ოზურგეთის მუნიციპალიტეტის სოფელ ვაკიჯვარში, მდინარე ნატანებზე სამსაფეხურიანი ჰესის მშენებლობა იგეგმება.
რამდენიმე დღის წინ, გურიის გუბერნიის სააქტო დარბაზში, "ნატანები 2 ჰესის" მშენებლობისა და ექსპლუატაციის პროექტის პრეზენტაცია გაიმართა. დარბაზში მყოფ საზოგადოებას შპს "ენერჯი სოლოუშენის" წარმომადგენლებმა გარემოზე ზემოქმედების შეფასების ანგარიში წარმოუდგინეს.
საჯარო განხილვაზე ატმოსფერული ზემოქმედების ხარისხზე (ემისიები, ხმაურის გავრცელება), ასევე, ზედაპირულ წყლებზე, მიწისქვეშა გრუნტის წყლებზე, ბიოლოგიურ გარემოზე, ნიადაგის ნაყოფიერ ფენაზე, ლანდშაფტზე, ჯანმრთელობასა და უსაფრთხოებაზე ზემოქმედებისა და დასაქმებასთან დაკავშირებულ საკითხებზე იმსჯელეს.
შეხვედრას გურიის გუბერნატორი გია სალუქვაძე, საქართველოს გარემოსა და ბუნებრივი რესურსების დაცვის სამინისტროს წარმომადგენელი ირაკლი ფირცხალაიშვილი, სოფელ ვაკიჯვრის მცხოვრებლები და მედიის წარმომადგენლები დაესწრნენ.
პროექტის დამტკიცების შემთხვევაში, ჰესის მშენებლობა ვაკიჯვრის ტერიტორიულ ერთეულში მომავალი წლის გაზაფხულზე დაიწყება. პროექტის სავარაუდო ღირებულება 15 მილიონ დოლარს შეადგენს.
გურიის გუბერნატორმა გია სალუქვაძემ შეხვედრაზე განაცხადა, რომ კარგი იქნებოდა თუ მსგავსი შეხვედრა სოფელ ვაკიჯვარში ჩატარდება:
"ძალიან დეტალურად უნდა მოხდეს ამ საკითხებზე საუბარი და აქედან გამომდინარე, უნდა ელოდოთ ბევრ კითხვას. კარგი იქნება, ვაკიჯვარში თუ მოეწყობა მსგავსი შეხვედრა. მოსახლეობისგან უფრო მეტი კითხვა წამოვა და მათ კითხვებს აუცილებლად უნდა გაეცეს პასუხი.
რეგიონი ამ ჰესების მშენებლობით მიიღებს შემოსავლებს, რაც აისახება ადგილობრივ ბიუჯეტზე. ჩვენ მზად ვართ, მოგისმინოთ და გავეცნოთ "ნატანები 2" ჰესის მშენებლობის ყველა ნიუანსს.
ინვესტიცია იდება, რეგიონი და ქვეყანა მიიღებს სარგებელს, მაგრამ უნდა ვიფიქროთ იმაზეც, რომ ერთი მოჭრილი ხის გაზრდას ასობით წელიწადი.
არ შეიძლება, არ აღვნიშნო ის ფაქტი, რომ ჰესები საქართველოს სიმდიდრეა, ჩვენ არ გვაქვს ნავთობი, ჩვენ გვაქვს ჰიდრორესურსები. მთელ მსოფლიოში ატომური სადგურები იხურება და, ფაქტობრივად, გადასულები არიან ქარის, ჰიდრო და ბუნებრივ ენერგიის მიმღებ სეგმენტზე, რომელიც ნაკლებად დააზიანებს გარემოს. ის წუხილი, რომელიც უკვე დაფიქსირდა ამ პროექტის თაობაზე, არ გაიგოთ ისე, რომ ჩვენ ჰესის მშენებლობის წინააღმდეგნი ვართ", _ თქვა გია სალუქვაძემ.
შპს "ენერჯი სოლოუშენის" წარმომადგენლების თქმით, ყველა იმ შენიშვნას, კითხვას, რეკომენდაციას, რომელიც სამი შეხვედრის დროს გაისმა, აუცილებლად მიექცევა სათანადო ყურადღება:
"ეს შეხვედრები იმის გამო ტარდება, რომ ყველას მოსაზრება გავიგოთ და, შესაბამისად, მოხდეს შენიშვნებზე რეაგირება. ჩვენ ვგეგმავთ სოფელში შეხვედრას თუ, რა თქმა უნდა, ამის საჭიროება იქნება და მოსახლეობა მოითხოვს", _ განაცხადეს შპს "ენერჯი სოლოუშენის" წარმომადგენლებმა.
"გურია ნიუსის" კითხვაზე _ რა სარგებელი დარჩება ოზურგეთის მუნიციპალიტეტს" ნატანები 2" ჰესის მშენებლობით, კომპანიის წარმომადგენელმა ასე გვიპასუხა: "ადგილობრივ ბიუჯეტში, როგორც მშენებლობის, ასევე, ექსპლუატაციის დროს, ქონების გადასახადის 1%-ი შევა".
საქართველოს გარემოსა და ბუნებრივი რესურსების დაცვის სამინისტროს წარმომადგენელმა შეხვედრაზე 47-პუნქტიანი შენიშვნა წარმოადგინა:
"გზშ-ს ანგარიშში აღნიშნულია, რომ მდინარე ნატანები ჰიდროლოგიურად, პრაქტიკულად, შეუსწავლელია (არსებობს მხოლოდ 7-წლიანი ჰიდროლოგიური რიგი ჰ/ს ქორისბუდე) წყლის ხარჯების დასადგენად გამოყენებულ იქნა მდინარე ბახვისწყალის, ჰ/ს ბახმაროსა და ჰ/ს ქვედა ბახვის საშუალო წლიურ ხარჯებს შორის დამყარებული სწორხაზოვანი კორელაციური კავშირით. გარდა ამისა, დასაზუტებელია მდინარე ნატანების წლიური ხარჯების, საქართველოს მეცნიერებათა აკადემიის ვახუშტის სახელობის გეოგრაფიის ინსტიტუტში დამუშავებულ მონოგრაფიაში "საქართველოს წყლის ბალანსი". დადგენილი მეთოდით შეფასებისას მიღებული განსხვავებაც. ყოველივე აქედან გამომდინარე ეკოლოგიურ ექსპერტიაზე წარმოდგენილ გზშ-ს ანგარიშში უნდა მიეთითოს, თუ რამდენად არის მართებული მდ. ბახვისწყლის ანალოგად გამოყენება და რამდენად იქნება მისი მონაცემები მიზანშენწონილი".
ამავე დოკუმენტში საუბარია, რომ "მეტეოროლოგიური პარამეტრების" ცხრილში წარმოდგენილი ინფორმაცია ქარის მაქსიმალური სიჩქარის შესახებ არ შეესაბამება დაკვირვების მასალებს პროექტში მითითებული პუნქტებისთვის (ოზურგეთი-ბახმარო).
დოკუმენტი აღნიშნულია, რომ ეკოლოგიურ ექსპერტიზაზე წარმოდგენილ გზშ-ს ანგარიშს თან უნდა ერთოდეს გარემოზე ზემოქმედების შეფასების პროცესში საზოგადოების მონაწილეობის შედეგების განხილვის მასალები. საზოგადოების წარმომადგენელთა შენიშვნებისა და მოსაზრებების გაუთვალისწინებლობის შემთხვევაში, საქმიანობის განმახორციელებელი ვალდებულია უზრუნველყოს შენიშვნებისა და მოსაზრებების გაუთვალისწინებლობის წერილობითი დასაბუთება და გზშ-ის ანგარიშთან ერთად წარმოდგენა.
შეხვედრაზე დაისვა საკითხი, ხომ არ შეექმნება ჰესების მშენებლობის დროს პრობლემები მეფუტკრეობას და თევზსაშენებს.
"ეს თემა უფრო ახლოს არის "ნატანები 1 ჰესის" მშენებლობასთან და უკვე მოვთხოვეთ შეესწავლათ საკითხი. მათ მოვთხოვეთ კალმახსა და ფუტკარზე ზემოქმედების შესწავლა. თუმცა, თევზსაშენებზე აქვთ აღნიშნული, რომ არ მიაკლდებათ წყალი და მიეწოდება ის რაოდენობა, რაც არის საჭირო", _ თქვა ირაკლი ფირცხალაიშვილმა, რომელიც შეხვედრას საქართველოს გარემოსა და ბუნებრივი რესურსების დაცვის სამინისტროს წარმომადგენლის სახელით ესწრებოდა.
