რატომ უპირისპირდება ამაღლების მოსახლეობა კომპანია “ჯეოსელს”

ჩოხატაურის მუნიციპალიტეტის სოფელ ამაღლების  მოსახლეობა კომპანია „ჯეოსელის“ წარმომადგენლებს სოფელში ანძის დადგმის საშუალებას არ აძლევს.
ადგილობრივების თქმით, ძლიერი გამოსხივების მქონე ანძა დასახლებულ პუნქტში მონტაჟდება:

_ არ მივცემთ უფლებას ანძის მონტაჟის. კომპანიამ მოგება ჩვენი ჯანმრთელობის ხარჯზე არ უნდა ნახოს, _ აღნიშნავენ ჩვენთან საუბრისას ამაღლების მაცხოვრებლები.

როგორც გვითხრეს საუბარია ინტერნეტის სიჩქარის გამაძლიერებელ მოწყობილობაზე, რომელიც დასახლებულ პუნქტთან ახლოს უნდა დაიდგას.

„ჯეოსელს“ შესაბამისი სამუშაოები უკვე დაწყებული აქვს, თუმცა, როგორც ავღნიშნეთ, გაგრძელების საშუალებას მოსახლეობა არ აძლევს. უფრო მეტიც, ამის გამო,  გუშინ, ადგილობრივებსა და კომპანიის წარმომადგენლებს შორის ფიზიკური და სიტყვიერი დაპირისპირებაც მოხდა.

_ მოსახლეობამ მოახერხა და ანძისთვის განკუთვნილი ახალგათხრილი ორმო მუშებს ამოავსებინა, თუმცა არ გაქვს გარანტია, რომ სამუშაოებს ისევ არ გააგრძელებენ, _ აღნიშნეს „გურია ნიუსთან“ საუბრისას ამაღლების მაცხოვრებლებმა.

აღნიშნულის შესახებ საქმის კურსშია ჩოხატაურის მუნიციპალიტეტის ხელმძღვანელობაც.

_ როგორც ვიცი კომპანია „ჯეოსელს“ ხელშეკრულება აქვს კერძო პირთან და ანძა კერძო ტერიტორიაზე იდგმება. ჩვენთან დოკუმენტაცია ჯერ არ წარმოუდგენიათ და  ველოდებით, მაგრამ თუ საქმე ეხება კერძო პირს, ჩვენ ამ შემთხვევაში ვერ ჩავერთვებით, _ გვითხრა კუჭავამ.

კომპანია „ჯეოსელში“ ამბობენ, რომ ანტენები მოსახლეობის ჯანმრთელობისთვის სრულიად უსაფრთხოა:

_  წუხილი და საზოგადოების გარკვეულ ნაწილში გავრცელებული აზრი ჯეოსელის მოდემების (ანტენების) მავნე გამოსხივებაზე, საფუძველს მოკლებულია და არ შეესაბამება სინამდვილეს. აღნიშნული ანტენები წარმოებულია ევროკავშირის მიერ მიღებული კონვენციის (საქართველო ამ კონვენციას შეუერთდა 1998 წელს) მიხედვით გაცემული სპეციალური ლიცენზიით და მკაცრი ნორმების მიხედვით, რომლებიც ითვალისწინებს ადამიანებზე გარემოზე (მცენარე ცხოველი და ა.შ) სრულ უსაფრთხოებას.

აღნიშნული ანტენები განლაგებულია მსოფლიოს ყველაზე ცივილიზებულ ქვეყნებში, ასევე საქართველოს სხვადასხვა რეგიონში, დიდ ქალაქებში, საჯარო სკოლებზე,საავადმყოფოებზე, მაღალსართულიან კორპუსებზე, კერძო სახლებზე, სახელმწიფო დაწესებულებებზე  და ა.შ, _ გვთხრეს კომპანიის პრესსამსახურში.

შენიშვნა: ფოტოები მოგვაწოდა თაკო დოლიძემ