ჩოხატაურის მუნიციპალიტეტის სამსახურს, შესყიდვების განყოფილება, რომელიც გასულ წელს შეუერთდა, ისევ გამოეყო და ისევ ცალკე სამსახური იქნება. მის ხელმძღვანელობას კვლავ ვლადიმერ გოგიბერიძე ჩაიბარებს, რომელიც ადრე სამსახურის უფროსი, გაერთიანების დროს კი განყოფილების ხელმძღვანელი იყო.
როგორც საკრებულოს სხდომაზე ვლადიმერ გოგიბერიძემ განმარტა, გამოყოფის მიზეზი ბევრი საქმე გახდა:
_ ძალიან ბევრი საქმეა აქვს შესყიდვებს. გადავდივართ ახალ ბაზაზე. რთულია ორი დატვირთული სამსახურის ერთად მუშაობა, _ აღნიშნა გოგიბერიძემ, რომელსაც ოპოზიციის კითხვებზეც მოუხდა პასუხის გაცემა.
"პატრიოტთა ალიანსის" წევრი ირაკლი ახობაძე დაინტერესდა, რატომ არ ასრულებს შესყიდვების განყოფილება კანონს და რატომ არ არის შესყიდვების საიტზე ატვირთული ტენდერებთან დაკავშირებით სრული დოკუმენტაცია.
გოგიბერიძის განმარტებით, ამის მიზეზი პერსონალის სიმცირეა და სამსახურად გამოყოფის შემდეგ ეს პრობლემა მოგვარდება:
_ შესყიდვების სააგენტო საქმის კურსშია. ჩვენ უამრავი დოკუმენტაციის ატვირთვა გვიწევს. ეს შრომატევადი საქმეა და ორი ადამიანი, რომელიც ჩვენს განყოფილებაში მუშაობს, ფიზიკურად ვერ ახერხებს, _ აღნიშნა გოგიბერიძემ.
რაც შეეხება საფინანსო სამსახურს, როგორც საკრებულოს სხდომაზე ითქვა, მუშაობას ჩვეულ რეჟიმში გააგრძელებს და აუდიტის მიერ მიცემულ რეკომენდაციების შესრულებას დაიწყებს, რომელიც მოუწესრიგებელ ბუღალტერიას და არასწორ აღრიცხვებს ეხება.
აღსანიშნავია, რომ საფინანსო სამსახურის უფროსი გელა ლომინეიშვილი ამ დრომდე შვებულებაშია. ამ უკანასკნელმა ფასიანი შვებულების შემდეგ უფასო შვებულებით ისარგებლა, თუმცა, რა გახდა მისი ორთვიანი გაუჩინარების მიზეზი, ამაზე საუბარი გამგეობაში არ სურთ.
ჩვენი ინფორმაციით, გამგებელი ირაკლი კუჭავა ლომინეიშვილის თანამდებობაზე დაბრუნებას, რომლის მიმართაც ბევრი შეკითხვა არსებობს, არ აპირებს და მას მაია გოგოლაძე შეცვლის, რომელიც ახლა სამსახურის უფროსის მოვალეობას ასრულებს.
ამ ინფორმაციაზე ირაკლი კუჭავა კომენტარს ჯერ არ აკეთებს. განმარტებების გაკეთება არც ლომინეიშვილს სურს, რომელიც მხოლოდ იმას ამბობს, რომ კუთვნილ შვებულებაში ოჯახის საჭიროების გამო გავიდა.
