"ნაციონალური მოძრაობის" ერთ-ერთი წევრი გიორგი კანდელაკი ადასტურებს, რომ "ნაციონალური მოძრაობის" საარჩევნო სიაში იქნება, თუმცა, რა ნომრით, ჯერჯერობით არ აკონკრეტებს.
როგორც კანდელაკმა "გურია ნიუსს" უთხრა სიის სამუშაო ვერსია უკვე არსებობს, თუმცა მასში შესწორებების შეტანას არ გამორიცხავს.
"სია გამოქვეყნდება ყრილობაზე, სავარაუდოდ, არჩევნებამდე ერთი თვით ადრე. ზუსტი თარიღი ჯერჯერობით გადაწყვეტილი არ არის. წინასწარი სია უკვე შედგენილია, თუმცა ამ სიის კორექტირება და ჩასწორება კიდევ შესაძლებელია", _ აღნიშნა კანდელაკმა.
მისივე თქმით, "ნაციონალური მოძრაობის" მთავარი მესიჯი იმ რეფორმების გაგრძელებაა, რაც პარტიამ რამდენიმე წლის წინ დაიწყო.
"ჩვენი გეგმა ძალიან მარტივია, ხალხს ვთავაზობთ კონკრეტულ გამოსავალს, როგორ უნდა გამოვიყვანოთ ქვეყანა შექმნილი კრიზისიდან. როგორ გვინდა გავაგრძელოთ ყველაფერი ის, რაც წინა წლებში იყო კარგი და იმსახურებდა საყოველთაო მოწონებას. გვინდა გამოვასწოროთ ის, რაც იყო მცდარი და არასწორი. ცხადია, ჩვენი კამპანია დიდწილად იქნება კონცენტრირებული ეკონომიკაზე, როგორ და რანაირად ვაპირებთ იმ ეკონომიკური უკუსვლის შეჩერებას და წინსვლის დაწყებას. ამ ფონზე ვაპირებთ, პენსიის 50 ლარით გაზრდას ბიუროკრატიული ხარჯების შემცირების გზით. დღეს მოხდა ახლადშემომატებული კანდიდატების წარდგენა, რომლებიც არ არიან უცხო ადამიანები. მათ თავისი გამოცდილებაც აქვთ, საქმეც გაუკეთებიათ. ჩვენი მიზანი ამ ადამიანების მოწვევისას იყო ის, რომ ერთის მხრივ მოგვეხდინა "ნაციონალური მოძრაობის" განახლება და მეორე მხრივ, გვეჩვენებინა, რომ "ნაციონალური მოძრაობა" უნარიანი გუნდია", _ განაცხადა კანდელაკმა.
შეგახსენებთ, რომ ნაციონალურმა მოძრაობამ" დღეს საარჩევნო სიის ათეული წარადგინა: დავით ბაქრაძე, ელენე ხოშტარია, რომან გოცირიძე, ნიკა მელია, გიორგი ტუღუში, ოთარ კახიძე, სალომე სამადაშვილი, ირაკლი აბესაძე, სერგი კაპანაძე და სერგო რატიანი.
პარტიის ახალი სახეები არიან სამეგრელოდან ლელა ქებურია, გურიიდან – ნინო კვიტაიშვილი, იმერეთი – სოფიო სიუკაევა, სამეგრელო- ბესო წერედიანი. პარტიას ასევე უერთდება ადვოკატი დიმიტრი ძაგნიძე.
