ძალიან სამწუხაროა, რომ საქართველოს პრეზიდენტს არ ჰყავს მოკავშირეები სასამართლოს გაძლიერების საკითხში, _ ამის შესახებ საქართველოს პრეზიდენტის ადმინისტრაციის უფროსმა, გიორგი აბაშიშვილმა მას შემდეგ განაცხადა, რაც საქართველოს პარლამენტმა უზენაესი სასამართლოს მოსამართლეობის კანდიდატებს მხარი არ დაუჭირა.
"დღეს პარლამენტმა ვერ მოახერხა, ლევან მურუსიძე შეეცვალა ანა დოლიძით. პარლამენტმა ვერ გაბედა, მხარი დაეჭირა პროფესიული ნიშნით წარმოდგენილი კანდიდატებისათვის. ფაქტობრივად, ამით პარლამენტმა მოახდინა უზენაესი სასამართლოს პარალიზება.
საქართველოს პარლამენტის, უმცირესობა, უმრავლესობა, ყველა ერთად დამარცხდა სასამართლოს გაძლიერების საკითხში.
როცა ამდენი საუბარია სასამართლოს გაძლიერებაზე, ახლა იყო ყველაზე მნიშვნელოვანი მომენტი, რომ საქართველოს პარლამენტს პასუხისმგებლობა აეღო და ყოფილიყო პრეზიდენტის მოკავშირე სასამართლოს გაძლიერების საკითში. სამწუხაროდ, აღმოჩნდა პირიქით", _ განაცხადა აბაშიშვილმა.
ცნობისთვის, პარლამენტმა პრეზიდენტის მიერ შეთავაზებულ უზენაესი სასამართლოს მოსამართლეობის კანდიდატებს მხარი არ დაუჭირა. უზენაეს სასამართლოში მათ დამტკიცებას სულ მცირე 76 დეპუტატის მხარდაჭერა სჭირდებოდა. კენჭისყრა ასეთი შედეგით დასრულდა: ანა დოლიძე 34 – მომხრე, 4 – წინააღმდეგი; თამარ ლალიაშვილი 27-მომხრე, 2 – წინააღმდეგი; ნონა თოდუა 22- მომხრე, არც ერთი წინააღმდეგი.
შესაბამისად, უზენაეს სასამართლოში გიორგი მარგველაშვილის მიერ წარდგენილი არც ერთი მოსამართლეობის კანდიდატი არჩეული არ არის.
კენჭისყრის დასრულებისას პარლამენტის ორმა წევრმა, მურმან დუმბაძემ და გია ჟორჟოლიანმა მოითხოვეს, რომ მათი ხმა ანა დოლიძის კანდიდატურას დამატებოდა. თუმცა ორი დეპუტატის მხარდაჭერამ ანა დოლიძის არჩევაზე გავლენა ვერ მოახდინა.
