ძალიან გთხოვთ, პარლამენტის ტრიბუნიდან კორექტულობა დაიცვათ, _ ამ განცხადებით პარლამენტის თავმჯდომარემ დავით უსუფაშვილმა იუსტიციის მინისტრის პირველ მოადგილეს ალექსანდრე ბარამიძეს მიმართა.
პარლამენტის პლენარულ სხდომაზე, საარჩევნო კანონმდებლობაში დაგეგმილი ცვლილებების პროექტის განხილვისას, პარლამენტის თავმჯდომარე ბარამიძის შეკითხვამ გააღიაზიანა. უსუფაშვილმა იუსტიციის მინისტრის მოადგილეს მიმართა, რომ პარლამენტში კითხვებს დეპუტატები სვამენ და არა – პირიქით.
შეკამათება პროექტის იმ ნაწილს მოჰყვა, რომელიც საარჩევნო უბნის მიმდებარე ტერიტორიაზე, აუცილებლობის შემთხვევაში, საზოგადოებრივი წესრიგის დაცვის მიზნით, პოლიციელთა ყოფნას ითვალისწინებს.
როგორც ამასთან დაკავშირებით იურიდიულ საკითხთა კომიტეტის თავმჯდომარემ ვახტანგ ხმალაძემ აღნიშნა, საკომიტეტო განხილვისას გამოითქვა შენიშვნა, რომ პროექტს დაემატოს პუნქტი იმის თაობაზე, რომ როცა წესრიგის დარღვევის საფრთხე აღმოიფხვრება, პოლიციამ კენჭისყრის შენობის მიმდებარე ტერიტორია დატოვოს.
ვახტანგ ხმალაძის პასუხად ბარამიძემ აღნიშნა, რომ ეს პროექტში ლოგიკურად ისედაც იგულისხმება. დისკუსიაში დავით უსუფაშვილიც ჩაერთო, რომელიც დაინტერესდა, ”რას გააფუჭებდა პროექტისათვის აღნიშნული პუნქტის დამატება”.
"ამის დაზუსტება რას გააფუჭებს, თუკი ასეთია თქვენი პოზიციაც? აქ ჩვენს პოზიციაზე არ არის საუბარი. იქ სხვების და პოლიციელების პოზიციები უნდა იყოს ნათელი. განსხვავებული რომ იყოს, არ სჯობს კანონით იყოს დაზუსტებული?" _ მიმართა უსუფაშვილმა ალექსანდრე ბარამიძეს.
"გაფუჭებით ალბათ არ გააფუჭებს, მე ასე ვფიქრობ, მაგრამ ამ წინადადების დაუმატებლობა რას აფუჭებს, ესეც მაინტერესებს", _ ასეთი იყო ბარამიძის პასუხი უსუფაშვილის შეკითხვაზე.
"ძალიან მარტივია, რაც გაინტერესებთ – თუკი ხმალაძემ ჩათვალა საჭიროდ კითხვის დასმა, ასობით და ათასობით პოლიციელში იგივე კითხვა შეიძლება 15-ს გაუჩნდეს და არ დატოვოს ადგილი. ეს ელემენტარული ამბავია. თუ არ აფუჭებს, რატომ არ ვუმატებთ? თუ აფუჭებს, კი ბატონო, არ დავუმატოთ", _ მიმართა ბარამიძეს უსუფაშვილმა.
ამის შემდეგ ბარამიძე დაინტერესდა, პროექტისთვის აღნიშნული პუნქტის დაუმატებლობის შემთხვევაში, ”რესპუბლიკელთა” ფრაქცია დაუჭერდა თუ არა მხარს კანონპროექტს. ბარამიძის ამ კითხვამ უსუფაშვილი გააღიზიანა.
"ბატონო ალექსანდრე, აქ კითხვებს პარლამენტის წევრები სვამენ. თქვენ აქ იმიტომ ბრძანდებით, რომ პასუხები გასცეთ და არა სანაცვლო კითხვები დასვათ, ფრაქცია თუ პარლამენტის წევრები, ვინ როდის მისცემს ხმას. ძალიან გთხოვთ კორექტულობა დაიცვათ მაგ ტრიბუნიდან. რა კითხვაა ეს?! აქ, ოთხი წლის განმავლობაში, მომხსენებლებიდან არავის არც ერთი პარლამენტის წევრისთვის ასეთი კითხვა არ დაუსვამს", _ განაცხადა დავით უსუფაშვილმა.
