2016-2017 სასწავლო წლისათვის, პირველკლასელთა საყოველთაო ელექტრონული რეგისტრაცია რამდენიმე წუთის წინ დაიწყო.
განათლების მართვის საინფორმაციო სისტემის ინფორმაციით, ამ დროისთვის რეგისტრაციის პროცესი შეფერხებების გარეშე მიმდინარეობს.
როგორც "გურია ნიუსს" განათლების მართვის საინფორმაციო სისტემის მარკეტინგისა და საზოგადოებასთან ურთიერთობის სამსახურის უფროსმა ზაზა ტყემალაძემ განუცხადა, ჯერჯერობით დარეგისტრირებულთა მონაცემები დათვლილი არ არის.
"9:00 საათიდან მიმდინარეობს რეგისტრაცია. ყოველგვარი შეფერხებების გარეშე. არანაირი ტექნიკური ხარვეზი არ ყოფილა", _ აღნიშნა ტყემალაძემ.
მისივე ინფორმაციით, სკოლების ნაწილში არსებული ლიმიტები უკვე ამოწურულია.
"მინდა გითხრათ, რომ ჩემი შვილი სასურველ სკოლაში ვერ დავარეგისტრირე და სხვა სკოლაში დავრეგისტრირდით", _ აღნიშნა ტყემალაძემ.
ცნობისთვის, რეგისტრაცია ხორციელდება განათლების მართვის საინფორმაციო სისტემის სპეციალურ ვებგვერდზე (www.registration.emis.ge) და დასრულდება 25 მაისს – 20:00 საათზე.
ზოგადსაგანმანათლებლო დაწესებულებებში II ეტაპზე რეგისტრირებული მოსწავლის ჩასარიცხად აუცილებელი დოკუმენტების მიღება განხორციელდება 30 მაისიდან 10 ივნისის ჩათვლით.
რეგისტრაციის სისტემაზე გადასვლა შესაძლებელი იქნება ასევე, საქართველოს განათლებისა და მეცნიერების სამინისტროს ვებგვერდზე განთავსებული ბმულიდან.
მოსწავლის დასარეგისტრირებელად, აუცილებელია რეგისტრაციის სისტემაში, შესაბამის ველებში მიუთითოთ ბავშვის პირადი ნომერი, სახელი, გვარი, მშობლის მონაცემები (სახელი, გვარი, პირადი ნომერი, მობილური ტელეფონის ნომერი, სურვილის შემთხვევაში ელექტრონული ფოსტა), აირჩიოთ სასურველი სკოლა და დააჭიროთ რეგისტრაციის ღილაკს. რეგისტრაციის წარმატებით განხორციელების შემთხვევაში, რეგისტრაციის უნიკალურ კოდს რეგისტრატორი მიიღებს, როგორც მოკლე ტექსტური შეტყობინების, ასევე ელექტრონული ფოსტის საშუალებით.
I და II ეტაპზე მოსწავლის ჩასარიცხად აუცილებელი დოკუმენტების განსაზღვრულ ვადებში წარუდგენლობის შემთხვევაში, რეგისტრაცია ავტომატურად უქმდება.
ამავე თემაზე:
როგორ დავარეგისტრიროთ პირველკლასელი საჯარო სკოლაში (ინსტრუქცია)
