სოფლის გაზიფიკაციის მოთხოვნით აქცია გამართეს ლანჩხუთის მუნიციპალიტეტის სოფელ ნიგოითის მაცხოვრებლებმა. მათთან შესახვედრად ადგილზე იმყოფებოდნენ ნიგოითის ადმინისტრაციული ერთეულში გამგებლის წარმომადგენელი ვასილ აბუსერიძე და მისი თანაშემწეები, ასევე სოფლის მაჟორიტარი თემურ ალექსაია და მუნიციპალიტეტის გამგებლის მოადგილე ნუგზარ ცინცაძე.
გამგებლის მოადგილემ აქციაზე შეკრებილებს განუმარტა, რომ ნიგოითის ადმინისტრაციულ ერთეულში გაზიფიკაციის სამუშაოების გახორციელება 2017 წლიდან იგეგმება და შეკრებილებს თხოვა, რომ საამისოდ ხელმოწერები შეეგროვებინათ.
"უკვე მერამდენედ ვაგროვებთ ხელმოწერებს. აგერ, მეზობელ შუხუთში გამოვიდნენ ქუჩაში, დაიმუქრნენ ამას ვიზამთ, იმას ვიზამთ, ლელოს არ ჩაგატარებინებთ, თუ გაზს არ გამოგვიყვანთო და გაუკეთეს. ვნახოთ რას იზამენ, ისე, დიდი იმედი არ გვაქვს", _ გვითხრეს აქციაზე მოსულმა ქალბატონებმა.
გარდა გაზიფიკაციისა, მოსახლეობა შეხვედრაზე მოსულ ხელისუფლების წარმომადგენლებს სოფლის სხვა პრობლემები გააცნო, რაზეც ნუგზარ ცინცაძისგან შეთავაზება მიიღეს, რომ მისულიყვნენ გამგეობაში და იქ უშუალოდ მუნიციპალიტეტის გამგებელთან ესაუბრათ პრობლემებზე.
