სავალდებულო სამხედრო სამსახურში გაწვევასთან დაკავშირებით საჯარო კომენტარს აღარ გავაკეთებთ, ვინაიდან ამ საკითხების საჯარო განხილვამ შესაძლოა ქვეყნის ინტერესები დააზარალოს, _ ასე გამოეხმაურა პრეზიდენტის პრესსპიკერი ეკა მიშველაძე საქართველოს თავდაცვის მინისტრის გადაწყვეტილებას, რომლის ბრძანებაის თანახმადაც, სამხედრო სამსახურში სავალდებულო გაწვევა შეჩერდა.
"მიუხედავად იმისა, რომ პრეზიდენტმაც და პრემიერმაც ამომწურავად უპასუხეს ამ თემას, მედიის ინტერესი მაინც დიდია. ამიტომ კიდევ ერთხელ დავაზუსტებ, რომ ჩვენ მეტ საჯარო კომენტარს ამ თემასთან დაკავშირებით არ გავაკეთებთ, გამომდინარე იქიდან, რომ უახლოეს მომავალში წინ არის ვარშავის სამიტი, რაც ჩვენი ქვეყნისთვის ძალიან მნიშვნელოვანი ღონისძიებაა. სამიტზე პრეზიდენტი თავდაცვის მინისტრთან ერთად მიემგზავრება და მისი აზრით, ამ საკითხების საჯაროდ განხილვამ შესაძლოა დააზარალოს ქვეყნის ინტერესები. პრეზიდენტი თვლის, რომ ასეთ დროს სასურველია პირველ რიგში ყველა გამოვიდეს სახელმწიფო ინტერესებიდან", _განაცხადა ეკა მიშველაძემ.
პრეზიდენტის პრესსპიკერი გამოეხმაურა ასევე თავდაცვის ინსტიტუციური აღმშენებლობის სკოლის გახსნას, რომელიც გიორგი მარგველაშვილმა თინა ხიდაშელთან ერთად გახსნა.
მიშველაძის თქმით, ეს არის ნატო-საქართველოს არსებითი პაკეტის ერთ-ერთი მიმართულება უელსის სამიტის კონცეფციიდან გამომდინარე, რაც გულისხმობს "მეტ ნატო-ს საქართველოში და მეტ საქართველოს ნატო-ში".
პრეზიდენტის პრესსპიკერი აღნიშნავს, რომ სკოლის დაარსება მნიშვნელოვანია, როგორც საქართველოსთვის, ისე პარტნიორი ქვეყნებისთვის.
"ეს სკოლა იქმნება იმისთვის, რომ მიღებული ცოდნა დავამუშავოთ, ჩამოვაყალიბოთ და შემდეგ გავუზიაროთ ჩვენს პარტნიორ ქვეყნებს. ეს სასწავლებელი საქართველოს ნატო-სთან ურთიერთობის კიდევ ერთი დამაკავშირებელი კომპონენტია", _ განაცხადა მიშველაძემ.
