთან საუბრისას ბარამიძემ.
თუმცა, რექტორის მოვალეობის შემსრულებელს, ვლადიმერ პაპავას მიაჩნია, რომ რექტორის მოვალეობის შემსრულებლის არჩევა კანონით სწორად არის განსაზღვრული. როგორც პაპავამ ბარამიძის მოსაზრების კომენტირებისას განაცხადა, კანონში წერია, რომ რექტორის მოვალეობის შემსრულებელს ირჩევს საარჩევნო კოლეგია.
"იქვე წერია, რომელი პიროვნებებისგან შედგება ეს კოლეგია. ეს არის აკადემიური და სამეცნიერო პერსონალი, რომელთაც აქვთ დოქტორის ხარისხი. აქ არის ყველა მოქმედი პროფესორი, მეცნიერი, ვისაც ეს სტატუსი გააჩნია. დღეს ეს არის 1332 ამომრჩეველი. ამ მასშტაბის არჩევნები ჩვენს უნივერსიტეტში კი არა, სრულიად საქართველოს უნივერსიტეტებში არ ჩატარებულა. პირველად ტარდება ასეთი არჩევნები. ბუნებრივია, 1332-ში ვიღაც ვერ მოხვდებოდა, მაგრამ ვინ უნდა მოხვედრილიყო ამ სიაში, კანონმა განსაზღვრა", _ აღნიშნა პაპავამ.
შეგახსენებთ, რომ თსუ-ს რექტორის მოვალეობის შემსრულებლის პოსტისთვის 4 კანდიდატი იბრძვის: დარეჯან თვალთვაძე, ცირა ბარამიძე, გიორგი ანდრიაძე და ლევან გორდეზიანი.
არჩევნები ხვალ, 20 აპრილს გაიმართება.
