თბილისობის დღესასწაულთან დაკავშირებით, დედაქალაქის მცხოვრებლები და სტუმრები არაერთ გასართობ ღონისძიებას შეეძლოთ დასწრებოდნენ. დღეს დილიდან ვაკის პარკში პატარებისთვის არაერთი გასართობი ღონისძიება ჩატარდა, რაც საბავშვო ქალაქ "შუმბა ლენდის" გახსნას უკავშირდება.
საბავშვო ქალაქის გახსნას თბილისის ვიცე-მერი ლაშა აბაშიძე, თბილისი მერიის კეთილმოწყობის საქალაქო სამსახურის უფროსი გივი კუბლაშვილი და ვაკის რაიონის გამგებელი ნოდარ ტურძელაძე დაესწრნენ.
"ჩვენ ვაკის პარკში წლების განმავლობაში მიტოვებული საბავშვო მოედანი გავხსენით. დამონტაჟდა ევროპული წარმოების ატრაქციონები და კეთილმოეწყო მიმდებარე ტერიტორია. პატარებს დღეიდან შეეძლებათ მოვიდნენ "შუმბა ლენდში", სადაც მათ უმარავი გასართობი დახვდებათ,"_ განაცხადა თბილისის ვიცე მერმა.
მისივე თქმით, საბავშო ქალაქის კეთილმოწყობისთვის 4 მილიონ ლარამდე ინვესტიცია ჩაიდო.
რატომ დაერქვა პარკს "შუმბა ლენდი" და რა ასაკის ბავშვებზეა გათვლილი ატრაქციონები, ამ საკითხებზე "გურია ნიუსს" პარკის გახსნის ერთ-ერთი ორგანიზატორი, სოფო მიქელაძე ესაუბრა.
როგორც მიქელაძემ აღნიშნა, ორგანიზატორებს არ სურთ, რომ "შუმბა ლენდის" გახსნა გასული წლის 13 ივნისს მომხდარ ტრაგედიასთან ასოცირდებოდეს.
"არ გვინდა, რომ "შუმბა ლენდის" გახსნა დაკავშირებული იყოს 13 ივნისის ტრაგედიასთან, მაგრამ იმდენად საყვარელი იყო თეთრი ლომი შუმბა და იმდენად უცნაური ისტორია ჰქონდა,თუნდაც ის, რომ ძაღლთან მეგობრობდა, გადავწყვიტეთ მის მეგობარ კარაკულასთან ერთად, ყველასთვის საყვარელ გმირად დარჩენილიყო. ვგეგმავთ ბევრ აქტივობებს, რომ შუმბა უკვდავყოთ და გავხადოთ პოზიტიურ ისტორიად, რომ ამ ტრაგედიას არ დაუკავშირდეს,"_ განაცხადა მიქელაძემ.
მისივე თქმით, გასართობი ატრაქციონები 0-დან 12 წლამდე ასაკის ბავშვებისთვისაა განსაზღვრული.
"ატრაქციონები იყოფა ორ ასაკოვან ჯგუფად. 0-იდან 6-მდე და 6-დან 12 წალმდე, ფასიც სხვადასხვა იქნება, სავარაუდოდ, პატარა ატრაქციონები 1 ლარი ეღირება,"_ამბობს მიქელაძე.
დღეს დილიდან საბავშვო ატრაქციონები უფასო იყო, პარკში მისულ ბავშვებს სხვადსხვა სახის ტკბილეულობით გაუმასპინძლდნენ.
