გონიოში მცხოვრები 270-ზე მეტი ოჯახი წინა ხელისუფლების დროს ჩამორთმეული მიწების საკუთრებაში დარეგისტრირებას შეძლებს. აღნიშნულის შესახებ გადაწყვეტილება ბათუმის საკრებულოს საკუთრების აღიარების კომისიამ დღეს მიიღო. გონიოელები მიწის დაკანონების მოთხოვნით 15 დღის განმავლობაში საკრებულოსთან და აჭარის მთავრობის სახლთან გამართულ საპროტესტო აქციებს მართავდნენ. აქცია რამდენჯერმე პოლიციამაც დაშალა თუმცა, გონიოელებს პროტესტი არ შეუწყვეტიათ.
ბათუმის საკრებულოს გადაწყვეტილებით, 2010 წელს მიღებული ოქმი, რომლითაც 271 ოჯახს გონიოში მიწის საკუთრება ჩამოერთვათ, გაუქმებულია.
გონიოელები საკრებულოს ამ გადაწყვეტილებას „ისტორიულ გადაწყვეტილებად“ აფასებენ და ამბობენ, რომ მათი ყველა მოთხოვნა დაკმაყოფილებულია.
ეს გადაწყვეტილება ბათუმის საკრებულოს თავმჯდომარემ, ირაკლი ჭეიშვილმა სპეციალურად გამართულ ბრიფინგზე გაახმოვანა და აღნიშნა, რომ საკუთრების გაუქმების კრიტერიუმები არ იყო კანონმდებლობით გამყარებული და ხელოვნურად გამოგონილ მიზეზებს წარმოადგენდა.
"მოგეხსენებათ, ჩვენი დღევანდელი შეხვედრის მიზეზი გახლავთ პრობლემა, რომელიც სათავეს იღებს ჯერ კიდევ ქვეყნის დამოუკიდებლობის პირველივე წლებიდან. ყველასათვის ცნობილია, რომ დანარჩენი საქართველოსგან განსხვავებით, აჭარაში არ ჩატარებულა მიწის რეფორმა, ხოლო შემდეგ ჩვენი წინამორბედი ხელისუფლების – ნაციონალური მოძრაობის მმართველობის პირობებში, მიწის საკითხი იქცა პოლიტიკური სპეკულაციების თემად. წინასაარჩევნოდ გაცემული მიწები მალევე ჩამოართვეს მოქალაქეებს და შექმნეს რთული ჩიხური სიტუაცია, რომელიც ჩვენს ხელისუფლებას ერგო მემკვიდრეობად. მიუხედავად ამისა, აჭარის ავტონომიური რესპუბლიკის მთავრობის თავმჯდომარის არჩილ ხაბაძისა და „ქართული ოცნების“ პოლიტიკური გუნდის მიერ სრულად მოხდა პრობლემის აქტუალობის გაცნობიერება და დაიწყო მუშაობა სამართლებრივ ჩარჩოში დაბრუნების მიზნით. აქედან გამომდინარე, დღეს ბათუმის მუნიციპალიტეტის მიწის საკუთრების აღიარების კომისიამ მიიღო გადაწყვეტილება და ბათილად ცნო ხელვაჩაურის მუნიციპალიტეტის მიწის აღიარების კომისიის საოქმო გადაწყვეტილება.
სამართლებრივი დეტალების სრული ანალიზის საფუძველზე, ვაცხადებთ, მიწის აღიარების კომისიის მიერ მიღებული გადაწყვეტილების შესაბამისად, გონიოს მოსახლეობის იმ ნაწილს, რომელთა საკუთრებაზეც არ ვრცელდება საკანონმდებლო და სასამართლოს მიერ მიღებული გადაწყვეტილებით შეზღუდვები, კანონმდებლობის სრული დაცვით განიხილება ინდივიდუალურად და მოთხოვნის დაკმაყოფილების შემთხვევაში, შესაბამისად აღუდგებათ საკუთრება. მოკლედ მინდა შევეხოთ სამართლებრივ საკითხებს. წინა ხელისუფლების დროს მიღებული ადმინისტრაციული აქტი, რომლის საფუძველზეც ამ ადამიანებს გაუუქმდათ საკუთრება, შეიცავდა ძირითადად ოთხ მიზეზს… ძირეული ანალიზისა და საკანონმდებლო დაზუსტების საფუძველზე ნათლად გამოჩნდა, რომ გაუქმების კრიტერიუმები არ იყო კანონმდებლობით გამყარებული და წარმოადგენდა ხელოვნურად გამოგონილ მიზეზებს, საიდანაც ცალსახად ჩანს, თუ რამდენად ითვალისწინებდა წინა ხელისუფლება ჩვენი თანამოქალაქეების საკუთრების უფლებას და თუ რამდენად მანიპულირებდნენ კერძო საკუთრებით წინასაარჩევნოდ. ერთხელ და სამუდამოდ, ჩვენი ხელისუფლების პირობებში ამ პრობლემის მოგვარება დაიწყო და დღევანდელი გადაწყვეტილება ამ ყველაფერს ცხადყოფს", _ განაცხადა ბრიფინგზე ირაკლი ჭეიშვილმა.
შეგახსენებთ, რომ გონიოში მცხოვრები 271 ოჯახი მიწის ნაკვეთების დაკანონებას უკვე წლებია ითხოვს.
აღნიშნულია შესახებ "გურია ნიუსმა" არაერთი მასალა გამოაქვეყნა. გამოქვეყნებული ინფორმაციების თანახმად, 2007-2008 წლებში ხელვაჩაურის მიწის საკუთრების აღიარების კომისიამ გონიოელებს მიწები ჯერ დაუკანონა, შემდეგ კი – 2010 წელს, თავისივე გადაწყვეტილებით ჩამოართვა.
ბათუმის მუნიციპალიტეტში არსებული მიწის აღიარების კომისია აღნიშნულ საკითხზე 2014 წლიდან მუშაობდა და ყველა საქმეს ინდივიდუალურად განიხილავდა – თუ რამდენად კანონიერად ჩამოერთვა ამა თუ იმ ოჯახს მიწაზე საკუთრების უფლება. დღეს მიღებული გადაწყვეტილებით კი, გონიოელები ჩამორთმეული საკუთრების დაკანონებას შეძლებენ.
ამავე თემაზე:
პოლიციამ დაარღვია აქციის მონაწილეთა უფლებები – ომბუდსმენი ბათუმში აქციის დაშლაზე
საკუთრების გადაუჭრელი პრობლემის გამო ბათუმში აქცია გრძელდება
საკუთრების უფლების დაცვის სფეროში პრობლემები ისევ არსებობს
პროცესი ჭიანურდება _ ხალხის პროტესტით დაღლას ელოდებიან?!
დაკანონებული იძულება _ რა ცვლილებებს ითხოვს არასამთავრობო სექტორი კანონში
დაუბრუნებენ თუ არა იძულებით ჩამორთმეულ ქონებას მოსახლეობას
გონიოში 271 ოჯახი რამდენიმე საათში წართმეული მიწის დაბრუნებას ითხოვს
