იუსტიციის უმაღლესი საბჭო სასამართლო სისტემის მართლმსაჯულების ახალ სტრატეგიაზე მუშაობას იწყებს, _ ამის შესახებ საბჭოს მდივანმა ლევან მურუსიძემ "გურია ნიუსთან" ინტერვიუში ისაუბრა და აღნიშნა, რომ სტრატეგია არასამთავრობო ორგანიზაციების ფართო სპექტრის ჩართულობით და ხელისუფლებასთან თანამშრომლობით შემუშავდება.
მისივე თქმით, პირველი შეხვედრა ხვალ გაიმართება.
"მიღებულია გადაწყვეტილება, რომ იუსტიციის უმაღლესმა საბჭომ შეიმუშაოს სასამართლოს განვითარების სტრატეგიული გეგმა. ამ პროცესში გვინდა ჩავრთოთ საზოგადოების ფართო წრე, ანუ ის ორგანიზაციები და პირები, რომლებსაც ხელეწიფებათ რაიმეთი წაადგნენ ამ პროცესს ან დაინტერესება აქვთ სასამართლო კარგი იყოს, ვიდრე დღეს არის. პირველი შეხვედრა 3 ივნისს გაიმართება და მოწვეულები იქნებიან არასამთავრობო ორგანიზაციები, დიპლომატიური კორპუსი და ის სამინისტროები, რომლებიც უნდა ჩაერთონ ამ პროცესში – იუსტიციის სამინისტრო, ფინანსთა სამინისტრო, რადგან პროექტს დაფინანსება სჭირდება. გვინდა დავიწყოთ ფართო სპექტრთან ერთად მსჯელობა იმაზე, როგორ უნდა განვითარდეს სასამართლო სისტემა მომავალში", _ განაცხადა მურუსიძემ.
კითხვაზე: სტრატეგია დაწყებული რეფორმის ფარგლებში შემუშავდება, თუ დამოუკიდებლად აპირებთ მუშაობას? მურუსიძე გვპასუხობს:
"რეფორმასთან ახლოს არის, თუმცა რეფორმას აკეთებს იუსტიციის სამინისტრო, კანონი პარლამენტმა უნდა მიიღოს. ჩვენ ახლა ვმუშაობთ იმ კანონის ფარგლებში, რომელიც არის. უნდა დავგეგმოთ როგორ განვვითარდეთ და რა ნაბიჯები გადავდგათ. პირველ შეხვედრაზე კონტურები გამოიკვეთება და შემდგომში უფრო კარგად დავგეგმავთ რისი გაკეთება წაადგება სისტემას. მზაობა გვაქვს დაინტერესებული მხარეები პროცესში ჩაერთონ", _ განაცხადა მურუსიძემ.
ცნობისთვის, "მართლმსაჯულების სტრატეგიისა და სამოქმედო გეგმის" შემუშავების მიზნით შექმნილი კომიტეტის პირველი სამუშაო შეხვედრა 3 ივნისს 11:00 საათზე სასტუმრო "ქორთიარდ მარიოტი"-ს საკონფერენციო დარბაზში გაიმართება.
კომიტეტის შემადგენლობაში შედიან იუსტიციის უმაღლესი საბჭოს წევრები, მოსამართლეები, საკანონმდებლო და აღმასრულებელი ხელისუფლების, არასამთავრობო და საერთაშორისო ორგანიზაციების წარმომადგენლები. სტრატეგიული კომიტეტის შეხვედრების ორგანიზებაში საქართველოს იუსტიციის უმაღლესი საბჭოს მხარს უჭერს გერმანიის საერთაშორისო თანამშრომლობის საზოგადოება (GIZ) და ამერიკის საერთაშორისო განვითარების სააგენტოს (USAID) პროექტი კანონის უზენაესობის მხარდაჭერა საქართველოში (PROLOG).
რას ფიქრობს იუსტიციის უმაღლესი საბჭოს მდივანი სასამართლო სისტემაში მიმდინარე პროცესებზე, რატომ წყდება გული თბილისის საქალაქო სასამართლოს ყოფილ თავმჯდომარეზე, რატომ მოქმედებს შეთანხმებულად თეა წულუკიანთან და ნინო გვენეტაძესთან, _ ამ და სხვა საკითხებზე, ლევან მურუსიძის პოზიციას "გურია ნიუსი" მოგვიანებით შემოგთავაზებთ.
ამავე თემაზე:
