ლანჩხუთის მუნიციპალიტეტში ქალაქის ცენტრის კეთილმოწყობის ფარგლებში, რისთვისაც 708 888 ლარის გახარჯვაა გათვალისწინებული, ქალაქში არსებული დასასვენებელი პარკები და ჟორდანიას ქუჩაზე ტროტუარები უნდა კეთილმოეწყოს.
ამ ეტაპზე ქალაქის ცენტრში კეთილმოწყობის სამუშაოები აქტუალურ ფაზაშია შესული და ძირითადი სამუშაოები გამგეობის წინ მდებარე სკვერში მიმდინარეობს, ხოლო ცენტრალური პარკის გარკვეულ მონაკვეთზე, სადაც გაზონის ნაცვლად ავტომანქანების პარკინგი კეთდება, დემონტაჟი მარტში განხორციელდა, თუმცა, ჯერჯერობით, სამუშაოები არ განახლებულა. რის გამოც ფეხით მოსიარულეებს, პარკინგის მოსაწყობად გამზადებული ფართის მიმდებარედ არსებულ ტროტუარზე უამინდობისას წყალსა და ტალახში უწევთ გზის გაკვლევა.
გამგეობის ინფრასტრუქტურისა და არქიტექტურის სამსახურის უფროსის თქმით, ქალაქის ცენტრალური პარკის ტერიტორიაზე სამუშაოებს ტენდერში გამარჯვებული შპს "სამკუთხედი" სამუშაოებს უახლოეს დღეებში გააგრძელებს.
"ბორდიურები ჩამოტანილი გვაქვს და სამუშაოებიც ამ დღეებში გაგრძელდება, დღესაც კი უნდა განახლებულიყო აქ მუშაობა, მაგრამ უამინდობამ შეუშალა ხელი", -გვითხრა ჩხაიძემ.
ცნობისთვის, აღნიშნული პროექტი გარდამავალია და სამ წელზეა გათვლილი. მისი განხორციელება ჯერ კიდევ გასული წლის ზაფხულში იგეგმებოდა, საპროექტო ტენდერში გაიმარჯვა კიდეც ერთ-ერთმა კომპანიამ, თუმცა სამუშაოები არ შეასრულა და ხელმეორე ტენდერიც გამოცხადდა. გასულ წელს ქალაქის რეაბილიტაციის პროექტიდან დაახლოებით 50 ათასი ლარის სამუშაოები შესრულდა, წელს 350 ათასი ლარის გახარჯვა იგეგმება, ხოლო დარჩენილი თანხის სამუშაოები 2017 წელს განხორციელდება.
