„ბერი ანდრიას სახელობის საქველმოქმედო ფონდის“ ორგანიზებით 1 სექტემბერს დაწყებული „სიცოცხლის ფესტივალი“ დღეს დასრულდა. ფესტივალის დასკვნით ღონისძიებას, რომელიც თბილისის მერიის მხარდაჭერით კუს ტბაზე გაიმართა, თბილისის მერი დავით ნარმანია და მერის მოადგილე ნინა ხატისკაცი ოჯახებთან ერთად დაესწრნენ. დავით ნარმანიამ შეკრებილ სტუმრებს, ფონდის ბენეფიციარ ბავშვებსა და მათ მშობლებს სიტყვით მიმართა და ფონდის მიმართ მერიის აქტიურ მხარდაჭერას კიდევ ერთხელ გაუსვა ხაზი.
„ეს არის ძალიან მნიშვნელოვანი ღონისძიება, რომელსაც ფონდი და თბილისის მერია ერთობლივად ატარებენ. აქ ძალიან ბევრი დაინტერესებული და ქველმოქმედი მოქალაქეა მოსული, რომელთაც შეუძლიათ ამ სასიკეთო საქმის ჩვენთან ერთად კეთება. მათი ჩართულობის გარეშე, მხოლოდ ფონდისა და თბილისის მერიის ძალისხმევით, ვერ იქნება მიღწეული ის უმთავრესი ამოცანები, რასაც თითოეული მათგანის გამოჯანმრთელება ჰქვია. ჩვენ მხარს ვუჭერთ და ვაფინანსებთ ამ ღონისძიებას, რათა ორგანიზატორებს არ დაეხარჯოთ თანხა და თითოეული შეგროვილი თეთრი ამ პატარების ჯანმრთელობის შესანარჩუნებლად იქნას მიმართული. ჩვენ აქტიურად ვერთვებით ასევე „მომავლის სახლის“ მშენებლობაში, რომელიც იქნება ერთიანი სივრცე იმ პატარებისთვის, რომლებსაც გამოჯანმრთელებისთვის განსაკუთრებული ძალისხმევა სჭირდებათ", _ განაცხადა დავით ნარმანიამ.
ღონისძიების ფარგლებში ბენეფიციარი ბავშვებისა და ფონდის მეგობრების მიერ შექმნილი ხელნაკეთი ნივთებისა და ნახატების გამოფენა-გაყიდვა გაიმართა. ღონისძიება საბავშვო მუსიკალური ჯგუფებისა და ახალგაზრდა ქართველი მუსიკოს-შემსრულებელების მონაწილეობით გამართული კონცერტით დასრულდა.
სექტემბერი ბავშვთა კიბოსთან ბრძოლის საერთაშორისო თვეა. სწორედ ამიტომ „სიცოცხლის ფესტივალი“ სექტემბერში ჩატარდა. ფესტივალის მიზანია საზოგადოების მეტი ინფორმირებულობა, სახელმწიფო სტრუქტურების ჩართულობის გაზრდა, ფონდის ფინანსური მხარდაჭერა, რათა შესაძლებელი გახდეს ფონდის მიერ დაქირავებული სახლის შენარჩუნება და კავკასიაში ერთადერთი სარეაბილიტაციო სახლის სრული ინფრასტრუქტურით აშენება.
