"ამდენ გაუბედურებულ ოჯახს იმიტომ ამწარებთ,რომ ვიღაც ორ-სამ ბინძურს ასიამოვნოთ? ეგეთი უშიშრებიც არ ჩანხართ!!! კიდევ ერთხელ მოგიწოდებთ, დაფიქრდით, არაფერი ამქვეყნად, მითუმეტეს პოლიტიკური ქულები არ ღირს ამად…" _ ასე პასუხობს "ქართული ოცნების" კრწანისის მაჟორიტარი დეპუტატობის კანდიდატი ბექა ოდიშარია ოპონენტების მიერ გავრცელებულ ხმებს და აღნიშნავს, რომ ეს "მიზანმიმართული ბინძური კამპანია":
"ამ ტრაგედიასთან დაკავშირებით საჯაროდ კომენტარის გაკეთებას ნამდვილად არ გადავწყვეტდი, რომ არა მიზანმიმართული ბინძური კამპანია, რომელიც შეუიარაღებელი თვალითაც იკითხება.
29 სექტემბერს ჩვენ გვქონდა მორიგი შეხვედრა ქვემო ფონიჭალის მოსახლეობასთან და ჩვენი, ტრადიციულად პოზიტიური კამპანიის ფარგლებში შეხვედრაზე გვახლდნენ ჩემი მეგობრები, ქართული ესტრადის წარმომადგენლები.
მე როგორც ყოველთვის, ახლაც მამასთან, მეუღლესთან და სამ შვილთან, მათ შორის 4 წლის ქალიშვილთან ერთად, ვიდექი სცენაზე… ღონისძიების მსვლელობისას შემატყობინეს, რომ ზემო ფონიჭალელ მოზარდებს მოუვიდათ შელაპარაკება სასტუმრო «ტატო»-სთან, თუმცა დაზარალებულმა საშველად მოირბინა სინათლისა და ხალხისკენ ანუ იქით საიდანაც მას ესმოდა ხალხის ხმა.დადასტურებით შემიძლია ვთქვა ერთი ფაქტი, რომ დაზარალებულს სწორედ ჩემმა მეგობრებმა იმ წუთასვე აღმოუჩინა დახმარება და გადაიყვანა საავადმყოფოში.
ჩემი პირველი კომენტარიც მომხდართან დაკავშირებით გაკეთდა პირველივე წუთებში და გავაჟღერე ზუსტად ის ინფორმაცია, რასაც მაშინ ვფლობდი.
აქციის მსვლელობისას მე რამდენჯერმე მოვიკითხე ბავშვის ჯანმრთელობის მდგომარეობა და როგორც მატყობინებდნენ, ბავშვს იმ მომენტისათვის სერიოზული ხიფათი არ ემუქრებოდა, თუმცა ჩვენდა სამწუხაროდ, შეხვედრის დასრულების შემდეგ,გვიან ღამით,უკვე შტაბში მოსულებს (4-5 საათის შემდეგ) შეგვატყობინეს, რომ მდგომარეობა დამძიმდა და შემდეგ უკვე დადგა ყველასათვის წარმოუდგენელი შედეგი… ტრაგედია, რომლის სიტყვებით გადმოცემა მიჭირს. დაიღუპა ჩვენი შვილების თანატოლი ბავშვი.
კიდევ ერთხელ ღრმა მწუხარებას გამოვთქვავ მომხდარის გამო. ჩემი ოჯახის არც ერთ წევრს არ გვძინებია, თუმცა მე მაკვირვებს, ალბათ უკვე აღარც მაკვირვებს, იმ ადამიანების აღვირახსნილობა, რომლებსაც მომხდარზე გული არ უსკდებათ, მაგრამ შუბლის ძარღვი კი გახეთქილი აქვთ და პატარა ბიჭის და მისი ოჯახის უბედურებით ცდილობენ ბინძური ქულების მოპოვებას… ეს უსირცხვილო ადამიანები, რომელთაც საერთოდ არ უწყიან რა მოხდა, ბედავენ და არად აგდებენ ოჯახების უბედურებას, და მეორე არასრულწლოვანს, რომლის ოჯახიც ასევე გაუბედურდა მომხდარის გამო, მოიხსენიებენ, როგორც „ქართული ოცნების“ აქტივისტს…
ან დედა არ გყავთ, ან შვილები, ან ოჯახი? მართლა არ გეშინიათ არაფრის? ღმერთის რომ არა, მაგაზე შევთანხმდით, მაგრამ ამდენ გაუბედურებულ ოჯახს იმიტომ ამწარებთ,რომ ვიღაც ორ-სამ ბინძურს ასიამოვნოთ? ეგეთი უშიშრებიც არ ჩანხართ!!! კიდევ ერთხელ მოგიწოდებთ, დაფიქრდით, არაფერი ამქვეყნად, მითუმეტეს პოლიტიკური ქულები არ ღირს ამად…
რაც შეეხება გამოძიებას, ის იტყვის ალბათ თავის სათქმელს და მე,როგორც კანონმორჩილი ადამიანი ,გამოძიების შედეგებს დაველოდები" _ წერს ოდიშარია ფეისბუქის გვერდზე.
