ქალაქ ოზურგეთის მუნიციპალიტეტის საკრებულოს სხდომაზე ფარნავაზ მეფის ქუჩის მცხოვრებლებმა ქალაქ ოზურგეთის მერთან ბეგლარ სიორიძესთან და საკრებულოს თავმჯდომარესთან გელა კობალაძესთან შეხვედრა ითხოვეს.
საქმე ეხება12-სართულიანი კორპუსის წინ გაზის სატუმბის მშენებლობას, რასაც მოსახლეობა აპროტესტებს.
"ბავშვები უნდა მოიწამლოს იმისთვის, რომ ვიღაცამ ფული ჩაიდოს ჯიბეში? ჩვენ ყველაფერს გავაკეთებთ იმისთვის, რომ ეს სატუმბი არ აშენდეს. ვისაც მოგწონთ, შეგიძლიათ თქვენს ეზოში გააკეთოთ", _აცხადებენ ფარნავაზ მეფის ქუჩის მცხოვრებლების ერთი ნაწილი.
"დღევანდელი კანონმდებლობების და სტანდარტების დაცვით ჩვენ უარი ვერ ვუთხარით იმ კომპანიას, რომელიც აპირებს ფარნავაზ მეფის ქუჩაზე გაზის სატუმბის მშენებლობას. თქვენ, როგორც ჩათვლით საჭიროდ ისე მოიქეცით. კი, ბატონო რაღაცეებში მეც გეთანხმებით, შეიძლება სასურველი არ იყოს საცხოვრებელი კორპუსის ქვეშ ეს სატუმბი, მაგრამ ჩვენ უარის თქმის საფუძველი არ გვქონდა", _ განაცხადა საკრებულოს თავმჯდომარე გელა კობალაძე.
"თურმე ამდენი ბავშვის და ადამიანის სიცოცხლე არაფერი არ ყოფილა და ის რაც უნდა მოხდეს ფარნავაზ მეფის ქუჩაზე ყოფილა კანონიერი?! ამ ადამიანების უფლების დაცვაზე უფრო უნდა ფიქრობდეთ. თქვენი ამოსავალი წერტილია, იქ გაზის სატუმბი აშენდეს", _ უპასუხა დეპუტატმა ნათია შარაშენიძემ საკრებულოს თავმჯდომარეს.
"ოზურგეთში ჯერ არავის უფიქრია, რომ ქალაქი გაელამაზებინა. ბატონო ბეგი, დღეს თქვენ ალამაზებთ ქალაქის ქუჩებს და დაუშვებთ ქალაქის ცენტრში გაზის სატუმბის მშენებლობას?" _ ჰკითხა ფარნავაზ მეფის ქუჩის მცხოვრებმა მზია გუბელაძემ ბეგლარ სიორიძეს.
თუმცა, ოზურგეთის მერი აცხადებს, რომ მას უფლება არ აქვს კერძო პირს მშენებლობაზე უარი უთხრას.
"მადლობა ასეთი შეფასებისთვის. ჩვენ არანაირი უფლება არ გვაქვს ვუთხრათ უარი კერძო პირს მშენებლობაზე, რომელიც აკმაყოფილებს ყველა მოთხოვნას", _ განაცხადა სიორიძემ.
"თქვენ არაფრის უფლება არ გაქვთ? აბა, რისი უფლება გაქვთ, კახა კალაძეს და ილა კეჭაყმაძეს უნდა ვუსმინოთ, რომლებსაც თურმე ჩაბარებული ქონიათ ოზურგეთი. იმათ უნდა უსმინოთ და ჩვენ არ უნდა მოგვისმინოთ?!"_ უპასუხა ბეგლარ სიორიძეს მზია გუბელაძემ.
საკრებულოს სხდომის დასასრულს ფარნავაზ მეფის ქუჩის მცხოვრებლები ქალაქ ოზურგეთის მერს შეხვდნენ. თუმცა, მოსახლეობამ პროტესტის ნიშნად შეხვედრა დატოვეს, რადგან ბეგლარ სიორიძემ განაცხადა, რომ ეს მშენებლობა კანონის დაცვის ფარგლებში იწყება.
