ოზურგეთის მუნიციპალიტეტის სოფელ ასკანაში მცხოვრები ქალბატონი მანანა მინდაძე თავის სოფლის დეპუტატის ილია მამალაძისა და სოფელში გამგებლის წარმომადგენლის ბადრი ჯაველიძის მხრიდან მისი ოჯახის მიმართ ზეწოლასა და მუქარაზე საუბრობს. ის “გურია ნიუსს“ თხოვნით მიმართავს და ასკანაში 13 სექტემბერს მომხდარი ფაქტის გაშუქებას სთხოვს.
“სამშაბათს 10 საათზე ავედი ასკანის ცენტრში, ჩვენი სოფლის დეპუტატმა ბატონმა ილო მამალაძემ დამიძახა და მკითხა, თუ რატომ არ დავესწარი ასკანაში “ქართული ოცნების“ მაჟორიტარი დეპუტატობის კანდიდატის არჩილ თალაკვაძის შეხვედრას მოსახლეობასთან.
ვუთხარი, რომ ძალიან ავად ვიყავი, წინა დღეს სასწრაფო-სამედიცინო დახმარება მანქანა მყავდა, ჯანმრთელობის პრობლემები მაწუხებს და ამიტომ ვერ ავედი ცენტრში, თან ძალიან შორს ვცხოვრობ. დეპუტატმა ჩემი დაშინების მიზნით დამემუქრა და ასე მითხრა, აი, რომ მოხვალ არჩევნებზეო, შემოგყვები კაბინაში და ძალით მოგაწერინებ “41“-სო, სანამ არ მოაწერ ხელს იქედან არ გამოვალ და მერე ვეღარ ეღირსები ვერაფერსო, ასევე, მითხრა სკოლის რამდენიმე მასწავლებელმა, რომ გემუქრება დეპუტატი სოფელში აღარ გავაჩერებო, რომ ეს არის ჩვენი სოფლის ასკანის მაჟორიტარი დეპუტატის სიტყვები და მუქარა ჩემ მიმართ. ძალიან გთხოვთ, იქნებ მიაწვდინოთ ეს ამბავი მათ, ვინც ამ ამბავს ყურადღებას მიაქცევს“, _ ამბობს მანანა მინდაძე და ოზურგეთის მუნიციპალიტეტის გამგებელს მიმართავს:
ასევე, მინდა გესაუბროთ ოზურგეთის მუნიციპალიტეტის გამგებლის წარმომადგენელზე სოფელ ასკანაში, ბადრი ჯაველიძეზე:
ჩვენი სოფლის გამგებელმა ბადრი ჯაველიძემ განზრახ შემიშალა ხელი, როცა სოფელ მერიაში ბინები დარიგდა უსახლკაროებისთვის, ჩემი ოჯახი მაგ სიაში არ მოხვდა, გვატყუებდა, არ ვარგა ეს ბინებიო. ბადრი ჯაველიძემ სკამის შენარჩუნების გულისთვის მისი თანამშრომელი წიხლებით ცემა, ეს იყო მის კაბინეტში. აღნიშნული ფაქტის მომსწრე იყო რამდენიმე ადამიანი, რომლებმაც გააშველეს ისინი, იქვე იყო დეპუტატი ილია მამალაძეც. ეს ფაქტი იყო დამალული და დღემდე ამაზე ღიად არავის უსაუბრია.
მინდა მივმართო ოზურგეთის მუნიციპალიტეტის გამგებელს მერაბ ჭანუყვაძეს, რომ მოახდინოს რეაგირება _ სოფლის ხელისუფლება იმ ადამიანებზე, რომლებიც მათთვის სასურველები არ არიან, ზეწოლას ახდენენ, ემუქრებიან და აიძულებენ 41-ის სასარგებლოდ იმუშაონ.
ბადრი ჯაველიძემ ასე მითხრა, სულ არ მეშინია შენი, სადაც გინდა იქ მიჩივლეო, თუ გინდა კვირიკაშვილს მისწერე წერილიო. ეს ფაქტი მოხდა სამშაბათს, 13 სექტემბერს, დილის 10 საათზე, ასკანის ცენტრში“, _ განმარტავს “გურია ნიუსთან“ მანანა მინდაძე.
ოზურგეთის მუნიციპალიტეტის გამგეობის პრესსამსახური აღნიშნულთან დაკავშირებით გვპასუხობს:
“ასკანის ადმინისტრაციულ ერთეულში გამგებლის წარმომადგენელი ბადრი ჯაველიძე უარყოფს თანასოფლელის _ მანანა მინდაძის ბრალდებებს და განმარტავს, რომ არც ერთი ფაქტი სინამდვილეს არ შეესაბამება. ჯაველიძის თქმით, ტყუილია მისი მოადგილის ცემის ვერსია, ასევე, მინდაძის მიერ გამოთქმული პრეტენზია მერიაში უსახლკაროთა საცხოვრებელი ფართით დაკმაყოფილების პროცესში მისთვის ხელშეშლის შესახებ. „მანანა მინდაძის ოჯახი მართლაც გაუსაძლის პირობებში ცხოვრობს და ძალიან მინდოდა, დავხმარებოდი. ვთხოვე, დოკუმენტაციის წარმოდგენა, რომელიც შესაბამის კომისიას უნდა განეხილა მუნიციპალიტეტში, თუმცა ოჯახის წევრები კონფლიქტის გამო ერთმანეთში ვერ შეთანხმდნენ. არ სურდათ ერთად თანაცხოვრება. ჩემი დახმარებით გამგებლის მოადგილემ სცადა მათი უთანხმოების მოგვარება, რათა იუსტიციის სახლიდან საბუთები დროულად წარმოედგინათ, მაგრამ შედეგი ვერ მივიღეთ. მინდაძეებმა დოკუმენტაცია მაშინ წარმოადგინეს, როცა საცხოვრებელი ფართით უსახლკარო ოჯახები უკვე დაკმაყოფილებული იყო“.
ოზურგეთის მუნიციპალიტეტის სოფელ ასკანის დეპუტატი “გურია ნიუსთან“ აღნიშნულ ფაქტს უარყოფს და თავის სოფელში მცხოვრებ მანანა მინდაძეს არასწორს უწოდებს:
“ეს ქალბატონი არის არასწორი ქალბატონი, არ ვიცი ვიღაცისგან მოგზავნილია და პირველ რიგში გაარკვიეთ მისი წარსული“, _ ამბობს დეპუტატი.
"გურია ნიუსი" ერთხელ უკვე წერდა მანანა მინდაძის ოჯახის შესახებ, იხილეთ სტატია _ "ამას თუ ჰქვია სიცოცხლე და ცხოვრება, _ კი ბატონო!"
