"საქართველოს ადვოკატთა ასოციაციის" თავმჯდომარე, ზაზა ხატიაშვილი პარლამენტს ღია წერილით მიმართავს. ზაზა ხატიაშვილი დეპუტატებს მოუწოდებს, იუსტიციის უმაღლესი საბჭოს მდივან ლევან მურუსიძეს გაემიჯნონ.
ადვოკატთა ასოციაციის" თავმჯდომარის მიმართვას უცვლელად გთავაზობთ:
"პატივცემულო პარლამენტის წევრებო, ვისაც შეგრჩათ ელემენტარული ღირსება! გაემიჯნეთ მურუსიძეებს.
საპარლამეტო უმრავლესობის წევრებო, პარლამენტში იხილება კანონპროექტი, რომელიც სასამართლო რეფორმის მესამე ტალღას ეხება და შესწორებების გარეშე თუ მიიღებთ, მთელი დისციპლინური სამართალწარმოება გირგვლიანის მოსამართლე ლევან მურუსიძის ხელში აღმოჩნდება, რაც იქნება სასამართლოს საბოლოო დასამარება.
საპარლამენტო უმრავლესობამ, პარლამენტის დარბაზში შესვლის შემდეგ, პარლამენტის თავმჯდომარის ინიციატივით წუთიერი დუმილით პატივი მიაგეთ ირინა ენუქიძის ხსოვნას, დადიოდით მის საფლავზე და პოლიტიკურ კარიერას იკეთებდით, მაგრამ საქმე საქმეზე რომ მიდგა, იუსტიციის საბჭოში თქვენს მიერ არჩეულმა სამმა პირმა, სავარაუდოდ ივანიშვილის ინიციატივით, გირგვლიანის მოსამართლე ლევან მურუსიძეს დაუჭირა მხარი.
2015 წლის 25 დეკემბერს იუსტიციის უმაღლესმა საბჭომ ხმა მისცა გირგვლიანის, მიქიაშილის და სხვა მრავალ საქმეზე უკანონო გადაწყვტილებების თანამონაწილე ლევან მურუსიძეს. იუსტიციის უმაღლესი საბჭო იქცა ორგანოდ, რომელიც აკეთებს რაც უნდა. ჩემი შეფასებით, იუსტიციის საბჭო ამდენ უკანონობას ივანიშვილის გარეშე ვერ მიიღებდა, რაც ქვეყანაში სამართლიანი სასამართლოს განვითარებისთვის სავალალოა. რამოდენიმე კვირის უკან, ლევან მურუსიძემ იუსტიციის უმაღლეს საბჭოს ქ.თბილისის საქალაქო სასამართლოს თავმჯდომარის თანამდებობაზე დასამტკიცებლად გირგი მიქაუტაძის კანდიდატურაწარუდგინა ისე,რომ უზენაესი სასამართლოს და იუსტიციის უმაღლესი საბჭოს თავმჯდომარემ მისი კანდიდატურის შესახებ სხდომაზე გაიგო.
ვინაიდან, თქვენი პარლამენტი არის უმოქმედო და შუშის სასახლის მბრძანბელზე მიბმული დაწესებულება, თუ არ შეგიძლიათ რაიმე მოუხერხოთ მურუსიძეებს, შეწყვიტეთ ლევან მურუსიძის მხარდაჭერა საკანონმდებლო დონეზე.
სამოქალაქო საზოგადოებას, ერთადერთი იმედი დაგვრჩა დამოუკიდებელი ინსპექტორის ინსტიტუტის სახით, რომლის არჩევის უფლება არ უნდა მივცეთ ლევან მურუსიძეს და ამ სამარცხვინო იუსტიციის საბჭოს.
საქართველოს იუსტიციის სამინისტროს ინიციატივით, პარლამენტში საკანონმდებლო ცვლილებათა პაკეტია წარდგენილი, რომელიც იუსტიციის უმაღლესი საბჭოს დამოუკიდებელი ინსპექტორის ინსტიტუტის შემოღებასითვალისწინებს. დამოუკიდებელ ინსპექტორს ენიჭება უფლებამოსილება, ნებისმიერი მოსამართლის წინააღმდეგ დაიწყოს დისციპლინური სამართალწარმოება და სრული მოცულობით აწარმოოს დისციპლინური საქმის წინასწარი შემოწმება და მოკვლევა (საერთო სასამართლოების მოსამართლეთა დისციპლინური პასუხისმგებლობის და დისციპლინური სამართალწარმოების მე-7, მე-8 და მე-12 მუხლები).
"საერთო სასამართლოების შესახებ" კანონის 511 მუხლის თანახმად, დამოუკიდებელ ინსპექტორს, 5 წლის ვადით, წევრთა უმრავლესობით, იუსტიციის უმაღლესი საბჭოირჩევს.
დღეს არსებული მდგომარეობის გათვალისწინებით,იუსტიციის უმაღლეს საბჭოში, ჩვენ შეიძლება მივიღოთ მხოლოდ ინსპექტორი, ყოველგვარი დამოუკიდებლობის გარეშე, ე.ი რიგითი მურუსიძე, მოსამართლეები იქნებიან მურუსიძეების გავლენის ქვეშ და გააკეთებენ იმას რაც იქნება მურუსიძეებისთვის მისაღები.
იმისათვის, რომ თავიდან იქნას აცილებული დისციპლინური ძალაუფლების უზურპაცია პირთა ვიწრო ჯგუფის ხელში, გთავაზობთ, დამოუკიდებელი ინსპექტორი აირჩიოს არა იუსტიციის უმაღლესმა საბჭომ, არამედ საქართველოს პარლამენტმა, საქართველოს პრეზიდენტის წარდგინებით, საერთო სასამართლოების შესახებ კანონის 36-ე მუხლის პირველი პუნქტით დადგენილი წესით", – ნათქვამია ზაზა ხატიაშვილის ღია წერილში.
