"გურია ნიუსის" მიერ ექსკლუზიურად მოპოვებული ინფორმაციით, "ქართული ოცნება – დემოკრატიული საქართველოს" პოლიტიკური საბჭოს ერთ-ერთი ახალი წევრი იურისტი მამუკა მდინარაძე იქნება.
აღნიშნულ ინფორმაციას "ქართული ოცნება-დემოკრატიული საქართველოს" პრესსამსახურში არ ადასტურებენ და ამბობენ, რომ პოლიტსაბჭოს ახალი შემადგენლობა ყრილობაზე გახდება ცნობილი.
თუმცა, მამუკა მდინარაძე "გურია ნიუსთან" საუბრისას არ უარყოფს, რომ ის უკვე პარტიის წევრია და "ქართული ოცნების" გამარჯვებისთვის იბრძოლებს.
კითხვაზე – იქნებით თუ არა "ქართული ოცნების" პოლიტსაბჭოს წევრი? – მდინარაძე გვპასუხობს:
"ეს თუ ყრილობაზე დადასტურდა, ასე იქნება. თავისი პროცედურა აქვს ამ ყველაფერს. მოლაპარაკებები მქონდა პარტიის წევრებთან.
უხერხულ მდგომარეობაში რომ არ ჩავვარდე საკუთარი გუნდის წევრებთან, რადგანაც იყო დათქმა, რომ მოდი, ყრილობაზე გაირკვეს ვინ რა პოზიციაზე როგორ იქნება, ეს გაირკვევა ყრილობაზე. ჯერჯერობით არც ვადასტურებ და არც უარვყოფ ამ ინფორმაციას. ყრილობაზე გახდება ყველაფერი ცნობილი", _ უთხრა "გურია ნიუსს" მდინარაძემ.
მისივე თქმით, მოლაპარაკებები "ქართულ ოცნებასთან" დაახლოებით 2 თვის განმავლობაში მიმდინარეობდა.
"არ უარვყოფ იმას, რომ უკვე პარტიის წევრი ვარ. ვიქნები ერთ-ერთი ვინც ამ არჩევნებზე გამარჯვებისთვის იბრძოლებს, არა მხოლოდ "ქართული ოცნებისთვის"’, არამედ, მთელი ქვეყნისთვის. დღეს რა გადაწყვეტილებას მიიღებს ყრილობა პოლიტსაბჭოს შესახებ, ამაზე პასუხს ვერ გცემთ წინასწარ.
"ქართული ოცნების" წევრი დიდი ხანი არ არის რაც ვარ. მოლაპარაკებებიც არ მიმდინარეობდა დიდი ხნის განმავლობაში, სულ რაღაც ორი თვეა", _ აღნიშნა მდინარაძემ.
ამავე თემაზე:
"ქართული ოცნების" პოლიტსაბჭოს ახალი წევრის წარსული საქმიანობა
ექსკლუზივი _ ვინ არიან "ქართული ოცნების" პოლიტსაბჭოს ახალი წევრები
