ჩოხატაურის მუნიციპალიტეტის გამგებელმა ირაკლი კუჭავამ საკრებულოს გასული წლის ანგარიში უკვე ჩააბარა. ანგარიშს თან აუდიტის დასკვნაც ერთვოდა, რომელშიც რამდენიმე საყურადღებო დეტალია, რომელზეც "გურია ნიუსმა" მკითხველს ვრცლად უამბო.
დეპუტატებს, როგორც ანგარიშთან, ასევე, აუდიტის დასკვნასთან დაკავშირებით კითხვები მრავლად ჰქონდათ, განსაკუთრებული აქტიურობით ოპოზიცია გამოირჩეოდა.
საკმაოდ ხანგრძლივი სხდომის დეტალების განხილვა "გურია ნიუსისა" და არასამთავრობო ორგანიზაცია "Post ალიონის" ერთობლივ გადაცემაში "მონოლოგიდან დიალოგამდე" შედგა.
გადაცემის სტუმრები ჩოხატაურის მუნიციპალიტეტის საფინანსო-საბიუჯეტო კომისიის თავმჯდომარე მაია პაიჭაძე და საკრებულოს ფრაქცია "ეროვნული ფორუმის" თავმჯდომარე ქეთევან სიხარულიძე იყვნენ.
ქეთევან სიხარულიძის თქმით, ჩოხატაურში "ეროვნული ფორუმი" "ქართულ ოცნებას" არ გამოყოფია და როგორც გამგებლის ანგარიშზე, ასევე, აუდიტის ანგარიშზე დასკვნა ფრაქცია "ქართული ოცნება _ ეროვნული ფორუმის" სახელით გაკეთდა.
_ აუდიტის სამსახურს დავეთანხმეთ, მოვიწონეთ და იმ სამი ადამიანით, ვინც იქ წარმოადგენდა მუნიციპალიტეტის ხელმძღვანელებს მე ვიყავი ამაყი _ მათ ყველა კითხვას ამომწურავად გასცეს პასუხი.
_ ქალბატონო ქეთევან, აუდიტის დასკვნა არის გამგებლის ანგარიშის თანმდევი, რომელიც დოკუმენტალურად განმარტავს, თუ როგორ იმუშავა გამგებელმა და რა არის გაკეთებული მუნიციპალიტეტში. ამ დასკვნაში ძალიან ბევრი ხარვეზის შესახებ არის საუბარი. საკრებულოს სხდომაზეც აღინიშნა ოპოზიციის მხრიდან, რომ რამდენიმე შემთხვევაში იკვეთება სისხლის სამართლის დანაშაული. გასაგებია, რომ ამ საკითხს, როგორც ხელისუფლების წარმომადგენელი, ისე უყურებთ, მაგრამ თქვენი პარტია ოპოზიციაშია და ამ კუთხით არ შეგიხედავთ? არც ერთ საკითხზე არ გაგჩენიათ კითხვები?
_ რა თქმა უნდა, კითხვები ჩნდება, მაგრამ ამ კითხვებზე, თითქმის ყველაზე, მეტნაკლებად გაიცა პასუხი სამსახურის უფროსების მხრიდან. არის ისეთი რაღაცეები, რომლებიც უნდა გამოსწორდეს და ეს აუცილებლად გამოსწორდება, _ აღნიშნა სიხარულიძემ.
მაია პაიჭაძის თქმით, "გამგებლის მუშაობა და მთლიანად სახელისუფლებო გუნდის მუშაობა შეიძლება დადებითად შეფასდეს".
საკრებულოს დეპუტატებმა გადაცემაში ისაუბრეს სახელმწიფო აუდიტის 2013 წლის დასკვნაზე, რომლის თანახმად, ჩოხატაურის მუნიციპალიტეტში ბუღალტრული აღრიცხვა არასწორად ხდება. იგივე პრობლემა გამოიკვეთა აუდიტის 2015 წელს დასკვნაში.
_ ამასთან დაკავშირებით ჩვენ მაშინვე გვქონდა რეკომენდაციები, რომლებიც მივაწოდეთ გამგეობას. ეს პრობლემა უნდა გამოსწორებულიყო, თუმცა, იყო ხელისშეშლის კონკრეტული მიზეზი _ არ არსებობდა ბუღალტრული აღრიცხვის პროგრამა. ჩვენმა კომისიამ დასკვნაში ამაზეც გაამახვილა ყურადღება და მოვუწოდეთ გამგეობას, როგორც პროგრამის შეძენის, ასევე კადრების გადამზადების შესახებ, _ თქვა პაიჭაძემ.
ქეთევან სიხარულიძის თქმით, წლევანდელ ბიუჯეტში კადრების გადასამზადებელი თანხა ჩასმულია, თუმცა, ოპოზიციური პარტიის ფრაქციის თავმჯდომარე ჩოხატაურში კადრების დეფიციტს ვერ ხედავს _ ქეთევან სიხარულიძე ამბობს, რომ ხელისუფლების წარმომადგენლები შენიშვნებს ყოველთვის იღებენ და ითვალისწინებენ კიდეც:
_ იყო შემთხვევა, როდესაც ჩემს სოფელში, ბუკისციხეში შესრულებული სამუშაო არ მომეწონა. ჩემი აზრი გამოვთქვი და გაითვალისწინეს. ასეთი შემთხვევები ხშირია. მონიტორინგს ხშირად ვახორციელებ, _ აღნიშნა სიხარულიძემ და დასძინა, რომ აქტიურად არის ჩართული პოლიტიკაში და ცდილობს სხვა ქალბატონებიც აიყოლიოს.
_ 18 წლის განმავლობაში მხოლოდ ქალბატონებს ვემსახურე და ამას ახლაც ვაგრძელებ. გულის მანკით დაავადებულთა პროექტი, ეპილეფსიით დაავადებულთა პროექტი, ბავშვებისთვის უფასო ტრანსპორტის მომსახურება _ ეს ის პროექტებია, რომლებიც მე გავაკეთე და მინდა ვთქვა, რომ ქალბატონებისთვის გავაკეთე. მე ხშირად მიწევს მოსახლეობასთან შეხვედრები და ქალბატონებს ვურჩევ, რომ უფრო აქტიურები იყვნენ, შემოგვთავაზონ იდეები, რომელთა გახორციელებაში აუცილებლად დავეხმარებით, _ თქვა გადაცემაში სტუმრობისას პაიჭაძემ.
