მიუხედავად იმისა, რომ მისი ცხოვრების გზაზე წარმატებებსა და ბედნიერ წუთებთან ერთად, იმედგაცრუებაც და დიდი მწუხარებაც იყო, მიაჩნია, რომ არჩევანს მაინც არ შეიცვლიდა და ცხოვრება თავიდან რომ ჰქონდეს დასაწყები, ისევ იმ გზას აირჩევდა, რომლითაც აქამდე უვლია, რადგან ამ ცხოვრებამ უბოძა ყველაზე მთავარი _ საყვარელი ოჯახი და უამრავი მეგობარი.
დავით გოგიჩაიშვილს ლანჩხუთში ყველა იცნობს, როგორც თავის პროფესიაზე უსაზღვროდ შეყვარებულ, ერთ-ერთ წარმატებულ და აქტიურ პედაგოგს. იგი უკვე 38 წელია ამ საქმეს ერთგულად ემსახურება. სულ ახლახან იგი იუბილარი იყო _ 60 წლის გახდა.
მიუხედავად ასაკისა, დღემდე აქტიურადაა დაკავებული სპორტით და სხვებსაც იმავეს ურჩევს, განსაკუთრებით კი, ახალგაზრდებს მოუწოდებს იცხოვრონ ჯანსაღი ცხოვრების წესით. აქვე თავის გულისტკივილსაც გვიმხელს:
"სამწუხაროდ, დაახლოებით, 20 წლის განმავლობაში სკოლებში ნაკლები ყურადღება ექცეოდა სპორტს, აღარ ტარდებოდა სკოლებს შორის სპორტის სხვადასხვა სახეობებში შეჯიბრები. თუმცა, ბოლო ორი წელია გარკვეული ძვრები შეიმჩნევა ამ კუთხით და ნელ-ნელა ფეხს იკიდებს, რაც ნამდვილად დადებითი მომენტია. განსაკუთრებით გულდასაწყვეტია, რომ ლანჩხუთს, ჯერჯერობით, არ გააჩნია კეთილმოწყობილი სპორტული დარბაზი და ყველა მასშტაბურ სპორტულ ღონისძიებას სასულიერო გიმნაზიის დარბაზში ვმასპინძლობთ".
ბატონმა დავითმა პედაგოგად მუშაობა 1978 წელს, თბილისის უმაღლესი დაოსტატების მწვრთნელთა სკოლის დამთავრების შემდეგ დაიწყო. ლანჩხუთის არაერთ სკოლაში უმუშავია, თუმცა, ყველაზე ხანგრძლივი სამუშაო სტაჟი პირველ საჯარო სკოლაში აქვს, სადაც 26 წელი ასწავლიდა და უნერგავდა ბავშვებს ჯანსაღი ცხოვრების წესის სიკეთეს.
ბოლო ექვსი წელია დავით გოგიჩაიშვილი სასულიერო გიმნაზიის მოსწავლეებს უზიარებს სითბოსა და გამოცდილებას:
"სასულიერო გიმნაზიაში მუშაობა მისმა დამფუძნებელმა, აწ განსვენებულმა რუსუდან ზენაიშვილმა შემომთავაზა. არ დავყოვნებულვარ, მალევე მივიღე გადაწყვეტილება და დავთანხმდი ქალბატონი რუსუდანის შემოთავაზებას. არც მინანია _ აქ ახალგაზრდა, პროფესიონალი და ჯანსაღი კრებული დამხვდა, ადვილად შევძელი მათთან თბილი და კოლეგიალური ურთიერთობის დამყარება", _ ამბობს პედაგოგი.
დავით გოგიჩაიშვილი პედაგოგების ოჯახში დაიბადა და გაიზარდა. ალბათ, ამანაც განაპირობა მისი მომავალი პროფესიის არჩევა _ დედა დაწყებითი კლასის პედაგოგი იყო, მამა კი რუსულ ენასა და ლიტერატურას ასწავლიდა ლესის სკოლაში. თუმცა, როგორც თავად ამბობს, პროფესიის არჩევანში გადამწყვეტი და მნიშვნელოვანი გავლენა მაინც ფიზიკური აღზრდის აწ განსვენებულმა პედაგოგებმა _ ტრისტან სიხარულიძემ და რეზო ჭყონიამ იქონიეს:
"მათი წყალობით, ბავშვობიდან შემიყვარდა სპორტი და კარგი შედეგებიც მქონდა სპორტის სხვადასხვა სახეობაში, თუმცა, განსაკუთრებულად მაინც მძლეოსნური სახეობები მაინტერესებდა. სწავლაც ამ განხრით გავაგრძელე. დღეს უკვე თამამად შემიძლია ვთქვა, რომ მიყვარს ჩემი პროფესია. 38 წელია უკვე ამ საქმეს ვემსახურები და სხვანაირად არც შეიძლება იყოს. არა ერთ კოლექტივთან მიმუშავია და ყველა მათგანს დღემდე დიდი მადლიერების გრძნობით ვიხსენებ", _ ამბობს დავით გოგიჩაიშვილი, რომელსაც ყველა _ ნაცნობი თუ კოლეგა ღირსეულ და ერთგულ პიროვნებად მიიჩნევს.
"მაინც რაშია ის საიდუმლო, რითაც დავით გოგიჩაიშვილს ენდობიან, პატივს სცემენ, უყვართ?" _ ბატონ დავითთან მიმართებაში კითხვას სვამს მისი უფროსი კოლეგა, დამსახურებული პედაგოგი, ქალბატონი მაყვალა გვარჯალაძე და პასუხსაც თავადვე პოულობს: "ეს საიდუმლო სიყვარულშია. დავითს ძალიან უყვარს ბავშვები, თავისი მოსწავლეები. ბავშვებსაც ძალიან უყვართ დათო მასწავლებელი, ენდობიან მას.
დათო მასწავლებელო, სიყვარული გადაარჩენს და გააძლიერებს საქართველოს. სულ სიყვარულითა და გამარჯვებით გევლოს!"
