ირაკლი კობახიძე – ჩვენ პარლამენტში იმაზე მეტ მანდატს მივიღებთ, ვიდრე დანარჩენი პარტიები ერთად აღებული შედეგები გვაძლევს იმის თქმის საშუალებას, რომ ჩვენ შევძლებთ ოქტომბრის არჩევნებში ხმათა აბსოლუტური უმრავლესობის მოპოვებას, ანუ, 50%-ზე მეტის მიღებას,_აღნიშნული განცხადებით "ქართული ოცნება-დემოკრატიული საქართველოს" აღმასრულებელი მდივანი ირაკლი კობახიძე შიდაპარტიულ კვლევას აფასებს.
მისი განმარტებით, კვლევები შიდა მოხმარებისთვის იყო გამიზნული, თუმცა ძალიან ბევრი სპეკულაცია იყო ამ საკითხთან დაკავშირებით, რის გამოც პარტიამ მისი გასაჯაროვება გადაწყვიტა.
"ჩვენ ამ პერიოდის განმავლობაში არ ვაქვეყნებდით შიდა კვლევის შედეგებს, გამომდინარე იქიდან, რომ ის შიდა მოხმარებისთვის იყო გამიზნული, თუმცა ძალიან ბევრი სპეკულაცია იყო ამასთან დაკავშირებით. პრაქტიკულად, მოთხოვნა იყო და აქედან გამომდინარე გადავწყვიტეთ გამოგვექვეყნებინა ჩვენი შიდა კვლევის შედეგები. ჩვენ სრულად ვენდობით იმ ორგანიზაციას, რომელიც ჩვენთვის ატარებს ამ კვლევას. წლების განმავლობაში ვთანამშრომლობთ ჩვენ მათთან და იმ პირობებში, როდესაც არცერთი სხვა ცნობილი სოციოლოგიური ორგანიზაცია არ დებდა სანდო კვლევის შედეგებს, ჩვენ ყოველთვის გვაძლევდა ჩვენი ორგანიზაცია არჩევნების შედეგის პროგნოზირების საშუალებას. აქედან გამომდინარე, ჩამოყალიბდა სწორედ ნდობა ჩვენს სოციოლოგიურ კვლევით ორგანიზაციასთან",_აღნიშნა ირაკლი კობახიძემ.
პარტიის აღმასრულებელი მდივნის თქმით, კვლევის შედეგები რეალურია და სრულად ასახავს სინამდვილეს.
"ჩვენ გვაქვს იმაზე მეტი პროცენტული მხარდაჭერა, ვიდრე ყველა სხვა პარტიას ერთად აღებულს. სწორედ ეს გვაძლევს ჩვენ იმის თქმის საშუალებას, რომ ჩვენ შევძლებთ ოქტომბრის არჩევნებში ხმათა აბსოლუტური უმრავლესობის მოპოვებას. ანუ, 50%-ზე მეტის მიღებას", _დასძინა ირაკლი კობახიძემ.
შიდაპარტიული კვლევა ასევე შეაფასა "ქართული ოცნება-დემოკრატიული საქართველოს" პოლიტიკური საბჭოს წევრმა სოფიო კილაძემ.
"ვენდობით კვლევის შედეგებს და ის ფაქტი, რომ "ქართულ ოცნებას" აქვს მოსახლეობის უფრო მეტი მხარდაჭერა, ვიდრე სხვა პარტიებს, გვაძლევს იმის თქმის საფუძველს, რომ ჩვენ ოქტომბერის არჩევნებში დამაჯერებელ გამარჯვებას მოვიპოვებთ", _აღნიშნა პოლიტიკური საბჭოს წევრმა.
კილაძის თქმით, არჩევნებამდე დარჩენილი დროის განმავლობაში პარტია საზოგადოებას გააცნობს ხელისუფლების საქმიანობის მიღწევებსა და იმ დაპირებებს, რასაც "ქართული ოცნება დემოკრატიული საქართველო" უახლოესი 4 წლის განმავლობაში გეგმავს.
